O'zbekiston milliy terma jamoasi bosh murabbiyi Samvel Babayan e'lon qilgan tarkibdan odatdagidek, ko'plab iqtidorli yoshlar o'rin egallashdi. Ular orasida «Lokomotiv»ning umidli himoyachilaridan biri Bobur Yo'ldoshevning ham nomi bor. Ushbu futbolchining bosh jamoa ro'yxatiga kiritilganidan keyingi holati, millionlar o'yiniga kirib kelishi, Turkiyaning «Manisaspor» klubida olgan taasurotlaridan voqif bo'lish maqsadida uni suhbatga chorladik.
- Yoshlar terma jamoasida to'p surdingiz, OTJ safidagi o'yinlaringiz orqali muxlislar hurmatini qozondingiz. Endi navbat milliy termaga. Xo'sh, bosh jamoada nimalarni asosiy maqsad sifatida belgiladingiz?
- MTJda avvalroq ham to'p surish imkoniyatiga ega bo'lganman, faqat rasmiy o'yinda emas. Murabbiylar imkoniyat berishsa, albatta, ijobiy sifatlarimni namoyish etishga sidqidildan harakat qilaman.
- Sizningcha, milliy termamizdagi himoya qo'rg'onining saviyasi qay darajada?
- A'lo, deya olaman, kuchli himoyachilar to'planishgan. Masalan, Anzur Ismoilov, Vitaliy Denisov kabi futbolchilar raqib hujumlarini sovuqqonlik bilan bartaraf etishadi.
- Bobur Yo'ldoshev uchun qaysi hujumchini zararsizlantirish nisbatan qiyinroq?
- Himoyachi uchun eng asosiysi - raqib forvardlarini jarima maydonchasiga kiritmay, ularni zararsizlantirish. Aksincha, hujumchilarning vazifasi - gol urish. Shundan kelib chiqib, bu savolga aniq javob qaytarolmayman.
- Termada qaysi pozitsiyada o'ynashingiz mumkin?
- Hozirdan bir nima deyish qiyin. Murabbiylar qaysi chiziqda harakatlanishimni joiz topishsa, ularning ko'rsatmalarini hamisha bajarishga tayyorman. Asosiysi, terma jamoamizning 2018 yilgi jahon chempionatiga borishi uchun biroz bo'lsada hissa qo'sholsam, o'zimni baxtiyor sezaman.
- Bosh jamoada kuchli raqobat hukm­ronlik qilishidan xabaringiz bor, albatta...
- To'g'ri, lekin bundan zarracha xavotirlanmayman. Zero, raqobat yo'q joyda o'sishga erishib bo'lmaydi.
Davomi InterFUTBOL gazetasi blogida.
— deya xabar beradi uff.uz nashri.