Madridning "Real" klubi "Atletiko" himoyachisi Teo Ernandes uchun shartnomasida ko'rsatilgan transfer qiymatidan ko'proq to'lashga rozi bo'ldi.
"Atletiko" prezidenti Migel Xil Marin "Real"dan Ernandes uchun 30 million evro talab qilmoqda. Himoyachining shartnomasida esa 24 million evro evaziga boshqa klubga o'tishi haqida band bor.
"Real" rahbariyati "Atletiko"ning talabiga rozilik bildirdi. Bunga sabab sifatida "Real" avval Ernandes bilan muzokara o'tkazib, so'ngra "Atletiko" rahbariyatiga taklif bilan chiqqani ko'rsatilmoqda.
Bu esa FIFA qoidalariga zid bo'lib, "Atletiko" shikoyat bilan chiqish qilishi mumkin edi. Boz ustiga 19 yoshli himoyachi hali rasmiy transfer amalga oshmay turib "Real"da tibbiy ko'rikdan o'tgan.
Bu esa "Atletiko"ning noroziligiga sabab bo'ldi. Klub rahbariyati Ernandes bilan gaplashib, uning "Real"ga o'tish istagini bilgach, imkon qadar ko'proq mablag' evaziga sotishga qaror qildi.
"Atletiko" Ernandesning transferi haqida faqat EChL yarim finalidan so'ng ma'lum qilinishini talab qilgan. Aks holda klub FIFAga shikoyat qiladi.
— deya xabar beradi uff.uz nashri.