Hozirgi vaqtda Xurshid Tojiboev yurtimizning eng kuchli va umidli bokschilaridan biri sanaladi. Bugun biz jizzaxlik charm qo'lqop ustasi haqida hikoya qilamiz. Aytish kerak, Xurshidning boksga kirib kelishi tasodif tufayli yuz bergan.
1989 yilning 13 noyabr kuni tavallud topgan Xurshid Tojiboev bolaligida barcha o'g'il bolalar singari maktabdan so'ng to'pning orqasidan quvish – futbol bilan mashg'ul bo'lardi. Darsdan qaytishda maktab sumkasi darvozaga, to'p topilmay qolsa, biror bir tepishga arziydigan buyum to'pga aylanardi-yu, mahallaning “buyuk” chempionati boshlanib ketardi. Bunday “muhim bellashuv”larda, albatta, Xurshid asosiy futbolchilardan edi.
Kunlarning birida, ana shunday o'yin paytida, qo'shni mahalla bolalarning bir nechtasi “futbolchilar” yonidan sport sumkasini ko'targancha o'tib ketishadi. Buni ko'rgan Xurshid ularni to'xtatib, qaerga ketayotganliklariga qiziqadi. Bolalar boks to'garagiga borayotganliklarini, agar xohlasa u ham borishi mumkinligini  aytishadi. Garchi shu kungacha boksga qiziqmagan bo'lsada, Xurshid qo'shni mahalla bolalari bilan boks to'garagiga yo'l oladi. Uning maqsadi mashg'ulotlarni tomosha qilish edi, xolos.
Mashg'ulotlar zaliga kirgach esa, Xurshid tamoman hayratga tushadi. Har tomonga ilib qo'yilgan qoplar, har xil sport jihozlari... Eng muhimi o'zi qatori bolalarning qo'llariga qo'lqop kiyib bajarayotgan mashqlari, qilayotgan harakatlari... Bularni Xurshid ilgari faqatgina kinolarda ko'rgan edi. Shu sababli ham u zaldagi bolalarning mashqlarini ko'z uzmay, xavas bilan tomosha qiladi. Uyga qaytgach esa,  hammadan yashirincha, qo'liga matoni o'rab, qo'lqop qiladi va oynaga qarab, boks to'garagida bolalardan ko'rgan mashqlarini qaytara boshlaydi.
Endi Xurshid, uyquda ham o'ngida ham, faqatgina boks haqida o'ylay boshlaydi. Qo'liga haqiqiy qo'lqop kiyib, ringga chiqishi, g'olib bokschilar singari qo'lining yuqoriga ko'tarilishi, muxlislar olqishini hayol qilganda esa, yuragi orziqib ketardi.
Davomi Sports.Uz blogida.
— deya xabar beradi uff.uz nashri.