Bugun «Lokomotiv» OChL-2017 guruh bosqichining so'nggi 6-tur uchrashuvini o'tkazadi. Hamon «pley-off»ga chiqish imkoniyatini saqlab turgan «temir-yo'lchilar» Dubayda «Al-Ahli» klubi mehmoni bo'lishadi. Afsuski, O'zbekiston chempionining taqdiri o'z qo'lida emas. Agar parallel ravishda kechadigan o'yinda «Al-Tavon» «Istiqlol»ni engsa, so'nggi turdagi g'alaba ham Mirko Yelichich shogirdlariga yordam bermaydi. Boisi, Saudiya jamoasi o'zaro bahsda vakillarimizdan ustunlikka erishgan. Biz bugungi o'yin oldidan «Lokomotiv» futbolchisi Diyor Turopovdan intervyu oldik. - Diyor, oldinda sizlarni muhim uchrashuv kutib turibdi. Mazkur bahsga tayyorgarlik qanday ketyapti? - Murabbiylar bu o'yinga alohida reja ishlab chiqishgan. Nazariy mashg'ulotlarda raqib jamoa ishtirokidagi uchrashuvlarni tomosha qilib, «Al-Ahli»ni yaqindan o'rgan-yapmiz. - Raqibni nimaning evaziga mag'lub etish mumkin? - Bo'lajak bahsda kuchli ishtiyoq va g'alabaga ishonch bo'lsa, albatta, 3 ochko qo'lga kiritiladi. O'yinning so'nggi daqiqalarigacha bir maromda harakat qilsak, maqsadimizga erishamiz, deb o'ylayman. - «Lokomotiv»ga oson bo'lmasligini hozirdan taxmin qilish mumkin. Ruhiy tomondan uchrashuvga tayyormisizlar? - Ha, guruhning so'nggi o'yinidagi g'alaba biz uchun juda muhim. Chunki nimchorak finalga chiqish taqdiri hal bo'ladi. Murabbiylarning ko'rsatmalarini bekam-u ko'st bajarishga intilyapmiz. Futbolchilar ruhiy tomondan bahsga tayyor. O'ylaymanki, oldimizga qo'yilgan vazifani bajarib, muxlislarimizni chiroyli g'alaba bilan xushnud etamiz. - «Istiqlol» va «Al-Tavon»ga qarshi Toshkentda kechgan o'yinlarda qimmatli ochkolar boy berildi. Yo'l qo'yilgan xatolardan tegishli xulosalar chiqarildimi? - To'g'ri, o'yinni yutib turib, yakunda raqibga ochko taqdim etganimiz alam qildi. O'sha ikkala uchrashuv videoyozuvlarini qaytadan ko'rib chiqib, xatolardan tegishli xulosalar chiqarildi. Umid qilamanki, navbatdagi o'yinga mukammal darajada tayyorgarlik ko'ra olamiz. - Omadsizlikning sababini o'rganib, tahlil qilib ko'rdinglarmi? - Shaxsan men buni omadsizlik, demagan bo'lardim. Barchasiga o'zimiz sababchimiz. Endi xatolarimizni to'g'rilashimiz kerak. - «Lokomotiv»ning taqdiri ikkinchi o'yinga ham bog'liq. Narigi juftlikda «Istiqlol» «Al-Tavon» maydonida yutqazmasligi shart. Bu uchrashuv baribir, xayolning bir chetini egallasa kerak? - Saudiya Arabistonida o'tkaziladigan guruhimizning ikkinchi o'yini ham diqqat markazimizda bo'ladi. Lekin biz mazkur uchrashuv natijasiga ta'sir o'tkaza olmaymiz. Shu bois ham birinchi galda o'zimiz g'alaba qozonishga intilamiz. Keyin «Istiqlol»ga muxlislik qilamiz. - Bu yilgi OChLning saviyasi haqida nima deya olasiz? Ko'pchilik aynan «Lokomotiv» joylashgan guruhni eng kuchlisi deyapti... - Musobaqaning saviyasi juda ham yuqori. Ushbu turnirda qit'amizning eng kuchli jamoalari jamlanishgan. Tabiiyki, klublar safida o'ynayotgan futbolchilarning saviyasi ham baland. Umuman, har bir guruhning o'ziga yarasha murakkabligi bor. Biz joylashgan kvartet eng kuchlisi deyolmayman. Aks holda, bu boshqa jamoalarga hurmatsizlik bo'ladi. Boshqa tomondan, guruhimizdagi to'rtta jamoada ham so'nggi turgacha keyingi bosqichga chiqish imkoniyati saqlanib qolgan. Nazarimda, bu ham ko'p narsadan darak beryapti. - Mabodo, «Lokomotiv» guruhdan chiqolmasa, bu jamoa uchun katta yo'qotish va omadsizlik sifatida qabul qilinadimi? DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.