Xabar berib o'tganimizdek, 8-22 may kunlari Ozarbayjon poytaxtida IV "Islom birdamlik o'yinlari" musobaqasi bo'lib o'tadi. 8 may kuni O'zbekiston delegatsiyasining dastlabki qismi Boku shahriga etib bordi.
Musobaqa rasman 12 may sanasidan start olsada, sport o'yinlari bo'yicha bellashuvlar bugundan boshlab yuborildi. Hozircha Bokuga 44 nafar sportchilarimiz etib kelishdi. Demak gandbol, boks, badiiy gimnastika va o'q otish bo'yicha terma jamoamiz a'zolari Bokudagi Sportchilar shaharchasiga joylashib bo'lishdi. Bu erda musobaqa ishtirokchilari uchun barcha sharoitlar muxayyo etilgan. Tibbiy xizmat va ovqatlanish shahobchalari 24 soat davomida uzluksiz ishlab turibdi.
Qolaversa bellashuvlardan bo'sh paytda sportchilarning madaniy hordiq chiqarishlari va vaqtlarini mazmunli o'tkazishlari uchun tashkiliy qo'mita tomonidan bir qator madaniy dasturlar ishlab chiqilgan. Bir so'z bilan aytganda musobaqani har jihatdan yuqori saviyada o'tkazish uchun katta hajmda ish olib borilgani ko'rinib turibdi.
Bugun kechqurun delegatsiyamiz tarkibini jahon sport gimnastikasi afsonasi, sportning ushbu turi bo'yicha Olimpiya o'yinlarining yagona 7 karra ishtirokchisi Oksana Chusovitina to'ldiradi. Boku shahriga etib borilishi bilan O'zbekiston delegatsiyasi rahbari o'rinbosarlari Nazirjon Xudaykulov va Xumoyun Ibragimovlar ishchi guruh a'zolari hamda murabbiylar shtabi bilan yig'ilish o'tkazishdi.
Unda barcha mas'ul shaxslarga zarur topshiriqlar berildi. O'zbekiston delegatsiyasi uchun Sportchilar shaharchasidan alohida joy ajratildi. Ayni vaqtda Bokuga dunyoning turli burchaklaridan sportchilar etib kelishmoqda.
IV “Islom birdamlik o'yinlari”da 57 ta davlatdan 3500 dan ziyod sportchilar ishtirok etishi kutilmoqda. Eng katta delegatsiyalar qatorida musobaqa mezboni Ozarbayjon, shuningdek, Turkiya va Saudiya Arabistoni terma jamoalarini ko'rsatib o'tish mumkin.
O'zbekiston sharafini nufuzli musobaqada 103 nafar hamyurtlarimiz sportning 15 ta turida himoya qilishadi. Demak, sportchilarimiz boks, taekvondo, dzyudo, karate, o'q otish, gandbol, tennis, og'ir atletika, erkin kurash, yunon-rum kurashi, sport gimnastikasi, badiiy gimnastika, engil atletika, para-dzyudo va para-atletika sport turlari bo'yicha o'tkaziladigan bellashuvlarda ishtirok etadilar.  
Vakillarimiz orasida birinchi bo'lib gandbolchi qizlarimiz musobaqadagi ishtiroklarini boshlab berishdi. Bugun Ismoiljon Ahmedov shogirdlari dastlabki uchrashuvni Turkiya terma jamoasiga qarshi o'tkazishdi. Ta'kidlab o'tish lozimki, gandbol bo'yicha terma jamoamiz asosini 2016 yilda Slovakiya va Rossiyada bo'lib o'tgan o'smirlar va yoshlar o'rtasidagi jahon chempionatida ishtirok etgan qizlarimiz tashkil etishgandi. Afsuski uchrashuvda turkiyalik gandbolchi qizlar tajriba bobida ustunlik qilishdi va bellashuvni o'z foydalariga hal qilishdi.
Delegatsiyamizning asosiy qismi Bokuga 11 may kuni etib keladi. Sport kurashlari bo'yicha terma jamoamiz a'zolari esa Hindistonda bo'lib o'tadigan Osiyo chempionatidagi ishtiroklarini yakunlab 15 may kuni Ozarbayjon poytaxtida delegatsiyamiz safini to'ldirishadi.
12 may kuni soat 21:00 da Bokudagi Olimpiya stadionida IV “Islom birdamlik o'yinlari”ning tantanali ochilish marosimi bo'lib o'tadi. Shu kundan e'tiboran aksariyat sport turlari bo'yicha bahslar boshlab yuboriladi. Eslatib o'tamiz, musobaqa 22 mayga qadar davom etadi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.