«Endigina jarohatidan forig' bo'lgan Garet Beylning yana safdan chiqishi mumkinligini kim ham o'ylabdi deysiz?». Bu alamli so'zlar jurnalist Richard Martinning tvitterida yozib qoldirildi. Mazkur bitik ostidagi izohlarni mutolaa qilsangiz, Beyl umuman jarohatlardan qutulmaydigan omadsiz futbolchidek tasavvur uyg'otadi. Rost-da, axir dunyoning sobiq eng qimmat futbolchisi zamonamizning eng murosasiz «Klasiko»sida bor-yo'g'i 38 daqiqaga yarasa, Zidanga alam qiladi-da... Oddiygina raqamlar ESPN kompaniyasining hisob-kitoblariga ko'ra, Beyl Madriddagi to'rt mavsum davomida 17-bor jarohatga yo'liqmoqda. Jarohatlar tufayli u «Real»ning 79ta o'yinini o'tkazib yuborishga majbur bo'ldi. Muammolardan ko'z yumishning iloji yo'q. Hattoki, sizning ismingiz Florentino Peres bo'lsa ham. 17 jarohat? Bu axir, juda ko'p-ku! Darhaqiqat, so'nggi vaqtlarda Beyl va jarohat bir-biridan ayro tasavvur qilib bo'lmaydigan tushunchalarga aylanib qoldi. Lekin keling, masalaga yondashishdan oldin tarixga bir nazar solaylik. «Atigi besh yil avval «Totten-xem»ning zaxiradagi himoyachisi sanalgan Garet Beyl kecha «Real»ning afsonasiga aylandi», - deb yozgandi Daily Mirror muxbiri Deyv Kidd ChL-2014 finalidan keyin. Yaxshi bilasiz, bu o'yinda Garet madridliklarning g'alaba to'pini kiritgan. «Beylning «Real»dagi ilk mavsumi ajo-yib o'tmoqda. Albatta, kim uchundir bu boshqacha tuyulishi ham mumkin, lekin Garet qiyinchiliklarni bir zumda engib o'tmoqda», - deb yozgandi The Telegraph xodimi Pol Xeyuord. Agar o'sha davrlar yodingizda bo'lsa, Beyl Polning fikri aytilishidan bir oycha muqaddam, Ispaniya kubogi finalida Mark Bartrani yosh boladek laqillatdi va bu bilan britaniyalik jurnalistlarning maqtanishlariga yo'l ochib berdi. Zero haqiqatan ham, «Santyago Bernabeu»dagi 2013|2014 yillar mavsumi Beyl uchun ko'ngildagidek o'tgandi. Ammo yanvar oyiga kelib, Garetning jarohatlarga moyilligi borligi barchaga ma'lub bo'lib qoldi va shu bois, ispan matbuotida Beylni Jonatan Vudgeytga o'xshata boshlashdi. Vudgeytning mashhurligiga sabab shuki, u turli jarohatlar va kulguli falokatlar tufayli «Real» libosida bor-yo'g'i 14 marta maydonga tushgan, xolos. Tabiiyki, bu o'xshatishda mahobat biroz ko'proq, lekin Garet mavsum davomida ancha-muncha, ya'ni 17ta o'yinni o'tkazib yuborgandi. Boz ustiga, bu vaqtga kelib «Tottenem»dan o'ta yuqori narxda sotib olingan vingerning umurtqasida muammolar borligi barchaga oshkor bo'lib qolgandi. Lekin nafsilamrini aytganda, 2014|2015 yillar mavsumi - Ispaniyadagi birinchi yil Beyl uchun yomon o'tmadi. U 48 o'yinda 4200 daqiqa harakat qildi. O'tgan mavsumda esa ko'rsatkich ikki barobar pasayib ketdi. Joriy mavsumda esa holat qanday ekanini barcha yaxshi biladi... Bizningcha, Beyl faoliyatidagi eng yoqimsiz jarohatlarni yaqinda orttirib oldi. Deylik, «Sporting» (Xixon, yanvar-2016)ga qarshi o'yin chog'ida uning son mushaklari uzildi. Lissabonning shu nomdagi klubiga qarshi bahsda esa (noyabr-2016) boldir paylaridagi cho'zilish sabab uch oy havoga ketdi. Xullas, Beylning asosiy muammolari quyidagilar: son va boldir mushaklari, bel, oyoq kafti va paylar. Beyl doim shunaqamidi? Sirasini aytganda, Beyl faoliyatidagi eng og'ir damlar uning o'smirlik chog'lariga to'g'ri keladi. Deylik, u 16 yasharligida futbol bilan butunlay xayrlashishi ham mumkin edi. U paytlari Beyl 100 metrlik masofaga chopishda birgina Teo Uolkott-ga yutqazardi, xolos. Biroq ayni choqda Garetni o'smirlarga xos muammo - bo'yi pastligi qiynardi. 15 yoshga to'lganida esa uning bo'yi birdaniga, katta tezlikda o'sa boshladi. Afsuski, bu - bolakayning foydasi emas, zarariga ishladi. Beyl o'sha damlarni quyidagicha eslaydi: «Bolaligimda men juda pakana edim. Lekin 15 yoshga to'lganimda bo'yim tez o'sa boshladi. Buning oqibatida belimda kuchli og'riqlar paydo bo'ldi. Suyaklarim og'irligimga nisbatan haddan tashqari yirik edi». - Bu jarayon uning harakatchanligi va kuchiga salbiy ta'sir ko'rsatdi. O'sha uch yillik davr Beyl uchun nihoyatda murakkab kechgandi, - deb eslaydi futbolchining ilk murabbiylaridan biri Rod Raddik. Tinimsiz jarohatlar, beldagi og'riqlar, o'tkazib yuborilgan mash-g'ulotlar natijasida «Sautgempton» murabbiylarida Beylning kelajagiga bog'liq gumon uyg'ondi. Aniqroq aytsak, klub murabbiylari uni jamoada olib qolish masalasiga shubha bilan qaray boshlashdi. Lekin «Norvich»ga qarshi o'tgan nazorat bahsida Garet ko'ngildagidek to'p surgani uchun u sevimli mashg'ulotini davom ettirmoqda. Kim biladi deysiz, o'sha uchrashuvni Kardiffdan etib kelgan insonlar - Garetning ota-onasi kuzatishgani uchun ham yigitcha o'zidan yaxshi taassurot qoldira olgandir?! Futbolchi hayotidagi boshqa muammolar haqida Xarri Rednapp ham etarlicha ma'lumotga ega. Chunonchi, uelslik futbolchi aynan shu mutaxassis qo'l ostida mashhurlikka erishgan. Qolaversa, Rednapp boshqa hamkasblaridan farqli o'laroq, Garetga bir nechta otalarcha maslahat berishga ham jur'at etgan. Deylik, futbolchi o'ziga oro berishini ko'rgan Rednapp tanbehni juda qoyillatgandi: «Beyl. Boshingda bo'lmag'ur narsalar yaratishni bas qil!». «Beylning faoliyatidagi men sezgan yagona kamchilik - u boshida judayam nozik yigit edi. Deylik, ilgarilari u mashg'ulotlarda arzimagan bahona bilan yiqilar, shifokorlar darhol maydonga chopib chiqishardi. Oxir-oqibat, bu narsa mening jonimga tegib, shifokorlarga shunday dedim: «Uni o'z holiga qo'yinglar, o'zi o'rnidan turib olsin». Faqat shundan keyingina Garet ortiqcha ehtiyotkorlikni bas qildi. Boshqa tomondan, futbolda yozilmagan bir yoqimsiz qoida ham mavjud: sen yaxshi o'yinchimisan, demak aynan sening oyog'ingga ko'proq zarba berishadi. Tezkor futbolchini to'xtatib qolishning yagona va ishonchli yo'li - uni yiqitish. Lekin hozirgacha Beyl chaqqonligi evaziga mudhish to'qnashuvlarga chap berib kelayotgandi. Ulg'ayganidan keyin esa Garet tushundiki, sportning bu turida to'qnashuvlardan qochib qutulishning iloji yo'q ekan. Shunda u yakuniy qarorga keldi: «Kuchli og'riqni his qilayotganimni hech kimga bildirmayman». Achinarlisi, bugunga kelib, garchi Beyl azob chekayotganini hammadan yashirishga urinsa-da, aslida uning holati yaxshi emasligini barcha ko'rib turibdi. Endi nima bo'ladi? Muammo nimada o'zi? DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.