Joriy yilgi oliy liga bahslari avvalgilariga nisbatan ancha qiziqarli tarzda kechdi. Chempionat yakunlanishiga bitta tur qolgan bir pallada chempion va kumush medal sohibi hali rasman aniqlanganicha yo'q. To'g'ri, Qarshida qo'lga kiritilgan muhim g'alabadan so'ng «Paxtakor»ning chempionlik yo'lidagi imkoniyatlari keskin oshdi.
Lekin bu  «oltin» masalasi to'liq hal qilindi, degani emas. Mabodo, so'nggi turda «Andijon» mo''jiza ko'rsatib, peshqadamdan ochko tortib olsa, o'z navbatida,  «Lokomotiv» Namanganda «Navbahor»ni mag'lubiyatga uchratsa, «temiryo'lchilar» o'z tarixlarida ilk bor chempionlik shohsupasiga ko'tarilishadi. Hamma narsa bo'lishi mumkin. Shuningdek, turnir jadvalining quyi pog'onalaridagi  «hayot uchun kurash» ham qizigandan-qizigan.
«Buxoro», «Dinamo» hamda «So'g'diyona» jamoalarining bor diqqat-e'tibori  elitada jon saqlab qolishga qaratilgan. g'uzorning «Sho'rtan» klubi ikkinchi davra o'yinlarini ko'ngildagidek o'tkazolmagan bo'lsada, kuchlilar safidagi o'rnini bir amallab saqlab qolishga erishdi. Jamoaga birinchi davrada qo'lga kiritilgan ochkolar qo'l keldi. Biz «Lokomotiv»­ga qarshi kechgan 27-tur uchrashuvidan so'ng g'uzor jamoasi etakchilaridan biri, o'sha o'yinda «temiryo'lchilar»  darvozasiga kiritilgan yagona javob to'pi muallifi  g'ulomhaydar g'ulomovdan intervyu oldik.
- G'ulomhaydar, «temiryo'lchilar» birinchi davrada «Sho'rtan» darvozasini 4 marta ishg'ol qilishgandi. Toshkentda o'tgan o'yinda esa 1:4 hisobida yutqazdinglar. Vaholanki, uchrashuvni yomon boshlamagan edinglar.Sizningcha, ketma-ket gol o'tkazib yuborilishiga nima sabab bo'ldi?
- Bilasizmi, asosiy e'tiborni darvozamiz daxlsizligini saqlashga qaratib, ko'pchilik bo'lib himoyaga yotib olganimiz yirik hisobdagi mag'lubiyatimizga zamin yaratdi. Bu - birinchi sabab. Ikkinchidan esa, tan olish kerak, «Lokomotiv» bugungi kunda ham jismonan, ham texnik-taktik jihatdan etakchi. Uchrashuv boshidanoq maydondagi ustunlikni mezbonlarga topshirib qo'ydik. Hatto ularning himoyachilari ham hujumlarga faol qo'shilishdi.
- O'yindan avval qanday ko'rsatma berilgandi?
- Birinchi davradagi xatolarni takrorlamaslik uqtirilgandi. Yodingizda bo'lsa, g'uzorda 0:4 hisobida yut-qazgandik. O'sha o'yindan xulosa chiqargan holda o'ynashimiz kerak edi. Afsuski, raqibga kuchimiz etmadi. Ochiq futbol namoyish etganimizda, hisob bundan-da yirik ko'rinish olishi hech gap emasdi.
- Ushbu o'yinda jamoangizning yagona javob to'pini chiroyli tarzda kiritdingiz...
- Shundayku-ya, lekin urgan golim o'yin natijasiga ta'sir o'tkazmaganidan ke­yin uning chiroyidan nima naf? Men uchun klub manfaati ustunroq turadi. Zero, futbol - jamoaviy o'yin!
- Ikkinchi davraning so'nggi tur o'yinlarini ancha bo'sh o'tkazdinglar. Buning boisi nimada?
- Hozir sabablarni sanasam, xuddi bahona qilayotgandek bo'lib qolaman. Hamma vaziyatni ko'rib turibdi.
- «Sho'rtan» so'nggi ikki tur natijasidan qat'iy nazar, oliy ligada qoladi. Mavsum avvalidagi vazifa ham aynan kuchlilar safida jon saqlashmidi?
- Jamoamiz oldiga 10-o'rinni egallash vazifasi qo'yilgandi. O'ylashimcha, ushbu maqsadni amalga oshirish uchun imkoniyat bor.
- Bu vazifa jamoaning ichki imkoniyatlaridan kelib chiqib qo'yilganmidi?
- Xuddi shunday. Lekin shaxsan men yanada yuqoriroq o'rinlar uchun kurashamiz, deb o'ylagandim. Afsus, adashibman. Baribir, hali tajribam kam shekilli, kalta fikrlabman.
- «Sho'rtan» 28ta o'yinning (suhbat 29-tur uchrashuvi oldidan o'tkazilgan - muallif) 9tasida durang qayd etdi. Hozirda jamoangiz oliy ligada eng ko'p durang o'ynagan jamoa bo'lib turibdi. Bu nimadan darak?
- Bejizga 10-o'rin deyishmagan ekan. Aslida bir ochko qo'lga kiritgan o'yinlarimizning 60-70 foizida g'alabaga munosib edik. O'zimiz yo'l qo'ygan qo'pol xatolar tufayli duranglar ko'payib ketdi. Ikkita bahsda murosa ko'chasini tanlagandan ko'ra, bitta g'alaba va bitta mag'lubiyat qayd etgan ma'qul. Har holda, ikki ochkodan ko'ra uch ochko yaxshi-da!
Davomi InterFUTBOL gazetasi blogida.
— deya xabar beradi uff.uz nashri.