Avval xabar berganimizdek, 8 may kuni O'zbekiston delegatsiyasining 40 kishidan iborat dastlabki qismi IV “Islom birdamlik o'yinlari”da ishtirok etish uchun Boku shahriga etib kelib, Sportchilar shaharchasiga joylashgandi. Bugun mamlakatimizning eng katta delegatsiyasi ham Kaspiy bo'yiga etib bordi.
Bugun Toshkent-Boku reysi bilan Ozarbayjon poytaxtiga dzyudo, karate, tennis, og'ir atletika, engil atletika, para-dzyudo va para-atletika sport turlarida yurtimiz sharafini himoya qiladigan sportchilar hamda murabbiylardan iborat 65 kishilik guruh etib keldi.
Bokudagi Geydar Aliev Xalqaro aeroportida mamlakatimiz delegatsiyasini O'zbekistonning Ozarbayjon Respublikasidagi Favqulotda va Muxtor Elchisi Sherzod Fayziev kutib oldi.
Bungacha boks, o'q otish, sport gimnastikasi, badiiy gimnastika va gandbol bo'yicha terma jamoamiz a'zolari Ozarbayjon poytaxtida jam bo'lishgandi. Demak, IV “Islom birdamlik o'yinlari”da ishtirok etadigan mamlakatimizning 15 ta sport turlari bo'yicha terma jamoalaridan 12 tasi Sportchilar shaharchasiga joylashib ulgurishdi.
Kecha shuningdek, delegatsiyamiz tarkibini sport gimnastikasi bo'yicha Olimpiya o'yinlarining yagona etti karra ishtirokchisi, “Barselona-1992” Olimpiya o'yinlari chempioni, bir necha karra jahon va Evropa chempioni, Xizmat ko'rsatgan sportchi Oksana Chusovitina to'ldirdi. Aytish kerakki Oksana IV “Islom birdamlik o'yinlari”da g'oliblikka asosiy da'vogar sportchilardan hisoblanmoqda.
15 may kuni delegatsiyamizning so'nggi qismi – taekvondo, erkin kurash va yunon rum kurashi bo'yicha terma jamoamiz a'zolari Bokuga etib kelishadi. Sportchilar shaharchasida musobaqa ishtirokchilari uchun barcha sharoitlar muxayyo etilgan. Tibbiy xizmat va ovqatlanish shahobchalari 24 soat davomida uzluksiz ishlab turibdi.
Qolaversa bellashuvlardan bo'sh paytda sportchilarning madaniy hordiq chiqarishlari va vaqtlarini mazmunli o'tkazishlari uchun tashkiliy qo'mita tomonidan bir qator madaniy dasturlar ishlab chiqilgan. Bir so'z bilan aytganda musobaqani har jihatdan yuqori saviyada o'tkazish uchun katta hajmda ish olib borilgani ko'rinib turibdi.
Ayni vaqtda Bokuga dunyoning turli burchaklaridan sportchilar etib kelishi davom etmoqda. IV “Islom birdamlik o'yinlari”da 57 ta davlatdan 3500 dan ziyod sportchilar ishtirok etishi kutilmoqda.  
12 may kuni soat 21:00 da Bokudagi Olimpiya stadionida IV “Islom birdamlik o'yinlari”ning tantanali ochilish marosimi boshlanadi. Shu kundan e'tiboran aksariyat sport turlari bo'yicha bahslar boshlab yuboriladi. Musobaqa 22 mayga qadar davom etadi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.