«Arsenal»ning germaniyalik yarim himoyachisi Mesut Ozil keyingi mavsumda ham «kanorirlar» safida qoladimi? Sky Sports telekanali muxbirlari uni suhbatga chorlab, ayni shu masalani o'rtaga tashlashdi - Ozilning kelajak rejalari qanday? Avvalroq agarda Arsen Venger jamoa bilan shartnomasi muddatini uzaytirsagina Germaniya termasi yarim himoyachisi «to'pchilar» safida qolishi haqida xabarlar tarqalgandi. «Yo'q, «Arsenal»dagi kelajagim faqat Vengerga bog'liq emas. To'g'ri, Londonga kelishimga aynan shu murabbiyning ishonch bildirganligi sabab bo'lgandi»,-dedi futbolchi bu masalada. Ozil shuningdek,  jamoani 20 yil ko'proq vaqtdan buyon boshqarib kelayotgan mutaxassisning professionallik salohiyatiga alohida to'xtaldi: «Ulkan tajribaga ega murabbiyning «Arsenal»ni dunyo bo'yicha etakchi klublar qatoriga olib chiqqanini unutmaslik kerak. Xullas, Venger yuksak hurmatga loyiq inson. Afsuski, uning «Arsenal»da qolish-qolmasligini men hal qilolmayman. Nima bo'lishidan qat'iy nazar, biz jamoa sifatida olg'a intilmoqdamiz. Tabiiyki, o'z oldimizga qo'yilgan vazifalarni uddalash uchun bor imkoniyatlarni ishga solamiz». Eslatma, Venger o'z kelajagi xususida yakuniy qarorni yozda qabul qilishini aytgandi. «Arsenal» himoyachisi Nacho Monreal esa yaqinda klub rahbariyati frantsiyalik mutaxassisga yangi shartnoma taklif qilishga tayyor ekanligi haqida gapirdi. Ozil suhbat davomida ekspertlar tomonidan o'ziga nisbatan bildirilayotgan fikrlar, jumladan, tanqidlarga ortiqcha e'tibor qaratmasligini ta'kidladi: «Ayrim muxlislar meni yoqtiradilar, ayrimlari yo'q - bu oddiy holat. Kimdir jismoniy ko'rsatkichlarimni hisob-kitob qiladi va o'ylaydiki, bu masala meni tashvishlantiradi. Yo'q, chetdan yangraydigan gaplarga uncha e'tibor bermayman va o'zimni o'zgartirishga urinmayman ham. Tabiatim va o'yin uslubim shunday... Qaerda to'p surmayin, fanatlar mendan ko'prog'ini talab qiladilar. Chunki har qanday vaziyatni o'zgartirib yuboradigan o'yinchilar toifasidanman. Albatta, tanqidlardan qochib qutulishning iloji yo'q. Maqtovlar xususida ham xuddi  shunday deyish mumkin. Biroq shaxsan men uchun muxlislardan ko'ra, murabbiyning fikri muhimroq. Buni bir necha marta ta'kidlaganman. Ochig'i, muxlislarning ayrim fikrlarini tushunolmayman: «Qarang, Ozil avvalgidek emas - to'p uchun kurashmayapti, o'zini jangga urmayapti. Ishtiyoqi susayib qolgandek». Yo'q, aslida unday emas. Bunga shubha qilsangiz, statistik ko'rsatkichlarimga qarang: harakatlar dinamikasi bo'yicha boshqalardan sira ortda qolmayapman. Xullas, hamon zimmamdagi vazifalarga jiddiy yondashyapman». DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.