Maqolamiz avvalida bir fikrni ta'kidlamoqchimiz, shu paytgacha terma jamoamizni boshqargan hech bir murabbiy Babayanchalik tanqid qilinmagan, uchalik tez tanqidga uchramagandi. To'g'ri, Mirjalol Qosimovni ham tanqid toshlari ostida qoldirgandik, ammo uni Babayanchalik yomon ko'rmagandik. Biroq, taassufki, Babayan hamon amal kursisida. BU GALGISI BOShQAChA BO'LUR!
Ha, ishoning, bu galgisi boshqacha bo'ladi. Chunki ayni damda terma jamoamiz shunaqa o'yin ko'rsatyaptiki, nima deb ta'rif berishni bilmay qolasan. Saralashdan o'tishimiz ham, yiqilishimiz ham antiqa bo'ladi. Yo fantastik tarzda keyingi bosqichga yo'l olamiz (bu o'yin bilan jahon chempionatiga chiqish fantastikaning o'zginasi), yoki sharmandali tarzda saralashdan chiqa olmaymiz. Ochig'i, oddiyroq jamoalarga qarshi o'ynaganda ham, aniq g'alaba qozonadi, deb ayta olmaymiz. Chunki jamoani Samvel Babayan boshqaryapti, tarkibda biz maydonga tushmasligi uchun har nega tayyor ayrim futbolchilar bor (bularning kimligini aytish shart bo'lmasa kerak, hatto futbolga qiziqmaydiganlar ham bir marta bo'lsa-da, eshitishgan ularning ismlarini), demak, yana o'sha ma'lum muddat quyosh chiqishi-yu, keyin to o'yin yakuniga qadar sharros yomg'ir qo'yishi va yakunda futbolchilarimiz o'sha botqoqqa botib qolishi... Bu futbolimizga doimiy stsenariy bo'lib kirdiki, o'rganib qoldik. Samvel Babayan esa futbolimizning «Qunduz amaki»siga aylandi, chunki agar o'sha multfilmni ko'rgan bo'lsangiz, Qunduz amakining ertaklari ham bir xil — «Bir bor ekan...» bilan boshlanib, «murod-maqsadiga etibdi» deya yakunlanardi. Babayanning bizga aytayotgan ertaklari ham bir xil. Janubiy Koreya Xitoyga yutqazdi, undan oldin esa terma jamoamiz Suriyaga mag'lub bo'ldi. Agar futbolchilarimiz Janubiy Koreya yutqazganini bilishganida, g'alaba qozonishardi, demoqchimisiz? Men bu fikrga qo'shilmayman, o'sha o'yinda futbolchilarimizda g'alabaga ishtiyoqini ko'rmadim, gol uradigan hujumchi ham yo'q edi, biz kutgan Temurxo'ja Abduxoliqov esa «Babayan ishi»ning qurboniga aylandi. «Babayan ishi» nimaligini bilasiz, legioner futbolchilar ishtirok etishi mumkin bo'lmagan bir tiyinga qimmat o'rtoqlik uchrashuvlari. Biz o'shandayoq aytgandik Sardor Rashidov, Temurxo'ja Abduxoliqov kabi legionerlarimiz terma jamoaning boshqa futbolchilari bilan birga o'ynashmasa, bir-birini qanday tushunadi, deb. Mana, isboti. Suriyaga qarshi o'yinda Temurxo'ja va boshqa futbolchilarimiz bir-birini unchalik tushunishmadi, aniqrog'i, Temurxo'ja terma jamoaning taktikasiga tusha olmadi, sababi, taktikaning o'zi yo'q edi. Agar qanotdan hujum uyushtirib, to'pni markazga uzatib berishni taktika desangiz, adashasiz. Bu allaqachon futboldagi oddiy holga aylanib ulgurgan. Futbolchilarimiz esa ana shu oddiy holni ham eplab yakunlay olishmaydi, yo noaniq zarba berishadi, yoki havodagi kurashda raqib himoyachilari to'pni qaytarib yuborishadi. Bu bitta Suriya bilan emas, mazkur saralashdagi barcha o'yinlarda kuzatilayotgan holat. BABAYaN LAVOZIMIDA QOLGANI MA'QUL, ChUNKI...
Ha, noto'g'ri o'qimadingiz, Babayan lavozimida qolgani ma'qul. Chunki u jamoaga singdirgan o'lik muhitni va tarkibni o'zgartirish uchun yangi murabbiyning vaqti etmaydi. Allaqachon saralashning yarmidan ko'pini ortda qoldirdik. Bu yog'iga sanoqli o'yinlar qoldi. Demak, Babayan o'zi pishirgan oshni o'zi egani ma'qul. «Terma jamoa bu turishda jahon chempionatiga chiqa olmaydi-ku!» deyapsizmi? To'g'ri, bir tomondan shunday bo'lgani ham ma'qul. Negaki shu vaqtga qadar saralashda omadsizlikka uchragan murabbiylar ishdan olinyapti, zora Samvel Babayan bilan ham shunday voqea sodir bo'lsa! Agar terma jamoamiz saralashdan o'ta olmay, Babayan ishdan ketib, o'rniga boshqa murabbiy (murabbiylik borasida bilimi va tajribasi bor) kelsa, biz saralashdagi omadsizlikka rozimiz, bordi-yu, terma jamoamiz saralashdan o'ta olmaganda ham Babayan lavozimida qolsa, unda o'zbek futboliga muxlislik qilishning foydasi qolmaydi-yov. Endi uchinchi taxmin, agar Babayan terma jamoamizni jahon chempionatiga olib chiqsa, unga haykal qo'ysa bo'ladi omadli murabbiy sifatida. Ammo agar shunday bo'lsa, keyinchalik uning yordamchilarini almashtirish, omadliroq va tajribaliroq mutaxassislarni jalb etish kerak. SARIQ ChAQAGA HAM ARZIMAYDIGAN «ENG KUChLI TARKIB»   DAVOMI:
— deya xabar beradi uff.uz nashri.