Kunlar o'tyapti, vaqt o'z yo'lida ildamlamoqda. Yana 1 oydan keyin o'zbek futbolida juda katta voqelik bo'ladi. Ya'ni o'sha kuni O'zbekiston milliy terma jamoasi Tehron shahrida Eron termasiga qarshi JCh-2017 saralash uchrashuvida maydonga tushadi.
"Ozodi" stadionida Samvel Babayan shogirdlari ijobiy natijani qayd etishlari shart! 2003 yilgacha ushbu stadionga 100 ming tomoshabin sig'ardi. O'tgan yildan boshlab "Ozodi" o'yingohi ta'mirlandi va hozirda 78.000 muxlis sig'adigan ko'rinishga olib kelingan.
"Paxtakor" va "Bunyodkor" stadionlaridan qariyb 2 marta katta mazkur o'yingohda O'zbekiston termasining amaldagi taqdiri hal bo'ladi.
To'g'ri, termamiz mag'lubiyatga uchrasa ham o'yinlarni davom ettiradi va o'z omadini pley-off bahslarida sinab ko'radi. Lekin, biz bilamizki shu paytdagacha O'zbekiston bunday to'siqlardan o'ta olmagan. Shunday ekan, bor umidimiz shu bosqichdayoq 2-o'rinni olib JChga chiqishdan iboratdir. Kulgili-a? Buni men ham bilaman...
Shu o'rinda bir ma'lumotni aytib ketmoqchimiz: agar Eron g'alaba qozonsa Jahon chempionatiga yo'llanmani qo'lga kiritadi. Demak, ular g'alaba uchun jon-jahtlarini berib o'ynashadi. Bizchi?
Biz bu safar ham "yashang, rahmat bemalol gol uravering" deb turaveramizmi? Yoki bir oy qolgan bo'lsa ham kerakli ko'rsatmalarni olamizmi? To'g'risi, endi biron narsa deya olmaymiz. Barchasi Babayan va maydondagi futbolchilarning xohish-istagiga bog'liq.
Men bir narsani aniq ayta olaman: agar istasak Eron bilan kamida durang o'ynashimiz mumkin. Nima qilish kerakligini va qanday taktika ostida o'ynash kerakligini men keyingi chiqishlarda ma'lum qilaman. Shunga majburman endi. Ha, siz ishonmasangiz ishonmang, ammo men Erondan ochko olishni bilaman, Babayan nazdidagi o'zbek futbolidagi eng kuchli shu terma jamoa bilan. Mayli, bu haqida keyinroq gaplashamiz. Muhimi ...
Hozir muhimi futbolchilar bilan qalbdan gaplashib olishda. Ruhshunoslar har bir futbolchi bilan personal ravishda suhbat qilishi kerak. U (futbolchi) nimani istaydi o'zi? Hayotdagi eng oliy maqsadi nima? "Mas'uliyat" degan iboraning ma'nosini qanchalik tushinadi? Uyat va or-nomus degan so'zning tub mohiyatini anglaydimi? Eng muhimi "Xalqning qarg'ishi" nima ekanligini tushinishga ongi etadimi?
Mana shu savollarni psixologlar har bir futbolchiga berishi kerak va javobini chuqur tahlili qilishi kerak. Boshqasini qo'yib turing. Jismoniy tayyorgarlik, keragi yo'q jismoniy zo'riqishlarni ikkinchi planga o'tishi lozim. Hozir futbolchining kallasi uchun ishlash kerak. Agar bu nima ekanini bilishmasa, marhamat biz o'rgatamiz, u nima ekanini.
U shunday narsaki, futbolchini ongini manfiy-qo'rquv bosgan fikrlardan tozalash kerak. O'rniga g'alabaga undovchi, shu vatani uchun jonini berishga ham tayyor ruhiyatni singdirish kerak. Hozir, faqat jismoniy tayyorgarlik yoki uzoqdan zarbalarni sayqallash bilan ish bitmaydi. Hozir futbolchi maydonda tezkor fikrlashi shart, to'pni uzoq o'zida tutib turishi kerakmas, jamoadoshi uchun ham kurashashi lozim va shunchaki maydonning to'g'ri joyiga joylashib, ochiq sherigiga uzatma berishi kerak. Golning o'zi keladi, shunda.
Hozir aqlli bo'lsak yutamiz. Hozir birlashsak yutamiz. Hozir gina-gudratni unutib, bir yoqadan bosh chiqarsak yutamiz. Hozir bir kishi hamma uchun hamma bir kishi uchun qabilida o'ynsak yutamiz.
Kim bo'libdi Eron? Ular ham xuddi bizdek o'ynashadi. Bizdan farqlari shuki, ular oriyat, vatan sha'ni va uyat nima ekanligini chuqurroq bilishadi. Boshqa jihatdan ustun emas ular.
Keling, muxlislar, futbolchilar, murabbiylar, jurnalistlar birlashaylik!
Men Evro-2016 musobaqasida Xorvatiya - Ispaniya o'yinini bevosita stadiondan kuzatganman. O'shadan mitti davlat bo'lgan xorvatlarning birdamligadan lol qolgandim. Men o'shanda o'yin boshlanmasdanoq Xorvatiyaning g'alabasini bilgandim...
Hozirgi zamonda faqat birlashgan va jamoaviy termagina g'alaba qozonadi. Agar shunday qila olsak, ishoning Erondan kerakli ochkoni olamiz, garchi ularning tarkibiga Messi yoki Ronalduni ijaraga olib qo'shib qo'ysak ham.
Biz baribir termamizni yaxshi ko'raveramiz. Shuni anglab eting, janob futbolchilar!
Endi birlashmasak bo'lmaydi!
Azizxon Akbarov
— deya xabar beradi uff.uz nashri.