Madridning «Real» klubi navbatdagi tur o'yinida «Deportivo»ni yirik — 6: 2 hisobida mag'lubiyatga uchratdi. To'g'ri, biz «qirollik klubi»ning bunday yirik g'alabalariga o'rganib qolganmiz, ammo klub ustozi Zayniddin Zidan ana shu o'yinda ikkinchi tarkibni maydonga tushirdi, «Real» hujumkor uchlik — Beyl, Benzema va Ronaldu, ya'ni BBSning yordamidan foydalanmadi. Ammo aynan shu o'yinda jamoada yangi uchlik — Asensio, Vaskes va Morata uchligi shakllanayotgani ma'lum bo'ldi. Xo'sh, bu uchlik BBSning o'rnini bosa oladimi? Quyida shu va umuman «Real»ning muammolari haqida fikr yuritamiz.
BEYL — ASENSIO. Ayni damda jarohat tufayli ko'ngildagidek o'ynay olmayotgan Garet Beylning o'rnini Zidan ko'p hollarda Marko Asensio bilan to'ldirmoqda va bu tanlov o'zini oqlamoqda. Asensioning yutuqli jihatlaridan biri uning texnikasidir. Qolaversa, futbolchi bu texnikasidan sovuqqonlik bilan foydalanishga intiladi. Xuddi Beyl singari raqiblarini ikkilanmasdan aldashga kirishadi. To'g'ri, bu harakatlari doim ham o'zini oqlayvermaydi, ammo uning hali yosh futbolchi ekanligi va tajriba to'plashini inobatga olsak, bunday harakatlarni amalga oshirishi o'zi uchun foydali. Sababi, futbolchi xato qilishdan qo'rqmasligi kerak, agar qo'rqsa, o'zida bor iqtidorni ham yuzaga chiqara olmasligi mumkin. Eng muhim jihat shundaki, aslida, «Malorka» klubi tarbiyalanuvchisi hisoblangan Marko Asensio 21 yosh bo'lsa-da, nimalarga qodirligini allaqachon isbotladi. Bir so'z bilan aytganda, u Beylga munosib o'rinbosar bo'la oladi va ayni damda ham Garetning o'rnini bildirmaydi. Shuni ham alohida ta'kidlash kerakki, Beyl hali uzoq vaqt yuqori saviyada o'yin ko'rsata oladi, Zidan esa kerak vaziyatda uni Asensio bilan almashtirishi mumkin. Agar shunday harakat qilaversa, Asensio Beyl faoliyatini tugatgunga qadar uning darajasiga chiqib oladi.
RONALDU — VASKES. Portugaliyalik futbolchi Krishtianuning ham davri tugab boryapti. Sababi, ayni damda u 32 yoshda va jismoniy imkoniyatlari oldingidek emas. Bu holat, ayniqsa, joriy mavsumda yaqqol sezilmoqda. Ronaldu doimgidek Ispaniya chempionatida to'purarlik uchun kurashayotgani yo'q, «Oltin butsa»ga intilmayapti, to'purarlik uchun ham ilgarigidek shijoat bilan harakat qilmayapti. Bu shuni anglatadiki, yana ko'pi bilan ikki-uch yildan keyin «Real»ga yangi Ronaldu kerak bo'ladi. Quvonarlisi, ayni damda Zidanning yana bir jangchisi — Lukas Vaskes tajriba to'plab bormoqda. «Real»ga 2007 yilda, 16 yoshida kelib qo'shilgan futbolchi (dastlab «Real Kastilya» safida o'ynagan) ayni damda nimalarga qodirligini isbotlashda davom etyapti. Vaskesning Ronaldu bilan o'xshash jihatlaridan biri — tezkorligi. Vaskes maydonga tushgan o'yinlarida qanotdan tezkorlik bilan raqib jarima maydonchasiga yorib kirishga harakat qiladi, raqiblarini aldashga urinadi va ko'p hollarda buni uddalaydi, qolaversa, xuddi Ronaldu kabi vaziyat tug'ilganda ikkilanmasdan zarba yo'llaydi. To'g'ri, ayni damda Lukas Ronaldu kabi o'ynay olmasligi tayin, chunki etarlicha tajribasi yo'q, buning uchun Zayniddin Zidan unga ko'proq o'yin amaliyoti berishi kerak. Bu esa Vaskesning o'ziga bog'liq. Agar Lukas maydonga tushgan o'yinlarida samarali harakatlari bilan ajralib tursa, bosh murabbiy unga ko'proq imkoniyat berishi tayin. Yaqinda 26 yoshni qarshi oladigan futbolchi o'z ustida ko'proq ishlasa, yaqin yillarda «Real»ni Krishtianu Ronalduga bo'lgan ehtiyojdan xalos qilishi mumkin. Bu esa «qirollik klubi» uchun muhim omil hisoblanadi.BENZEMA — MORATA. Aslida, ispaniyalik hujumchi Alvaro Morata frantsiyalik Karim Benzemadan yaxshiroq harakat qiladi. Texnika, dribling, gol urish samaradorligi borasida Benzemadan ustun. Biroq negadir Zayniddin Zidan asosiy tarkibda ko'proq Karimni tushiradi. Ehtimol, toki Morata klubga tajriba to'plab qaytib kelguniga qadar jamoaga foyda keltirgan Benzemani shunchaki zaxiraga mixlab qo'yishni istamas. Balki, hozirda bir qator etakchi klublar sotib olishni mo'ljallayotgan hujumchini yaxshigina narxga pullamoqchidir. Chunki agar Benzemani zaxiraga o'tqazib qo'ysa, tabiiyki, o'yin amaliyoti kamayadi va bu boshqa klublarning Benzemaga bo'lgan qiziqishini susaytirishi mumkin. Nima bo'lganda ham, Morata Benzemaning o'rnini bosish bilan birga undan ustunroq ham harakat qiladi. Ayniqsa, Alvaroning «Yuventus»da ko'rsatgan o'yinlari ishqibozlarning es-hushini o'g'irlab qo'ydi. Shuningdek, Morataning Evropa Chempionlar ligasi doirasida kechgan o'yinda «Bavariya» darvozasiga uyushtirgan hujumini bir eslang! Xullas, Morata ayni damda asosiy tarkibda o'ynashga tayyor. Benzemadan farqli ravishda unda isyonkorlik, kurashuvchanlik kuchliroq, yaratuvchanlik bor. Bu esa futbol tobora rivojlanib, har bir jamoa o'yinini kuchaytirib borayotgan bir davrda hujumchi uchun muhim jihat hisoblanadi. Bundan tashqari, «Real»da Mariano Dias ismli yana bir yosh hujumchi borki, u ham kelajakda yaxshi o'yinchi bo'lib etishishi mumkin. ASOSIY TARKIB QANDAY BO'LIShI KERAK? DAVOMI
— deya xabar beradi uff.uz nashri.