«Liverpul» a'zosi Lukas Leyva klub safida uzoq yillardan beri faoliyatini davom ettirib kelmoqda. Kecha uning «Liverpul»ga kelganiga roppa-rosa 10 yil bo'ldi. Shu munosabat bilan klub rasmiy sayti futbolchining klubda o'tkazayotgan faoliyatiga minnatdorchilik bildirgan holda, 21 raqam egasi haqida 21 faktni havola etdi. - Lukas Leyva «Liverpul»  libosida kubok bahslarida 99 bor maydonga tushgan. Shulardan 18 tasi Angliya Kubogi, 24 tasi Angliya Liga Kubogi va qolgan 57 tasi evrokuboklarga to'g'ri keladi. - Braziliyalik futbolchi eng ko'p - «Chelsi» (19 bor) va «Everton» (17 bor) ga qarshi baxslarda maydonga tushgan. - Futbolchining hisobida raqiblar darvozasiga kiritilgan 7 gol mavjud. Gollarning uchtasi evrokuboklar, ikkitasi Angliya Kubogi va bittadan Liga Kubogi hamda Premer-liga bahslarida kiritilgan. - Yarim himoyachi Premer-liga doirasidagi yagona golini 2009 yilning 3 may kuni «Nyukasl» darvozasiga kiritgan. Leyva raqib darvozasini maydonga tushganidan 8 daqiqa o'tib, ya'ni 87 daqiqada ishg'ol qilgan. - Angliya Kubogi doirasida «Plimut» darvozasiga urilgan gol, Lukasning klub safidagi 200 o'yinlik golsiz seriyasiga barham berdi. - Lukas jamoani 14 bor sardor sifatida maydonga boshlab tushgan. Shulardan sakkiztasi o'tgan mavsum, beshtasi ushbu mavsumda sodir bo'ldi. - U «Liverpul»dagi faoliyati davomida 120 nafar futbolchi bilan bir jamoada to'p surishga muvaffaq bo'lgan. - Lukas uchun eng muvaffaqiyatli mavsum 2009/2010 yilgi mavsumda amalga oshgan. U o'shanda klub libosida 50 ta o'yinda maydonga tushgan va ularning 46 tasini asosiy tarkibda boshlagan. - Leyva samaradorlik bo'yicha eng yuqori natija qayd etgan mavsum - 2008/2009 yillar oralig'ida bo'lgan. U o'shanda 3 gol kiritgan. - Bugunga qadar braziliyalik yarim himoyachi umumiy hisobda 17 323 daqiqa maydonda harakatlangan. Faqat 9 futbolchigina Premer-liga doirasida undan ko'p daqiqa maydonda harakatlangan. - Shuningdek, Leyva ikki bora zahiradan maydonga tushib, gol kiritishga erishgan . 2009 yil «Nyukasl» va 2010 yil «Styaua» posbonlari futbolchining zarbalari qarshisida ojiz qolishgan. - Lukas ikki marta maydonni qizil kartochka tufayli erta tark etgan. 2009 yil Angliya Kubogi doirasida «Everton» hamda 2010 yil «Stok Siti»ga qarshi baxslarda raqibga ishlatgan qo'polliklari tufayli jamoadoshlaridan vaqtliroq kiyinish xonasiga yo'l olgan. - Penaltilar seriyasida to'rt bor ishtirok etgan Lukas, shulardan uchtasida gol kiritgan. - Futbolchi «qizillar» safidagi faoliyati davomida besh murabbiy qo'l ostida faoliyat olib borgan. Bular Rafael Benites, Roj Hojson, Kenni Dalglish, Brendan Rojers va Yurgen Klopp. Bu borada faqatgina Jeymi Karrager undan ko'p murabbiylar qo'l ostida o'ynagan. - Leyva «Liverpul» tarixida 21 raqam ostida eng ko'p o'yin o'tkazgan futbolchidir. - Braziliyalik futbolchi Evropa Ligasi/UEFA Kubogi baxslarida 30 dan oshiq baxslarda maydonga tushgan 9 futbolchining biridir. - Lukas Premer-liga doirasida boshqa mamlakat vakili bo'lib, eng ko'p o'yin o'tkazgan futbolchilar orasida 245 bahs bilan oltinchi o'rinda bormoqda. - Futbolchi klub safidagi o'z debyutini 2007 yil Chempionlar Ligasi saralash baxsida «Tuluza»ga qarshi bahsda nishonlagan. U o'shanda Muhammad Sissoko o'rniga zahiradan maydonga tushgan. - 2008 yil Leyva Braziliya terma jamoasi bilan Olimpiada o'yinlarining bronza medallariga sazovor bo'lgan. Yarim final doirasida Argentina bilan bo'lgan o'yinda Xaver Maskeranoga ishlatgan qo'pollik sabab, uchinchi o'rin uchun bahsni o'tkazib yuborgan. - U Fabio Aureliodan keyin «Liverpul» safiga kelib qo'shilgan ikkinchi braziliyalik futbolchidir. - Leyva klubdagi debyut golini 2008 yilning yanvarida Angliya Kubogi doirasida "Havant  Uoterluvil" darvozasiga kiritgan. Nodirbek Mamatqulov tayyorladi.
— deya xabar beradi uff.uz nashri.