Madridning «Atletiko» klubi bugun anchagina shov-shuv ko'targan va unchalik mashhur bo'lmagan futbolchilar bilan yaxshigina natijalar qayd etib kelayotgan jamoa hisoblanadi. Eng ahamiyatlisi, bir necha yil oldin porlab chiqqan klub bu tasodif emasligini isbotladi. Chunki «Atletiko» har yili Ispaniya chempionati va xalqaro musobaqalarda g'oliblikka da'vogar sifatida e'tirof etilib kelmoqda va shunga mos ravishda kerakli natijalarni ham qayd etmoqda. Quyida jamoaning bunday omadli natijalarga erishishiga sabab bo'lgan omillarga to'xtalib o'tamiz.
ASOSIYSI — JAMOAVIY O'YIN
Diego Simeone Madrid klubini boshqarib kelayotganidan beri jamoa hali biror-bir futbolchiga suyanib qolgani yo'q. Aksincha, ko'plab futbolchilarni yulduzga aylantirdi va boshqa jamoalarga sotib, yaxshigina pul ishladi. Fernando Torres, Radamel Falkao, Diego Kosta — bu ro'yxatni istagancha davom ettirish mumkin. Eng muhimi, Fernando Torres ketganidan keyin hujum chizig'i kuchsizlanib qolgani yo'q, vaholanki, Torres o'shanda jamoaning eng muhim o'yinchilaridan biri edi. Falkaoning sotilishi ham o'yin sifatiga ta'sir ko'rsatmadi, darhol Diego Kosta porlab chiqdi. Kosta sotilganidan keyin esa yana boshqa hujumchilar bo'y ko'rsatdi. Ayni damda Saul bo'lajak yulduz sifatida e'tirof etilmoqda. Jekson Martinesning sotib olinishi «Atletiko»ning an'analaridan cheklanishini anglatgandek bo'lgandi, ammo klub rahbariyati Martinesni Xitoy klublaridan biriga pullab yubordi. Demak, «Atletiko» an'anasini o'zgartirmaydigan ko'rinadi.
OMADI YuRIShMAGAN MUSOFIRLAR
Shu o'rinda yana bir jihatni alohida ta'kidlash kerak, «Atletiko»da yulduz bo'lib, o'zini ancha narsaga qodirman, deya hisoblay boshlagan futbolchilar boshqa klublarga o'tganidan keyin deyarli yo'q bo'lib ketishdi. Xususan, Fernando Torres Madrid jamoasidan keyin bir qancha klublarda o'ynab ko'rdi, ammo na «Liverpul»da va na boshqa klubda biror narsani qoyillata oldi. Oxir-oqibat yana «Atletiko»ga qaytib keldi. Eng qizig'i, u Madridga qaytganidan keyin yana oldingi isyonkor Torresni eslata boshladi. Radamel Falkao ham xuddi shunday qismatga duchor bo'ldi. «Monako», «Manchester Yunayted» va «Chelsi» kabi jamoalarda to'p surgan hujumchi shunchalik nursiz o'yin ko'rsatdiki, bir paytlar «Atletiko» safida Evropa ligasida «Atletik Bilbao» darvozasiga ikkita ajoyib gol kiritgan hujumchini hamma sog'ina boshladi. Aynan o'sha o'yinlari uchun Falkaoni anchagina pulga sotib olgan «Monako» esa endi hech narsaga yaramay qolgan futbolchidan qutula olmay halak. Diego Kosta ham ayni damda klubini o'zgartirish niyatida. To'g'ri, u Falkao yoki Torresdek omadsizlikka uchramadi, ammo «Chelsi» klubi uning o'yinidan qoniqish hosil qilayotgani yo'q.  DAVOMI
— deya xabar beradi uff.uz nashri.