Rossiyalik kasbdoshlarimiz «Spartak» (Moskva)ning joriy mavsumdagi muvaffaqiyatlariga alohida yondashmoqdalar. Zero, rus futbolining yangi davri boshlanish qismida chinakamiga «gegemon»lik qilgan bu klub mamlakat chempionatida oxirgi marta 2001 yili zafar quchgani bo'yicha taxtga yaqinlasholmayotgandi. Eslasangiz, o'sha oxirgi «oltin» mavsumning birinchi qismida jamoa tarkibida hamyurtimiz Ja'far Irismetov ham to'p surgandi. Xullas, «SE» nashri 27-tur o'yinlari arafasida «Spartak»ning hozirgi natijalari yuzasidan sobiq hujumchimiz bilan  maxsus suhbat uyushtirdi. - «Spartak» chempionmi? - Ha va bu katta bayram. Hozirdan ko'pchilik qo'ng'iroq qilib, meni ham tabriklayapti. Darhaqiqat, «Spartak» bu yil ancha quvontirdi. Jamoadan ketgan bo'lsamda, doimo u bilan qandaydir bog'liqlikni his qilganman. To'g'ri, Moskvadagi faoliyatim uzoqqa cho'zilmagan, ammo yorqin xotiralar qolgan. Keyinchalik qaerda o'ynamayin, «Spartak» muxlislari hamisha meni eslab, iliq gaplarni aytardilar. Ayrimlar bilan haligacha yozishib turaman, kimlargadir futbolka jo'natganman. - «Spartak» nima uchun 16 yil davomida chempion bo'lolmadiyu, bu ishni aynan joriy yil uddalayapti? - Intizom o'rnatildi va himoya mus­tahkamlandi. «Spartak» hamisha to'p bilan o'ynashga moyil klub sifatida gavdalangan. Karrera esa himoyani kuchaytirdi. Natijalarga qarang, 1:0, 2:0... Italyanlar taktikasi shunaqa: 3 ochko bor va bu yaxshi. Eng muhimi, hozirgi «Spartak»da «Bir kishi hamma uchun, hamma bir kishi uchun» maqoli amalda. Buni O'zbekis­tonda turib ham, sezish mumkin. - «Spartak» o'yinlarini nechog'li kuzatdingiz? - Imkoni boricha. Alenichev ishini kuzatish qiziqarli bo'lgandi. Lekin u biroz muloyimroq uslubga tayandi. Deylik, Alenichevga Karrera olib kirgan jamoaviy mas'uliyat ruhi etishmadi. - Xuddi siz o'ynagan vaqtdagi kabi-mi? - O'sha payt Romantsev ishlagan va shuning o'zi katta gap. To'g'risi, biz jamoada o'zaro do'st bo'lmaganmiz. Yigitlar guruhlarga ajralib qolishgandi. Faqatgina murabbiy obro'si barchasini bir maromda ushlab turardi. Ammo baza tashqarisida birdamlik sezilmasdi. Menimcha, hozirgi «Spartak»da umumiy kayfiyat 2001 yilgi jamoanikiga nisbatan olganda, ancha do'stona. - Xo'sh, «Spartak»-2001 qanday edi? - Men uchun yopiq. Faxriylarning o'z brigadasi shakllangangandi - Titov, Parfyonov, Pisarev... Men esa ko'proq yosh futbolchilar bilan muloqotda bo'lardim. To'g'ri, yoshi kattalardan Baranov va Filimonovning yaxshi munosabatini his etganman. Hattoki, mashg'ulotlarda ham bir-biriga talpinish sezilmasdi. Ba'zida o'yinni muhokama qiladigan kishi topilmasdi. Pisarev o'z intervyusida mening o'sishimga yordam berayotganini ta'kidlagandi. Aslida u mutlaqo befarq edi. Harqalay, mashg'ulotlarda qandaydir qo'llab-quvvatlanishni his qilgan emasman. - Oyoqqa tepishardimi? - Yo'q, bu masalada muammo bo'lmagan. Ya'ni atayin tepishni ko'rmaganman. Maydonda badjahl ekanligi bilan ajralib turgan o'sha Kovtun ham hayotda ancha muloyim inson. Umuman, yigitlar qo'pollikka moyil emasdilar. Chunki «Spartak» texnik o'yin ko'rsatardi. - Unda asosiy muammo nima edi? - Deylik, men bilan yana biror futbolchi ochiq zonaga chiqsa, albatta, unga «pas» berishardi. Yugurasan, ochilasan, to'p olmaysan. Londonda «Arsenal»ga qarshi kechgan o'yin tanaffusida hattoki, Romantsev jazavaga tushgandi: «Nima uchun unga to'p bermaysizlar?». O'shanda gap nimadaligini tushunmaganman, ammo vaqt o'tishi bilan barchasini angladim. Har holda, O'zbekistondan borgan begona yigit edim. Hech kimni bilmasdim, kompaniyalarga qo'shilolmasdim. Lekin bunga e'tibor bermay, jim ishlayverardim. Aslida biroz keskinroq harakatlanishim talab etilgan ekan... - Lekin sizga imkon berilgan: asosiy tarkibda maydonga tushardingiz, hattoki, ChLda ham... - Bu borada bahslashmayman. Lekin nechta uchrashuvda oxirigacha o'ynatishgan? Sanoqli. Hozir legionerlarga yillar davomida imkon berishadi. - Myunxendagi o'yin oldidan Romantsev qanday ko'rsatma berganini eslay olasizmi? DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.