Muxlislik har kimning ham qo'lidan keladi, ammo bir jamoaga butun umrini bag'ishlash hammaga ham nasib etavermaydi. Bugungi qahramonimiz esa to'qson yillik umrini bir klubga bag'ishlagan fidoyi inson. Eng hayratlanarlisi, uning sevimli klubi — «Fodja» ko'p mavsumni Italiya chempionatining uchinchi divizonida o'tkazgan. Italiya A seriyasida o'ynash haqida esa gap ham bo'lishi mumkin emas. Odamlar orasida Chichchio buvi nomi bilan mashhur bu inson muxlislik borasida barchaga ibrat bo'la oladi. JILOVLANMAGAN ShIJOAT 1937 yil. Yozgi ta'tilda Franchesko Maljeri kun tartibiga qat'iy amal qiladi. Ertalab soat oltida uyg'onib, fermadagi ishlarini bitiradi, tushlik qiladi. Shundan so'ng kechgacha bekor. Keyin esa kechqurun Sant-Agata-di-Pulya shaharchasiga otlanadi. Bundan oldin esa o'rtog'iga yuzlanadi: — Chichi, biz Fodjaga borishimiz kerak, axir bugun futbol! Keyin do'stining transportga chiqish uchun puli yo'qligi haqidagi gapni eshitib, hayron qoladi. — Bu nima deganing? Birov senga transportga chiqamiz dedimi? Velosipedda borib kelamiz. Do'stlar bir-biri bilan hazillashgancha Francheskoning usta amakisinikiga borishadi. Buni qarangki, Francheskoning amakisi endigina mijozlardan birining velosipedini ta'mirdan chiqargan ekan. Ular yo'lga tushishadi. Yigitlar Fodjaga etib borish uchun naq 54 kilometr yo'l bosib o'tishadi. O'shanda «Fodja» klubi 3:0 hisobida g'alaba qozonadi, lekin Chichchio buvi qaysi hujumchilar gol urganini eslay olmaydi. Ammo u boshqa bir voqeani yaxshigina xotirlaydi — o'shanda og'aynilar velosipedni orqaga haydayman deb shinani teshib qo'yishgan, oqibatda uyga piyoda, ustiga-ustak, yaroqsiz holga kelib qolgan, og'irgina velosipedni elkalariga ko'tarib qaytishga majbur bo'lishgan. Jussasi kichik va o'ta nimjon Franchesko uyga ertalab soat to'rtda kirib kelgan. Axir 54 kilometr yo'lni velosiped ko'tarib bosib o'tishning o'zi bo'ladimi? Tongda esa yigitlar velosipedni Francheskoning amakisiga tegishli bo'lgan ustaxonaga yashirincha qo'yib qo'yishadi. «Amakimning juda jahli chiqqandi o'shanda. Undan rosa gap eshitganmiz. Ammo sayohatimiz bunga arzirdi. Aynan o'sha voqeadan keyin «Fodja» klubi va futbolga bo'lgan mehrim ortgan. Futbol men uchun birinchi raqamli sport turiga aylangan», deya xotirlaydi Chichchio buvi. DAHShATLI URUSh ISKANJASIDA Tez orada ikkinchi jahon urushi boshlanadi. Yosh Franchesko esa Shimoliy Afrikaga yo'l oladi. 1942 yilning kuzida u El-Alameyn jangida qatnashadi. O'shanda Buyuk Britaniya va sobiq ittifoq qo'shinlari Italiya hamda Germaniya askarlariga qarshi jang olib borgandi. Franchesko ingliz qo'shinlari tomonidan asirga olinadi va Shotlandiyaga yuboriladi. U erda esa fermada ishlab, qo'shinni oziq-ovqat bilan ta'minlaydi. «HAYoTIMNI FUTBOLSIZ TASAVVUR QILA OLMAYMAN» 1945 yilda Maljeri Italiyaga qaytadi va yana birinchi bo'lib Fodjaga tashrif buyuradi. U bu paytda anchagina o'yinni o'tkazib yuborgan, u muxlislik qiladigan klub Italiya chempionatining eng o'rtamiyona klublari ro'yxatidan ham tushib ketgandi. «Fodja» 21 yildan beri Italiya A seriyasida o'ynash huquqini qo'lga kirita olmaydi, ammo bu Chichchio buvini zarracha xavotirga solmaydi, o'g'li Lorentso bilan birga fermadagi ishlarini tugatgach, albatta, sevimli klubining o'yinini tomosha qilgani boradi, buning uchun qancha masofani bosib o'tishining umuman farqi yo'q, u har qanday qiyinchilikni bardosh bilan engib o'tadi. Har hafta qariya eski velosipedini minib, yo'lga tushadi. «Fodja» klubining o'yiniga etib borsa bas, unga boshqasi muhim emas. «Fodja»ning o'yinini ko'rish uchun qancha yo'l bosib o'tasiz, deysizmi? Yuz, ming, balki, million kilometrdir. Men hech qachon yo'lni hisoblamaganman. Bilganim shuki, men butun Italiyani aylanaman, Kuneodan Agrijentoning shimoligacha va janubigacha sayohat qilaman. Xullas, klubim qaerda o'ynasa, men o'sha erdaman. Futbol — bu ona vatanimni yaxshiroq his qilish va uni yorqinroq ko'rishning eng yaxshi usuli. Men hayotimni «Fodja»siz tasavvur qila olmayman», deya ta'kidlaydi Franchesko. «DUNYo RIVOJLANISh PALLASIDA» Maljeri klubning afsonaviy futbolchisi Zeman hamda «Napoli»ga o'tib ketgan Lorentso Insinening ashaddiy muxlisi. Shuning uchun ham aksariyat o'yinlarga shu ikki futbolchining surati tushirilgan futbolkalarda tashrif buyuradi. «Men bor pulimni o'yin uchun chipta sotib olishga va yo'l xarajatlariga sarflayman. Ammo bu meni tashvishlantirmaydi. Tushlik uchun 2 evroga ichimlik va 5 evroga oddiygina buterbrod sotib olaman. Menga shu ham etadi, chunki Davomi
— deya xabar beradi uff.uz nashri.