Kecha Ozarbayjon poytaxtida davom etayotgan IV “Islom birdamlik o'yinlari”ning 3-kuni delegatsiyamiz a'zolari 4 ta oltin, 3 ta kumush, 6 ta bronza jami 13 ta medal qo'lga kiritishdi. Xabar berib o'tganimizdek, bir kun avval sportchilarimiz tomonidan 8 ta medal jamg'arilgandi. Demak, dastlabki 3 kun natijasiga ko'ra O'zbekiston delegatsiyasi a'zolari umumiy 21 ta medal bilan Ozarbayjon va Turkiya terma jamoalaridan so'ng kuchli uchlikka kirib olishdi.
Karatechimiz Sadriddin Saymatovdan so'ng delegatsiyamiz hisobiga ikkinchi oltinni dzyudo bo'yicha ayollar o'rtasida -70 kg. vazn toifasida kurash olib borgan Gulnoza Matniyozova keltirdi. Gulnoza hal qiluvchi final jangida turkiyalik Sukran Bakachak ustidan zafar quchib shohsupaning eng yuqorisidan o'rin egalladi.
Shundan so'ng badiiy gimnastikachi qizlarimizning benefisi boshlandi. Yakkalik bahslari yakuniga ko'ra Anastasiya Serdyukova va Sabina Tashkenbaevalar koptok, xalqa, bulava va lenta bo'yicha o'tkazilgan finallarning barchasida sovrindorlar orasiga kira olishdi.
Jumladan Serdyukova bulavada bajarilgan mashqlar yakuniga ko'ra eng yaxshi natijani qayd etdi va delegatsiyamiz hisobiga uchinchi oltin medalni taqdim etdi. Anastasiya shuningdek xalqa va koptokda bajarilgan mashqlarda ham muvaffaqiyatli ishtirok etib ikkita kumush medaliga sazovor bo'ldi.
Sabina Tashkenbaeva esa bulava va lentada o'tkazilgan mashqlarda sovrindorlar safidan joy oldi. Hamyurtimiz har ikkala yo'nalishda bronza medallariga ega chiqdi.
To'rtinchi va beshinchi oltinni para-dzyudochilarimiz keltirishdi. Vazni 90 kilogrammgacha bo'lgan polvonlar bahsida Shuhrat Boboev finalga qadar barcha raqiblarini taslim etib, hal qiluvchi bahsda mezbonlar vakili R. Safarovning ham kuragini erga tekkizdi va oltin medalga sazovor bo'ldi.
100 kilogrammdan yuqori vaznga ega polvonlar bellashuvida esa Shirin Sharipov Bokuda beshinchi marta madhiyamiz yangrashiga sababchi bo'ldi. U finalda eronlik Musanejotkarm ustidan g'alaba qozonib, delegatsiyamiz hisobiga beshinchi oltin medalni qo'shib qo'ydi. Yana bir para-dzyudochimiz Feruz Sayidov esa final jangida ozarbayjonlik N. Talibovga imkoniyatni boy berib kumush medal bilan cheklandi. Ammo shunga qaramay Feruz musobaqani yuqori saviyada o'tkazganligini tan olish lozim. Faqatgina hal qiluvchi bahsda unga biroz omad etishmadi. Aks holda kechaning o'zida oltinlarimiz soni 6 taga etishi turgan gap edi.
Shuningdek, og'ir atletika bo'yicha xotin-qizlar o'rtasida 58 kg. vazn toifasida ishtirok etgan Muattar Nabieva, dzyudo bo'yicha 81 kg. vazn toifasida kurash olib borgan Davlatbek Bobonov va 100 kg ziyod polvonlar bahsida Bekmurod Oltiboev, karate bo'yicha 84 kg. vaznli sportchilar bellashuvida Abdulaziz Atabaevlar bronza medaliga sazovor bo'lishdi.
Demak ayni vaqtga qadar quyidagi sportchilarimiz IV “Islom birdamlik o'yinlarida medallarga sazovor bo'lishdi:
Sadriddin Saymatov – (karate, -60 kg.) - oltin
Gulnoza Matniyozova – (dyuzdo, -70 kg.) - oltin
Anastasiya Serdyukova (badiiy gimnastika) - oltin
Shuhrat Boboev (para-dzyudo, -90 kg.) - oltin
Shirin Sharipov (para-dzyudo, +100 kg.) - oltin
Badiiy gimnastika (terma jamoa) - kumush
Anastasiya Serdyukova (badiiy gimnastika) - kumush (2 ta)
Feruz Sayidov (para-dzyudo, -73 kg.) - kumush
Saidxon Sayfuddinov (o'q otish) - bronza
Sakina Mamedova (o'q otish) - bronza
Diyorbek O'rozboev (dzyudo, -60 kg.) - bronza
Gulruh Rahimova (para-dzyudo, -70 kg.) - bronza
Dostonbek Otabolaev (karate, 75 kg.) - bronza
Barno Mirzaeva (karate, -61 kg.) - bronza
Abdulaziz Atabaev (karate, -84 kg.) - bronza
Sabina Tashkenbaeva (badiiy gimnastika) - bronza (2 ta)
Muattar Nabieva (og'ir atletika, -58 kg.) - bronza
Davlatbek Bobonov (dzyudo, -81 kg.) - bronza
Bekmurod Oltiboev (dzyudo, +100 kg.) - bronza
Har kuni musobaqalar tugagach O'zbekiston delegatsiyasi shtabida o'ziga hos yig'ilish o'tkazilib, unda kun davomida muvaffaqiyatga erishgan sportchilarni delegatsiyamiz nomidan O'zbekiston Milliy olimpiya qo'mitasi Bosh kotibi Oybek Kasimov qutlamoqda.
Bu ham o'z navbatida sportchilar kuchiga kuch qo'shishi, ularni yanada jipslashtirishi, qolaversa boshqa sportchilarimizga ham ma'naviy jihatdan stimul bo'lib xizmat qilishi shubhasiz. Musobaqalar davom etadi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.