Butunjahon boks seriyalari (WSB) VII mavsum chorak final ilk uchrashuvida “Uzbek Tigers” Samarqandda amaldagi chempion “Cuba Domadores” bokschilarini qabul qilib, 3:2 hisobida g'alaba qozondi.
Endi bu jamoalar 19 may kuni Kubada javob uchrashuvini o'tkazadi. Kubaliklar to'sig'idan o'tish uchun “Uzbek Tigers" rahbariyati bugungi kunda o'z vaznida eng kuchli bo'lgan bokschilarni tanladi.
O'z vaqtida jahon chempionatlarida kumush va bronza medallarga ega bo'lgan Jasur Latipov 52 kilogramm vazn toifasida hamon eng kuchli bokschi ekanini namoyish eta oldi. Asli bu vaznda "o'zbek yo'lbarslari" tarkibida olimpiya chempioni Shahobiddin Zoirov jang qilishi lozim edi. Biroq, Shahobiddin Rio Olimpiadasidan keyin katta ringlarda ko'rinish bergani yo'q.
Uning o'rniga terma jamoaga jalb qilingan Jasurbek Latipov esa Osiyo chempionatida nimalarga qodirligini ko'rsatdi va natijada “Uzbek Tigers" tarkibiga kiritildi. Kubadagi uchrashuv Jasurbek uchun o'ta muhim ahamiyat kasb etadi. Jasurbek bu tarkibda eng tajribali bokschidir.
60 kilogramm vazn toifasida ham o'zgarish bo'ldi. O'zbek bokschilari o'rtasida bu vazn etakchisi bo'lgan Elnur Abduraimov yangi mavsumni 64 kilogramm vaznda boshlagandi. "O'zbek yo'lbarslari" tarkibida ikkita jangda qatnashib, g'alabaga erishgan Elnur og'irligini biroz pasaytirdi va o'zi jahon va Osiyo chempionatida sovrindor bo'lgan vaznga qaytdi. Buning samarasini Toshkentdagi qit'a chempionatida oltin medal bilan namoyish qildi.
Elnurning o'zi vazn borasidagi o'zgarishlarni SPORTS.uz portaliga quyidagicha izohladi.
- Aslida mavsumni 64 kilogramm vazn toifasida boshlagan bo'lsam-da, keyinchalik yana o'z vaznimga qaytishim aniq edi, - dedi Elnur Abduraimov. - Birinchidan men yangi vaznda o'z imkoniyatlarimni sinab ko'rdim. Ikkinchidan bu murabbiylarning taktikasi edi.
Bugungi kunda yurtimizda 69 kilogramm vaznning eng etakchi bokschisi Shahram G'iyosovdir. Shahramning hujumkor va shiddatli jang usuli muxlislarga juda yoqishi tayin. Faqat Shahram o'z kuchiga va imkoniyatlariga bo'lgan ishonchni yo'qotmasa, har qanday raqibni er tishlatishga qodir bokschi.
81 kilogramm vazn toifasida Bektemir Meliqo'zievga teng keladigan bokschi nafaqat O'zbekistonda, balki Osiyoda ham yo'qligini bilib oldik. Aslida Bektemirning jang uslubi mukammal hisoblanadi. Uning har bir zarbasi beiz ketmaydi. Buni raqiblar ham yaxshi biladi. Bektemir har qanday raqibga qarshi jangda g'alaba qozonish yo'lini biladi. Buni O'zbekiston terma jamoasi va “Uzbek Tigers" janglarida ham isbotlab kelmoqda.
O'ta og'ir vazn toifasida Bahodir Jalolov ringga chiqadi. Bugungi kunda yurtimizda bu vaznda undan zo'ri yo'q. Lekin Bahodir hali juda yosh va jahon ringlarida uni qudrati hali tan olinmagan. Shunday bo'lsa-da, Bahodirning Osiyo chempionati finalida azaliy raqibi Qamshibek Konkabaevga qarshi o'tkazgan jangi bokschimizning salohiyatini ochib berdi. Agar Bahodir jangga har tomonlama tayyorlana olsa, har qanday raqibga etarlicha tashvish tug'dira oladi.
Ushbu ikki kuchli jamoaning Samarqandda o'tkazilgan uchrashuvida "o'zbek yo'lbarslari" engilmas sanalgan raqib bokschilari ustidan zafar quchishga muvaffaq bo'ldi. Ayniqsa, Isroil Madrimov jahon va Olimpiya o'yinlari chempioni Arlen Lopez bilan shunday jang o'tkazdiki, kubalik raqib hamyurtimizni g'alabasini o'zi ham tan oldi. Hasanboy Do'smatov esa jahon chempioni Yoxanis Argilagoga bundan buyon eng engil vazn taxti kimniki ekanini ko'rsatib qo'ydi.
Demak, kubaliklar jamoasi ham engilmas emas. Buyog'ini 19 may kuni bilib olamiz.
SPORTS.uz axborot portali muxlislar nomidan “Uzbek Tigers" jamoasiga g'alaba tilaydi!
— deya xabar beradi uff.uz nashri.