Ispaniya chempionatining qoldirilgan 21-turidan o'rin olgan «Selta» – «Real» uchrashuvi o'z nihoyasiga etdi. Unda1:4 hisobi qayd etilib, madridliklarning g'alabasi bilan tugadi. Uchrashuvning 10-daqiqasida Krishtiano Ronaldu Iskoning uzatmasidan so'ng  to'pni darvozaga joylab qo'ydi va jamoasini oldinga olib chiqdi. Goldan so'ng o'yin tashabbusi asta-sekin mezbonlar tomoniga o'tdi va «Selta» bo'lim oxirigacha ko'plab xavfli hujumlar uyushtirdi. Ayniqsa, vigoliklar klubi hujumisi Yago Aspas har bir vaziyatda faol bo'ldi. Ikkinchi bo'lim debyutida madridliklar qarshi hujumdan unumli foydalandilar. Maydon markazida to'pni qabul qilib olgan Isko sherigi Ronalduni raqib darvozaboni bilan birga-bir vaziyatga chiqarib berdi, Krishtiano esa darvozaning yaqin burchagini nishonga olishda adashmadi va o'yindagi dublini nishonladi. Uchrashuvning 62-daqiqasidan boshlab maydon egalari o'nta bo'lib qoldilar. Yago Aspas jarima maydonchasi ichida simulyatsiya ishlatgani uchun hakam tomonidan ikkinchi sariq kartochkaga loyiq ko'rildi va maydondan chetlatildi. Buning ustiga bosh hakam biroz o'tib, «Selta»ning yordamchi murabbiyini ham maydondan chetlatdi. Uchrashuvning 69-daqiqasida Isko maydon markazi yaqinida xatoga yo'l qo'ydi va «Selta» hujumchisi Gvidetti hisobni qisqartirishga erishdi. Biroq oradan bir daqiqa o'tib Karim Benzema Marseloning to'p uzatishidan so'ng oradagi farqni yana oshirishga erishdi. Toni Kroosning 88-daqiqadagi goli uchrashuvdagi oxirgichi bo'ldi. Shunday qilib, ushbu g'alabadan so'ng «Real» o'z ochkolari sonini 90 taga etkazib oldi va musoboqa jadvalida «Barselona»ni (87) quvib o'tdi. Ispaniya chempionati 21-tur Selta – Real Madrid 1:4  Gollar: 0:1 – 10 Ronaldu, 0:2 – 48 Ronaldu, 1:2 – 69 Gvidetti, 1:3 – 70 Benzema, 1:4 – 88 Kroos. Selta – Alvares, Kabral, Kastro, Ronkalya, Malo, Ernandes, Xosabed (Dias, 72), Sisto (Diop, 80), Vass, Gvidetti (Bovyu, 86), Aspas. Real Madrid – Navas, Marselo, Ramos, Danilo, Varan, Kroos, Modrich, Kazemiro (Kovachich, 71), Isko (Vaskes, 84), Benzema, Ronaldu (Asensio, 84). Ogohlantirishlar: Kazemiro (30), Aspas (38), Kastro (64), Gvidetti (66), Malo (73), Ernandes (85), Ramos (85). Chetlatish: Aspas (62).
— deya xabar beradi uff.uz nashri.