Joriy mavsum boshida «Buxoro» safini to'ldirgan Vladimir Baenko qisqa muddat ichida yangi jamoasiga moslasha oldi. Yaqinda FootBoom portali ko'hna shaharliklarning ukrainalik legionerini suhbatga tortib, uning O'zbekistondagi faoliyati bilan qiziqish barobarida, boshqa mavzulardagi savollariga ham javob olishdi. — «Buxoro» safiga qishda qo'shilgandingiz. Hozirga kelib bir qator uchrashuvlarda maydonga tushdingiz. Ancha moslashib oldingizmi? — Hammasi ko'ngildagidek. Meni bu erda iliq qabul qilib olishdi. Shu bois ham muammolar bo'lmadi. Shart-sharoitlardan to'la qoniqyapman. Murabbiyning talabi, mahalliy odatlar va o'yin ritmini tezda tushunib oldim. To'g'risini aytsam, moslashishim o'zim kutgandan ham tezroq amalga oshdi. — Iqlim sharoiti qiyinchilik tug'dirmayaptimi? — Yo'q. Kunlar endi isiy boshladi. Bunga qadar ob-havo xuddi Ukrainadagi kabi edi. — O'zbekiston va Ukraina futboli orasidagi tafovutni sezdingizmi? — Ha, albatta. Birinchi farqi, bu erda «Dinamo» va «Shaxtyor» kabi grandlar yo'q. Shuning uchun natijalarni oldindan taxmin qilib bo'lmaydi. Joriy mavsumdagi uchrashuvlar klublarning kuchlari deyarli teng ekanini ko'rsatmoqda. Raqib qaysi jamoa bo'lishidan qat'iy nazar, undan ochko olish mumkin. Har bir uchrashuv turnir jadvalidagi holatingizga jiddiy o'zgartirish kiritishi tayin. Aytaylik, ikkinchi o'rinda ketyapsiz. Qabul qilib olingan bittagina mag'lubiyat klubingizni etti yoki sakkizinchi o'ringa tushirib yuborishi hech gap emas. — O'yinlar tezligi qanday? — Bizning mamlakatdagi kabi tezkor, deya olmayman. Ammo aytaylik, Ukraina chempionatida «Stal»-«Zirka» uchrashuvida ham tezlik yuqori emas. Biroq «Shaxtyor»ning o'yiniga qarab taqqoslaydigan bo'lsak, ukrainlar bu borada ancha ustun. Umuman olganda esa, farq unchalik katta emas. — Ukraina futbolidagi kabi qo'polliklar O'zbekistonda ham kuzatiladimi? — Albatta, bu erda hakamlar aksariyat holatlarda hushtak chalishdan tiyilib, futbolchilarga o'ynash imkoniyatini taqdim etishadi. Qattiq va zich o'yinni ko'rmaysiz, ammo qo'polliklar etarli. Mabodo raqibni aldab o'tsangiz, u asabiylashadi va to'pni olib qo'yish ilinjida qo'pollik ishlatishga urinishi hech gap emas. — Sardorlik bog'ichiga qay tarzda ega bo'ldingiz? — Jamoada yig'ilish o'tkazilib, unda uch nafar sardor tanlab olindi. Ular orasida men ham bor edim. Ikki etakchi jarohat olganidan so'ng bog'ich menga tegdi. — Sardorlik qilish qiyinmi? — Unchalikmas. Odatda, ortiqcha hech nima qilmaysiz. — Endi hakamlar bilan ko'proq muloqot qilayotgandirsiz? — To'g'risini aytsam, hakamlar bilan ko'p gaplashish yaramaydi. Chunki ortiqcha tortishuv sariq kartochkaga olib keladi. Klubda esa ogohlantirish uchun jarima belgilangan. Shu bois ham keraksiz «sariq»lardan qochaman. Albatta, referidan jarima yoki qo'pollik borasida so'rashingiz mumkin. Lekin hakam shu zahoti vaziyatga oydinlik kiritadi, tortishish shart emas. Tilni tiygan ma'qul. Shunda qiziqqonlik oqibatida paydo bo'ladigan ortiqcha xarajatdan qutulasiz (kuladi). — Jarimalar haqida gapirdingiz. Ularni qanday holatlarda to'laysizlar? DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.