Braziliyalik o'tkir himoyachi ayni payt o'zini erta hisobdan chiqarib qo'yganlar bilan alohida hisoblashmoqda, go'yo. Alveshning «A» seriyasidagi faolligini qo'ya turaylik, uning ChL yarim finalida «Monako»ga qarshi kechgan ilk o'yinda 2ta golga assistentlik qilganiyu, javob bahsida ajoyib gol urganining o'ziyoq «Yuventus» bebaho ijrochiga ega bo'lganidan nishona. Ha, bugunga kelib, «Barselona»ning ushbu qanot himoyachisi masalasida qattiq yanglishgani to'la-to'kis o'z isbotini topdi. Aytish joiz, Dani ajoyib tarixga ega noyob futbolchi sanaladi. Qovun va piyoz etishtirish Dani Alvesh vaqtida erta azonda, soat 4da uyqudan turib, qo'liga ketmonsimon asbobni olgancha otasi va aka-ukalari bilan dalaga yo'l olardi. Ularning oilasi Juazeyrudan chamasi 30 kilometr uzoqlikdagi o'ziga xos tabiatga ega hududda istiqomat qilardi. Iqlimning o'ziga xosligi shuki, bu regionda yilning yarmida yomg'ir-jala sira tinmaydi, keyingi 6 oyda esa quyosh jaziramasiyu, qurg'oqchilik hukm suradi. Shu bois ham, bu erda qishloq xo'jaligi ishlari bilan shug'ullanish doimo katta tavakkalchilik hisoblangan. Ya'ni dehkonlar bir yil katta daromad olsalar, keyingisida hech vaqosiz qolishlari hech gap emas. Xullas, yosh Dani Alvesh qovun va piyoz dalasida javlon urgan bo'lsa, otasi etishtirilgan mahsulotni bozorda sotish bilan shug'ullangan. «Ha, hayotimiz og'ir edi, ammo doimo baxtiyorlikni his etardik,-deya xotirlaydi Dani yoshlik davrini. - Deylik uyimiz o'ta oddiy bo'lib, men beton karovotda uxlardim. Shunga qaramay, oilamiz ahil edi, hech narsadan nolimasdik. Chunki ota-onamiz etarlicha qayg'urishardi». Alvesh uchun daladagi ish chamasi soat 10gacha davom etardi. Birinchidan, u maktabga borishi kerak edi, ikkinchidan, bu vaqtga kelib, havo harorati 40 darajagacha ko'tarilardiki, dalada qolish shunchaki, imkonsiz sanalardi. Shunday tig'iz jadvalda futbol mashg'ulotiga faqat maktabdagi darslardan keyingina vaqt topilardi. Boz ustiga, Dani professional akademiya emas, sharoitlari haminqadar bo'lgan oddiy dargohda shug'ullanardi. Xususan, u erdagi maydon ustiga toshko'mir xokasi yotqizilgandi. Muhimi, bu holat yigitning ulkan maqsadlar sari qadam bosishiga xalaqit bermaydi. «Dani 6 yoshidan o'z suratlarini uyimiz devoriga yopishtira boshlagan va kelajakda mashhurlikka erishib, ko'pchilikka dastxat berishini ta'kidlardi. Akam doimo shuni xohlardi»,-degandi futbolchining ukalaridan biri. Avval kino, keyingina futbol To'g'ri, Alvesh o'sha vaqt sport orqali mashhurlikka erishishi haqida og'iz ham ochmagan. Chunonchi, san'atga ishtiyoqi balandroq edi va bu sohada tanilish imkoniyatini yuqoriroq baholagan. Harqalay, Dani avvaliga o'zini kino olamiga urgan. Misol uchun, Kanudus urushi haqida suratga olingan filmda hattoki, epizodik rol o'ynagan. Bu kartina Braziliya hukumati va Alveshning jonajon shtati - Baiyada yashovchi 30 ming aholi o'rtasidagi to'qnashuvlar (1896-1897 yillar voqeasi) asosida yaratilgan bo'lib, bo'lajak futbolchi bir kunlik suratga olish jarayonidagi ishtiroki uchun 1,5 dollar haq olgan. Bolakayda futbolga chinakamiga qiziqish keyinroq tug'ilgan. Danining otasi 30 yoshga to'lgach, mo''jazgina «Palmeyras de Salitra» klubiga asos soladi. 10 yoshar Dani jamoada eng kichik futbolchi bo'lsada (sheriklari ham, raqiblar ham undan ancha katta edilar), hududiy chempionatda barchani birdek hayratlantira boshlaydi. U o'sha vaqt vinger rolini bajarar yoki hujumchi ortida harakatlanardi. Ma'lum muddatdan so'ng yigitcha shaxsiy muxlislarga ega bo'ladi. Axir mittigina maktab o'quvchisining o'zidan katta bolalarni engilgina aldab o'tishlarini kuzatish maroqli edi. Shu tariqa Dani 13 yoshga to'lgach, «Baiya» akademiyaga ko'chib o'tadi. E'tiborlisi, u taklifga bitta shart evaziga rozi bo'ladi: «Ukamni ham akademiyaga qabul qilasizlar». O'z navbatida, ota-onasi ikkisiga alohida kvartira olib berib, ularni ogohlantirishadi: «Shart shuki, faqat to'p ortidan yugurish bilan cheklanmay, o'qishni ham davom ettirasizlar. Aks holda, ortga qaytasizlar». Dani bunga javoban hammasi joyida bo'lishiga va'da beradi, biroq o'z so'zi ustidan chiqolmaydi. Harqalay, onasi may oyida kollejga borib, o'g'lini topolmaydi. So'rab-surishtirganida esa, o'qituvchilar Danining fevraldan buyon darslarda qatnashmayotganini aytishadi. Natijada jiddiy tarbiyaviy suhbat bo'ladiki, Alvesh buni bir umr eslab qoladi. Yana 2 yildan so'ng Dani qattiqqo'l onasi sharafiga tatuirovka chizdiradi. O'ng qanot himoyasiga ixtisoslash jarayoni «Sevilya» 2003 yili hali 20 yoshga ham to'lmagan Dani Alveshni sotib oladi. «Baiya» uning uchun atigi 550 ming evro olgandi. Andalusiyaliklar oradan 5 yil o'tgach, braziliyalik himoyachini «Barselona»ga naq 64,5 baravar (!) qimmatiga pullashadi - 35,5 million evro. Zero, bu vaqtga kelib, Alvesh «o'ng qanot qiroli» maqomini olib ulgurgandi. Braziliyalik yigit agarda «Sevilya»ning o'sha paytdagi bosh murabbiyi Xoakin Kaparros bilan garov bog'lamaganida, ehtimol, bunchalik o'sishga erishmasmidi? Xullas, murabbiy qanot himoyachisi maydon markazidan o'tmasligi zarurligini ta'kidlayvergach, Dani bu fikrga qarshi chiqadi. «Nega? Futbol - bu himoya-hujum yoki hujum-himoya. Boshqa qoida yo'q, qandaydir cheklov ham. «Himoyaviy» atamasi nimani anglatadi? Bu hujumga qo'shilmaslik va dribling ishlatmaslikni bildiradimi? Jin ursin, bunaqada futbol juda zerikarli bo'lib qoladi-ku, shunday emasmi? Himoyachi hujumga hissa qo'shmasa, hujumchi esa ortga qaytmasa, futbolning ma'nosi nima? G'alaba qozonish? Buning uchun raqibdan ko'proq gol urish kerak - tamom» - Alvesh falsafasi shunday. Vaqt o'tishi bilan uning brazilcha qarashi sira o'zgarmadi. Misol uchun, Dani Ispaniya chempionatidagi samarali uzatmalari soni bo'yicha tan olingan pleymeykerlar - Mesut Ozil yoki Anxel di Mariyadan ham oldinda. Qarang, deyarli 34 yoshni urib qo'ygan Alvesh joriy mavsum hattoki, ChLda xavfli vaziyatni yuzaga keltirish masalasida etakchilik qilmoqda. «Yuventus» bosh murabbiyi Massimiliano Allegri esa ba'zan uning hujumga haddan ortiq darajada berilib ketishidan yurak ushlab o'tiradi. Muhimi, hech kim Dani himoyada bo'sh ekanligini ta'kidlay olmaydi. Misol uchun, u mavsum-2014|2015da to'pni olib qo'yish bo'yicha Serxio Buskets va Xaver Maskeranodan ham yaxshiroq ko'rsatkichga erishgandi: bitta o'yinda o'rtacha - 4,3 marta (Buskets - 3,7 marta va Maskerano - 3,6 marta). Dani «Barsa»da ayniqsa, Lionel Messi bilan yaxshi chiqishardi va bu borada maqtanishdan ham tiyilmaydi: «Jamoada Messining gol urishiga menchalik ko'p yordam bergan boshqa futbolchi topilmasa kerak. Leoning gol urishida eng ko'p assistentlik qilganim - fakt. Nafaqaga chiqsam, odamlar so'rashadi - «Kim eng buyuk futbolchi edi?» Javob - «Messi». Yana savol - «Unga kim ko'proq to'p uzatardi?» Javob - «Dani Alvesh». Sobiq xotini - shaxsiy agenti DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.