"Buxoro" - "Navbahor" uchrashuvidan so'ng tashkil etilgan matbuot anjumanida dastlab jamoamiz bosh murabbiyi Ilhom Mo'minjonov jurnalistlar savollariga javob berdi: - Ushbu uchrashuvga jiddiy tayyorgarlik ko'rgandik. Bahs og'ir o'tishini bilganmiz. Jangovor o'yin ko'rsatishgani uchun yigitlarga raxmat aytaman.
Ularga qiyin vaziyatdan chiqib ketishganiga tashakkur bildiraman. Shogirdlarim 100 foiz emas, 200 foiz kuchlari bilan o'ynashdi. Xabaringiz bor, hozirgi paytda "Buxoro" bilan ochkolarimiz teng. Musobaqa jadvalida 4-5 pog'onalarni band qilib turibmiz. "Navbahor" qo'pol o'ynamadi, agressiv futbol namoyish qildi. Futbolchilarimiz har bir o'yinda xuddi so'nggi bor maydonga tushayotgandek tushishadi. Joriy mavsumda oldimizga kuchli beshlikda chempionatni yakunlashni maqsad qilganmiz.
Shartnoma tuzilgan har bir o'yinchim bilan faxrlanishimni doimo ta'kidlab kelaman. Ular bilan yilning oxirigacha yaxshi natijalarga erishish uchun harakat qilamiz. Futbolda barcha g'alaba qozonishni istaydi. "Navbahor" ishtirokidagi o'yinlarni kuzatgan bo'lsangiz jamoamiz agressiv o'yin namoyish etganiga guvox bo'lasiz. Baqoevga bilan menga berilgan qizil kartochkaga to'xtaladigan bo'lsam, u bilan birga birga avval o'ynaganmiz, birga o'qiganmiz. Xissiyotlar futbol maydonida bo'ladi. Maydondan tashqarida biz o'rtoqmiz. Yo'lakda ro'y bergan xolat uchun hakamlar va nazoratchidan kechirim so'rayman. Keyingi o'yinlarda "Buxoro"ga omad tilab qolaman.
Hakamlar? "Qo'qon-1912"ga qarshi bahsda so'nggi daqiqalarda ko'rgandursiz nima bo'lganini? Yana bir bor aytaman, hakamlarga baxo bermayman. Har bir hakam xato qiladi. Buni tushunaman. Kovalenkodek referi ham bunga yo'l qo'ydi. Bu futbol. Murabbiylar va futbolchilar ham xato qilishadi. Darvozamizga belgilangan uchta penaltilardan birini Asilbek Amanov qaytargani uchun unga tashakkur bildiraman. Eng birinchi amalga oshirgan transferim ushbu darvozabon bo'lgan. U bilan "Paxtakor"dagi faoliyatida uch yil birga ishlaganman. Oybek Qilichevning maydondan chetlatilishini noto'g'ri qaror deb o'ylamayman. U raqibi bilan turtilib ketdi. Yuqorida aytib o'tganimdek barcha xatoga yo'l qo'yadi. Futbolchilar barchasi bir-biri bilan tanish. Ertaga albatta ular salom-alik qilishadi.
Matbuot anjumanining ikkinchi qismida "Buxoro" bosh murabbiyi Ulug'bek Baqoev qatnashdi: Ancha tomoshabop o'yin bo'lgan bo'lsada, biz hisobdan qoniqish hosil qilmadik. Bugun ikki ochkoni yo'qotdik.
- Uchinchi penalti nega Nagaev emas, Shog'ulomovga topshirildi?
- U o'ziga ishongan holda bizdan penaltini amalga oshirishga ruxsat oldi, biz bunga izn berdik. Lekin penalti bu lotoreya, buyuk futbolchilar ham penaltini noanik amalga oshirishlari mumkin. Shog'ulomovdan kelgusi o'yinda gol kutib qolaman.
- Bugun ikkala murabbiylar nega janjallashishdi?
- Bu holat futbolning bir bo'lagi. Biz Mo'minjonov bilan yaxshi munosabatdamiz. O'yin paytida har ikkala jamoa murabbiylari va futbolchilari qizishib ketishlari tabiiy hol. Bugun Jasur Hasanov ancha jiddiy jarohat oldi. Uning sog'ligi to'grisida aniq ma'lumotni qo'shimcha tekshirishlardan so'ng bilib olamiz.
— deya xabar beradi uff.uz nashri.