"Barselona" himoyachisi Jerar Pike zamonaviy ommaviy axborot vositalaridan ko'ngli qolganini aytdi. Himoyachi sportchilar haqida faqat haqiqatni xabar qiladigan OAV tashkil etmoqchi.
"Aksariyat nashrlar qanday ishlashini hozir tushuntiraman.
Paparatstsi rasmga tushiradi va unda siz politsiya bilan gaplashib turgan bo'lasiz. Keyin ular nimadir o'ylab topishadi va siz soatiga 190 kilometr tezlikda mashina boshqargan bo'lasiz. Keyin bu rasmni 1500 tacha turli gazeta va saytlarga sotishadi.
Ingliz nashrlari bu rasmni sotib olib, paparatstsilarga ishonadilar. Ular maqolani chop etishadi va hech narsani tekshirib ham o'tirishmaydi. Hammasi ko'proq muxlis jalb etish uchun qilinadi.
Sportchilarga zarar etkazishadi va hech kim buni o'zgartirish niyatida emas. Yaqin vaqtlar ichida men sportchilar uchun faqat haqiqatni so'zlaydigan nashr ochmoqchiman. Hammasi bo'g'zimga keldi", - deydi Pike.
Eslatib o'tamiz, ingliz matbuotida Pike Kataloniya politsiyasi tomonidan belgilangan tezlikni oshirgani uchun qo'lga olingani xabar qilingan edi.
— deya xabar beradi uff.uz nashri.