Ayni paytda mamlakatimizda ayollar futboli bo'yicha O'zbekiston chempionatining ikkinchi davra o'yinlari davom etmoqda. O'z tarixida ilk bor oliy ligada ishtirok etayotgan “Lokomotiv-W” qizlar jamoasi ikkinchi davrani omadsiz boshladi. Vohid Xolboev boshqaruvidagi jamoa hozircha oltita o'yin o'tkazib, shundan ikkitasida g'alaba qozondi va to'rtta bellashuvda imkoniyatni boy berdi. Jamoa mana shu oltita bellashuvda 6ta gol urib, o'z darvozasidan 33ta to'p o'tkazib yubordi. Albatta, o'tkazib yuborilgan gollar bo'yicha tahlil qiladigan bo'lsak, 33ta gol juda ko'p degani. Ammo “Lokomotiv”ning oliy ligada endi ishtirok etayotganini ham esdan chiqarmaslik lozim. Jamoa bosh murabbiyi Vohid Xolboevning aytishicha, bu yilgi mavsum “Lokomotiv-W” uchun sinov vazifasini o'tab bermoqda va aniq maqsadlar kelasi yildan qo'yiladi. “Men futbolchi qizlarga tablodagi hisobga e'tibor bermaslikni, faqat oxirigacha o'ynash kerakligini uqtirib kelyaptman, – deydi Vohid Xolboev. – Biz yangi tuzilgan jamoamiz, shunday ekan birdaniga kuchayib ketish oson emas. Sekin-asta biz ham kuchlilar qatoriga qo'shilamiz”. Ayni paytda “Loko” qizlari oliy liga turnir jadvalida 12 jamoa orasida 8-o'rinda borishyapti va buni har holda yaxshi natija desa bo'ladi. Qolaversa, turnir jadvalida “Buxoro”, “Neftchi”, “Sho'rtan-Ledi” va “To'maris”dan tepada ekanligining o'ziyoq “Loko-W”ning ishlari chakki emasligini ko'rsatadi. Endi turnir jadvalining yuqori qismida borayotgan jamoalarga e'tibor qaratamiz: peshqadam “Sevinch”ni hamma biladi. Bu jamoa bilan raqobat qilish oson emas. “Metallurg-W” oxirgi ikki-uch yilda yaxshigina kuchaydi. “Andijanka” o'ziga yarasha tarixga ega jamoalardan biri. “Bunyodkor”, “Mash'al”, “Guli” va “Olmaliq” ayollar jamoalari ham nisbatan kuchli hisoblanishadi. “Lokomotiv-W” navbatdagi tur bahsini o'z maydonida o'tkazadi. 12 oktyabr kuni Navoiyning “Guli” jamoasi mehmonimiz bo'ladi. Mana shu bahsda “temiryo'lchi” qizlardan g'alaba kutib qolamiz. “Lokomotiv-W”ning ikkinchi davradagi o'yinlari 12-tur. “Lokomotiv W” – “Bunyodkor W” 0:10
13-tur. “Sevinch” – “Lokomotiv W” 8:0
14-tur. “Mash'al W” – “Lokomotiv W” 3:0
15-tur. “Neftchi W” – “Lokomotiv W” 0:1
16-tur. “Andijanka” – “Lokomotiv W” 9:0
17-tur. “Lokomotiv W” – “To'maris” 5:3
18-tur. “Lokomotiv W” – “Guli”
19-tur. “Sho'rtan Lady” – “Lokomotiv W”
20-tur. “Buxoro W” – “Lokomotiv W”
21-tur. “Lokomotiv W” – “Metallurg W”
22-tur. “Lokomotiv W” – “Olmaliq W”
— deya xabar beradi uff.uz nashri.