«Dinamo» - «Olmaliq» (1:1) uchrashuvidan keyin dastlab mehmonlar ustozi Viktor Kumikov jurnalistlar savollariga javob qaytardi. - Bugungi o'yin natijasini biz uchun qoniqarli deya olaman. Safarda durang o'ynash kubok bahsida yomon natija emas. Vaziyatlardan foydalansak, g'alaba qozonishimiz ham mumkin edi. Javob uchrashuvi oldidan kichik bo'lsada ustunlikka egamiz. - «Dinamo» va «Olmaliq» ikki hafta oldin chempionatda ham o'zaro o'ynagandi. Bu oraliqda «Dinamo»ning o'yini qanchalik o'zgaribdi? - «Dinamo» safardan ko'ra, bugun o'z maydonida ancha yaxshi o'ynadi. O'shanda o'z uyimizda ustunlik bizda edi, bugun esa raqib ancha yaxshi o'yin namoyish etdi. Dastlabki bo'lim yakunida muvozanat tiklangach, ikkinchi bo'limda qarshi hujumda to'p surdik, ammo vaziyatlardan foydalana bilmadik. - «Olmaliq» jamoasi oldida Kubok bahslarida qanday maqsad qo'yilgan? - Maqsad? «Dinamo» to'sig'idan o'tish. Hozircha shuni uddalaylik, keyin esa ko'raveramiz. «Dinamo» Matbuot xizmati.
— deya xabar beradi uff.uz nashri.