Xabaringiz bor, UFF.uz sayti vakili San'at Sharipov Evropa Ligasi musobaqasining final uchrashuvini yoritish uchun UEFA akkreditatsiyasini qo'lga kiritgandi. Xodimimiz kecha Toshkent - Frankfurt - Stokgolm yo'nalishi bo'yicha Shvetsiyaga uchib ketgandi.
U kechaning o'zida manzilga etib bordi va o'yin o'tadigan "Frends Arena"dan dastlabki materiallarni uzatishni boshladi. Bugun musobaqa tashkilotchilari Ommaviy axborot vositalari uchun akkreditatsiyalarni mahalliy vaqt bilan soat 12.00da (Toshkentda 15.00) berishni boshlaydi. Nasib qilsa, qiziqarli ma'lumotlarni uning o'zidan eksklyuziv tarzda olib turamiz.
Hozircha, uning o'yin atrofi haqidagi dastlabki ma'lumotlarni e'tiboringizga havola etamiz.
***** Stokgolm shahridan UFF.uz foydalanuvchilariga alangali salom!
Ertaga, ya'ni 24 may kuni Shvetsiya poytaxti Stokgolm shahri UEFA Evropa Ligasi finaliga mezmonlik qiladi. Ushbu musobaqaning g'olibi kelasi yilgi Evropa Chempionlar ligasining guruh bosqichiga yo'llanma oladi.
Gollandiyaning "Ayaks" klubi so'nggi marta Evropadagi mazkur nufuzli turnirida bundan 21 yil muqaddam, ya'ni 1996 yili ishtirok etgandi va o'shanda Italiyaning "Yuventus" jamoasiga mag'lub bo'lgan edi. U paytlar "Ayaks" tarkibida mashhur Edvin Van Der Sar, Edgar Davids va Patrik Klyuyvertlar to'p surishgan.
O'yin oldidan ingliz klubi bosh murabbiyi Joze Mourinyu "Manchester Yunayted"ga Premer-ligadagi kuchli to'rtlikka kirishdan ko'ra Evropa Ligasini yutishi muhimroq, deb aytib o'tgandi.
Gollandlar bu safar ham finalda o'sha vaqtdagi italiyalik raqiblaridan kam bo'lmagan klubga qarshi to'p surishadi. Garchi hozirgi "Yuventus" bilan "Manchester Yunatyed" klublari orasida sezilarli farq bo'lsa-da, amsterdamliklar final uchrashuviga jiddiy tayorgarlik ko'rishlari tabiiydir. Boz ustiga, hamyurtlari Ibragimovichning safdan chiqqani ham gollandlarga qo'l kelishi mumkin.
Final o'yini jarohat o'chog'iga ko'milgan "qizil iblislar" uchun oson kechmasligi turgan gap. Zlatan Ibragimovich, Markos Roxo, Lyuk Shou va Eshli Yangdan tashqari disklifikatsiya qilingan Erik Bayining maydonga tushmasligi portugaliyalik mutaxassis uchun etarlicha bosh og'riq bo'ladi. Ayni shu muammolar tufayli ertangi final uchrashuvidan oldin jamoalarning imkoniyati teng deya baholanmoqda.
"Ayaks" raqibi "mankunianliklar"ga qaraganda kelasi yilgi Evropa chempionlar ligasiga ertangi kubokni qo'lga kiritish orqali emas, balki milliy chempionatida egallagan o'rni orqali erishadi.
Ikkala jamoa final o'yiniga turli yo'l bilan etib keldi. "Ayaks" Evropa Chempionlar ligasi saralash o'yinlarining uchinchi bosqichida Gretsiyaning "PAOK" jamoasini mag'lub etgan bo'lsa-da, pley-offda Rossiyaning "Rostov" klubiga yutqazib qo'ygandi. Buning natijasida ular Evropa Ligasiga tushib ketishdi.
"Manchester Yunayted" esa, o'tgan mavsumda o'z chempionatida 5-o'rinni egallab Evropa Ligasiga yo'llanma oldi. Garchi guruh bosqichida "qizil iblislar" mehmonda "Feyenord" va "Fenerbaxche"ga mag'lub bo'lishiga qaramasdan, guruhida ikkinchi o'rin bilan keyingi bosqichga yo'llanma olishdi va keyinchalik "Sen-Eten", "Rostov" va "Selta" klublariga qarshi qiyin uchrashuvlardan kerakli natija ko'rsatib final ostonasiga etib kelishdi.
Xo'sh, final o'yini qaerda bo'lib o'tadi?
2017 yilgi Evropa Ligasi finali uchrashuvi Shvetsiya poytaxti Stokgolmdagi "Frends Arenada” bo'lib o'tadi. 50,653 muxlisga mo'ljallangan 300 million evrolik o'yingoh 2012 yilning oktyabrida ochilgan. Stadion ayni
paytda mamlakatning AIK klubi hamda terma jamoasiga mezbonlik qiladi.
Ushbu arenadagi birinchi o'yin Shvetsiya hamda Angliya terma jamoalari o'rtasida o'tkazilgan bo'lib, yodingizda bo'lsa unda Zlatan Ibrahimovich raqib darvozasini o'zining mashhur qaychi uslubidagi goli bilan ishg'ol qilgan edi.
Shvetsiya bundan oldin ham ya'ni, 2004 yilda UEFA kubogi finaliga mezbonlik qilganini eslatib o'tmoqchi edik.
Sotuvda chiptalar bormi?
UEFA orqali sotiladigan chiptalar allaqachon tugagan. Bundan tashqari, har ikki jamoa uchun 10 mingtadan chipta ajratilgan bo'lib, ular odatda jamoa muxlislariga sotiladi. "Mankunianliklar"ga qisqa vaqt ichida qimmatroq chiptalar sotilgan bo'lsa, gollandlarga iqtisodiy sharoitdan kelib chiqib, nisbatan arzonroq bo'lgan sektorlardan chiptalar ajratilgan.
Qolgan chiptalar esa, tashkilotchilar, futbol uyushmalari, tijoriy jamkorlar, translyatsiya qiluvchi kompaniyalarga tarqatiladi. UEFA ushbu chiptalar narxini €45dan €150 gacha qilib belgilagan.
Shvetsiyadagi ishqibozlarning tizzasidan olgan og'ir jarohati tufayli o'yindan chiqqan Zlatan Ibragimovichni sobiq jamoasi "Ayaks"ga qarshi uchrashuvda ko'ra olmasligidan tushkunlikka tushishlari tabiiy.
Lekin, "Ayaks"ning 19 yoshli yulduzi Kasper Dolberg uchun ertangi o'yin uning kata sahnaga chiqishi kutilmoqda. 12ta uchrashuvida raqib darvozasini 6 marta ishg'ol qilgan daniyalik yosh yulduzdan amsterdamliklarning umidi katta.
"Biz ushbu uchrashuvga ikki yildan buyon tayyorlanib kelayotgan edik. Endi bor e'tiborimizni mezbon arena va logistika ishlarifa qaratamiz", - deydi Shvetsiya Futbol uyushmasi a'zosi Goran Xavk.
2016 yilgi Evropa Ligasi finali 100dan ortiq, mamlakatga jonli ravishda translyatsiya qilingan va uni 160 milliondan ortiq muxlis tomosha qilgandi.
Ertangi o'yin Shvetsiya televidenisi tarixidagi eng katta TV mahsulot hisoblanadi. Final o'yinida uni translyatsya qilish huquqini sotib olgan 10ta telekompaniya ishlaydi. Uni yanada ommabop qilib ko'rsatish uchun mingga yaqin TV xodimlari kuzatib boradi va stadionning o'zida qurilgan 5ta studiyadan tahlilchilar chiqish qiladi.
Media tribunada esa radio va televideniedan kelgan 160ta sharhlovchi uchun joy ajratilgan. Uchrashuv yuqori sifatli 34ta HD camera orqali namoyish etiladi. Bundan tashqari har bir telekomanpaniyaga qarashli alohida kameralar ham o'rnatiladi. Ayni paytlarda dunyoning turli burchaklaridan ishqibozlarning kelishi kutilmoqda. 300ga yaqin ko'ngillilar shaharning turli nuqtalariga safarbar qilingan. Ular ishqibozlarni qiziqtirgan barcha savollariga javob beradi.
So'zsiz ertangi o'yin keskin va murosasiz o'tadi. O'zbekistonda ham "Manchester Yunayted" ishqibozlari ushbu o'yinni katta hayajon bilan kutishlari aniq. San'at Sharipov, Stokgolmdan
UFF.uz sayti uchun maxsus
— deya xabar beradi uff.uz nashri.