Ravshan Haydarov murabbiyligidagi O'zbekiston U-21 terma jamoasi shu yilning 27 may kuni Rossiya U-21 termasiga qarshi o'rtoqlik o'yinida kuch sinashadi. Olmaliq shahrida bo'lib o'tadigan uchrashuv oldidan Haydarov terma jamoaning kengaytirilgan tarkibini e'lon qildi. 32 nafar futbolchi nomi qayd etilgan tarkibdan jamoamiz a'zolari Abbos Otaxonov va Ravshan Xursanovlarni ham joy olganligini e'tirof etish joiz. Agar futbolchilarimiz yakuniy tarkibdan joy oladigan bo'lishsa mamlakat chempionatining 12-turidan o'rin olgan “Navbahor” va “Bunyodkor” jamoalari o'rtasidagi o'yinda ishtirok eta olishmaydi. O'z navbatida “Bunyodkor”ning sakkiz nafar vakili ham kengaytirilgan tarkibdan o'rin olishgan.  Dilshod Hamroev, Rustam Ashurmatov, Akram Komilov, Xurshid G'iyosov, Nurillo To'xtasinov, Sardor Azimov, Mirjamol Qosimov, Doston Hamdamovlar shular jumlasidandir. O'zbekiston va Rossiya terma jamoalari o'rtasidagi uchrashuv Olmaliqdagi OKMK sport majmuasida soat 18.00da boshlanadi.
— deya xabar beradi uff.uz nashri.