Bugun Jizzax shahrida kasb-hunar ta'limi muassasalari o'quvchilari o'rtasidagi “Barkamol avlod” sport o'yinlarining Respublika final bosqich musobaqasi boshlanadi.
Aynan bugun musobaqaning tantanali ochilish marosimi bo'lib o'tadi. Markaziy “So'g'diyona” stadionida o'tkaziladigan marosim san'at ustalari ishtirokidagi katta kontsert dasturiga aylanib ketadi.
“Barkamol avlod-2017” musobaqalari Jizzax shahridagi 4 ta ob'ektda tashkil etiladi. Jizzax politexnika institutida futbol va voleybol bahslari o'tkazilsa, ushbu institut qoshidagi akademik litseyda shaxmat musobaqalariga start beriladi.
Qo'l to'pi, taekvondo, dzyudo, erkin kurash, yunon-rum kurashi, stol tennisi, basketbol, badminton, tennis, og'ir atletika bellashuvlari esa Jizzax olimpiya zaxiralari kollejida tashkil etiladi.
Yoshlik va sport bayramining ochilish va yopilish marosimlari o'tkaziluvchi “So'g'diyona” sport majmuasida boks, engil atletika, suzish hamda badiiy gimnastika bo'yicha g'olib va sovrindorlar nomi ma'lum bo'ladi.
Manba: olamsport.com
— deya xabar beradi uff.uz nashri.