Avval xabar qilganimizdek, 2015 yilning 20-29 noyabr kunlari AQShning Xyuston shahrida og'ir atletika bo'yicha jahon chempionati bahslari o'tkaziladi.
Dunyoning etakchi shtangachilari ishtirokida o'tkaziladigan mazkur yirik sport musobaqasida 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari ham o'ynaladi.
Ma'lumki, Xalqaro og'ir atletika federatsiyasi ijroiya qo'mitasi qaroriga ko'ra Olimpiya o'yinlaridan oldingi ikkita jahon chempionati (2014 yil Qozog'iston – 2015 yil AQSh) natijalariga ko'ra jamoalarga yo'llanmalar bo'lib beriladi. Bir jamoaga beriladigan litsenziyalar soni ko'pi bilan erkaklarda 6 ta, ayollarda 4 tani tashkil etadi. So'nggi 2 ta jahon chempionatini qo'shib hisoblaganda erkaklar o'rtasida umumjamoa hisobida 1-6-o'rinlarni egallagan davlatlarga eng ko'p – 6 tadan, 7-12-o'rinlarga 5 tadan, 13-18-o'rinlarga 4 tadan, 19-24-o'rinlarga 3 tadan o'rin ajratiladi.
Ayollarda esa bu tartib 1-9-o'rinlarga 4 tadan, 10-15-o'rinlarga 3 tadan, 16-21-o'rinlarni band etgan jamoalarga 2 tadan. Qolgan davlatlar keyingi yil qit'a chempionatlarida sanoqli yo'llanmalarga da'vogarlik qilishlari mumkin.
“Hozircha erkaklar jamoamiz o'tgan yilgi jahon chempionatidan keyin umumjamoa hisobida 9-o'rinni egallab turibdi. Asosiy vazifa 12-o'rindan pastga tushib ketmaslik. Shunda terma jamoamiz a'zolari 5 ta yo'llanmani saqlab qolishadi. Qizlarimizdan esa 2 ta yo'llanmani ta'minlab beruvchi natijani kutib turibmiz. Agarda qizlarimiz jahon chempionatida kutilgan natijani qayd eta olmasalar, ular oldida 2016 yilning 20-30 aprel kunlari mamlakatimizda o'tkaziladigan Osiyo chempionatida bitta yo'llanmaga ega bo'lish imkoniyati mavjud. Mazkur qit'a chempionatida 1-6 o'rinlarni egallagan terma jamoalarga bittadan Olimpiada o'yinlarining yo'llanmasi beriladi. Shu o'rinda ta'kidlash joizki, Jahon chempionatlari orqali yo'llanmalarni naqd qilib qo'ygan terma jamoalar Osiyo chempionatida kuchli oltilikdan o'rin egallasalarda, ularga litsenziyalar berilmaydi. Bunday holatda, 1-6 o'rinlarni band etgan davlatlar orasida "Rio-2016" yo'llanmasiga ega bo'lgan bir terma jamoa o'rin egallasa 7-o'rin egasi, ikkita bo'lsa 7-8 o'rinni band etgan yurt vakillari (va hakazo) bittadan yo'llanmaga ega bo'ladilar. Darvoqe, umumjamoa hisobidagi o'rinlar qo'lga kiritilgan medallarga qarab emas, balki har bir sportchining egallagan o'rniga qarab beriladigan ochkolar yig'indisidan hosil bo'ladi. Har bir jamoadan eng yaxshi natija ko'rsatgan 6 sportchining ko'rsatkichi asos qilib olinadi”, - deydi O'zbekiston og'ir atletika federatsiyasi vitse-prezidenti Shahrillo Mahmudov.
15 noyabr kuni 9 nafar sportchidan iborat terma jamoamiz Xyuston shahriga jo'nab ketdilar. Delegatsiyamiz tarkibidan – Adhamjon Ergashev (-62 kg), Muhammad Begaliev (-85 kg), Ulug'bek Alimov (-85 kg), Farxodbek Sobirov (-94 kg), Lola Qodirova (-53 kg), Marina Sisoeva (-53 kg), Muattar Nabieva (-58 kg), Manzuraxon Mamasolieva (-69 kg) va Omadoy Otaqo'ziev (-75 kg) kabi sportchilar hamda murabbiylardan Shahrillo Mahmudov, Bahrom Mendibaev o'rin egallashgan.
Og'ir vazndagi polvonlarimizdan iborat terma jamoamizning qolgan a'zolari, bular Sardorbek Do'stmurodov (-105 kg), Rustam Djangabaev (+105 kg) va Ivan Efremov (+105 kg) 22 noyabr kuni AQShga yo'l oladilar.
Barcha hamyurtlarimizga bo'lajak musobaqalarda omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.