Xabaringiz bor, ertaga O'zbekiston milliy terma jamoasi Yamanga qarshi JCh-2018 2-bosqich saralashidan o'rin olgan o'yinda maydonga tushadi. KXDRga qarshi o'yinda sariq kartochka olgan Sardor Rashidov mazkur o'yinda maydonga tushish yoki tushmasligi haqida ko'p munozaralar bo'ldi. Sababi ayrim manbalar Rashidov Yamanga qarshi Toshkentda o'tgan uchrashuvda ham sariq kartochka olganligi va KXDRga qarshi o'yindagi ogohlantirish terma jamoamiz yarim himoyachisi uchun ikkinchi ekanini ta'kidlab o'tishgandi. Eng qizig'i, FIFA rasmiy saytida Yamanga qarshi o'yinda Sardor Rashidov sariq olgan deb ko'rsatilgan, OFK rasmiy saytida esa Odil Ahmedov ogohlantirilgani belgilib qo'yilgandi. Mana shu holat ham ko'pchilikni ikkilanishiga sabab bo'layotgandi. Ammo biz bu borada ma'lumot tayyorlash jarayonida FIFA saytida xatolik ketganini, aslida Yamanga qarshi o'yinda Odil Ahmedov ogohlantirish olganini aniqlagandik va bu haqida saytimiz orqali xabar qilgandik. Bugun O'FFning bu boradagi so'roviga ko'ra, FIFA tashkiloti tomonidan Yamanga qarshi o'yinda Sardor Rashidov emas, Odil Ahmedov ogohlantirilgani haqida hujjat kelgan. Bu haqida O'FF matbuot xizmati rahbari Sanjar Rizaev o'z tvitter sahifasida ma'lum qildi. Demak, ertangi o'yinda terma jamoamiz safida Sardor Rashidov maydonga tushish imkoniga ega. Umuman olganda, ayni paytda terma jamoamiz tarkibida sariq kartochkalari ikkitaga etgan futbolchi yo'q. Hozirda, Aziz Haydarov, Javohir Sohibov, Egor Krimets, Islom To'xtaxo'jaev, Odil Ahmedovda bittadan sariq kartochka bor.
— deya xabar beradi uff.uz nashri.