Kecha Oliy Liga 12-tur uchrashuvlari doirasida “Lokomotiv” “Neftchi”ga qarshi bahs yuritdi. Jamoamizning to'liq ustunligi ostida kechgan match 4:0 hisobida yakunlandi. Uchrashuvdan so'ng o'tkazilgan matbuot anjumanida “Loko” ustozi Andrey Miklyaev quyidagicha fikr bildirdi: - Yomon bo'lmagan o'yin o'tkazdik. Jamoamiz tig'iz taqvimli o'yinlarga qaramay sekin-asta o'ziga kelmoqda. Bugun agar yaratilgan barcha vaziyatlardan unumli foydalanganimizda, yanada ko'proq gol urishimiz ham mumkin edi. Menga “Neftchi” jamoasining o'yini manzur bo'ldi. Ushbu klub bizga o'xshash o'yin namoyish qilmoqda. Faqat bugun omad ularning emas, bizning tarafda bo'ldi. Tarkibda jarohatlanganlar bor ekani bizga biroz pand bermoqda. Koneda jarohat yo'q. Shunchaki, unga biroz dam olish imkonini berdik. Shu sababli mana bugungi uchrashuvda ham Sherzod Fayziev maydonga tushdi. Kone esa o'ziga imkon berilishini kutmoqda. Biz aksariyat uchrashuvlarda yirik hisobda g'alaba qozonmoqdamiz. Ammo bu – chempionatda bizga raqobatchi jamoalar yo'q degani emas. Zero “Qo'qon-1912” ham ancha mazmunli mavsum o'tkazyapti. Qolganlar ham yomon o'yin ko'rsatishmayapti. Masalan, “Sho'rtan” ham istalgan raqibdan ochko olishni uddalayapti. Bu esa chempionat qiziqarli o'tayotganidan dalolat, - deydi tajribali mutaxassis.
— deya xabar beradi uff.uz nashri.