"Katta Dubulg'a" turkumiga kiruvchi Frantsiya ochiq chempioni - "Rolan Garros" turnirida ishtirok etadigan mamlakatimizning eng kuchli raketka ustasi Denis Istomin dastlabki uchrashuvini kimga qarshi o'tkazishi ayniq bo'ldi. Qur'a natijasiga ko'ra, hamyurtimiz birinchi davrada o'zidan o'n yosh kichik bo'lgan amerikalik Ernesto Eskobedo bilan raqobatlashadi. Uchrashuv 29 may kuni bo'ladi. Bu ikki tennischi shu kunga qadar o'zaro to'qnash kelmagan. Denis Istomin "Katta Dubulg'a" turkumining dastlabki musobaqasi - Avstraliya ochiq chempionatida ajoyib o'yinlari bilan muxlislar e'tiborini qozongan edi. O'shanda hamyurtimizning murakkab bahsda Novak Jokovichni mag'lubiyatga uchratgani chempionatning eng ko'p muhokama qilingan voqealaridan biri bo'lgandi. Bu gal ham o'zbekistonlik muxlislar Denis Istomindan shiddatli va ishonchli o'yin kutmoqda.
— deya xabar beradi uff.uz nashri.