Toshkent shahridagi “Universal” sport saroyida ilk marotaba paralimpiya dzyudosi bo'yicha 2020 yil Tokioda bo'lib o'tadigan yozgi Paralimpiya o'yinlariga reyting ochkolarini beradigan Osiyo va Okeaniya chempionati boshlandi. Ushbu musobaqada Osiyoda sportning ushbu turi bo'yicha eng kuchli davlatlar sanalgan Eron, Janubiy Koreya, Hindiston, Iroq, Tojikiston, Xitoy Taypeyi, Tailand, Qozog'iston va XV yozgi Paralimpiya o'yinlari yakuniga ko'ra jahonning eng kuchli terma jamoasi deya tan olingan O'zbekiston terma jamoalari ishtirok etmoqdalar.
Musobaqaning tantanali ochilish marosimida estrada yulduzlari, bolalar va milliy raqs guruhlari o'z chiqishlari bilan bayramga yanada fayz kiritdilar. Marosimida O'zbekiston Milliy Paralimpiya Assotsiatsiyasi raisi o'rinbosari Muxtorxon Tashxodjaev so'zga chiqib barcha ishtirokchilarni nufuzli musobaqa bilan tabrikladi va chempionatni ochiq deb e'lon qildi. Musobaqaning dastlabki kungi natijalariga ko'ra ayollar o'rtasida -48 kg. vazn toifasida 1-o'rinni Yoqutxon Komilova (O'zbekiston), 2-o'rinni Lee Kay Lin (Xitoy Taypeyi) va 3-o'rinni Lobar Xurramova (O'zbekiston)lar egalladilar. -52 kg. vazn toifasida hamyurtimiz Sevinch Sallaeva oltin medalga sazovor bo'lgan bo'lsa, tailandlik Vongchongpxu Metxini kumush medalini qo'lga kiritdi. - 57 kg. vaznda ham sovrinli o'rinlar O'zbekiston va Tailand terma jamoalari vakillariga nasib etdi. 1-o'rin Nafisa Sheripboeva (O'zbekiston), 2-o'rin Kxvayngmuyang Aitsarapxon (Tailand).  
Erkaklar o'rtasidagi bellashuvlar anchagina keskin va murosasiz kurashlar ostida o'tib unda quyidagi natijalar qayd etildi: -60 kg. 1-o'rin Rio-2016 Paralimpiya o'yinlari chempioni Sherzod Namozov (O'zbekiston), 2-o'rin Li Min Jay (Janubiy Koreya), 3-o'rin Xoram Abadi Seyed Meysam (Eron) va Jang Seongjin (Janubiy Koreya). -66 kg. vazn toifasida 1-o'rin eronlik Raxmati Sayidga nasib etdi. Qozog'istonlik Azamat Turumbetov 2-o'ringa loyiq ko'rildi. 3-o'rindan esa hindistonlik Singx Jaydipkumar Xridaya (Xindiston) va o'zbekistonlik Adizjon Tuymuradovlar joy olishdi.
-73 kg. vazn toifasida hamyurtimiz Feruz Saidov barcha raqiblarini mag'lub etib bosh mukofotga sazovor bo'ldi. Terma jamoamizning yana bir a'zosi Davruxon Karamatov (O'zbekiston) 2-o'rinni band etdi. 3-o'rin esa qozog'istonlik Daulet Temirjan (Qozog'iston) va koreyalik Yang Syung Junga nasib etdi. Bugun, 27 may kuni ayollar -63kg, -70kg. vazn tofilarida bahs olib borsalar, erkaklar o'rtasida -81kg, -90kg, -100kg, +100 kg. vaznga ega polvonlar tatamiga chiqishadi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.