Xabar berib o'tganimizdek, Toshkent shahridagi “Universal” sport saroyi joriy yilning 26-28 may kunlari ilk marotaba paralimpiya dzyudosi bo'yicha tashkil etilgan va 2020 yil Tokioda bo'lib o'tadigan yozgi Paralimpiya o'yinlariga reyting ochkolarini beradigan Osiyo va Okeaniya chempionatiga mezbonlik qildi.
Mazkur musobaqada sportning ushbu turi bo'yicha qit'amizda eng kuchli sanalgan davlatlar - Eron, Janubiy Koreya, Hindiston, Iroq, Tojikiston, Xitoy Taypeyi, Tailand, Qozog'iston va XV Paralimpiya o'yinlari yakunlariga ko'ra jahonning eng kuchli jamoasi hisoblanadigan O'zbekiston terma jamoalari ishtirok etdilar.
Terma jamoamiz a'zolari ushbu chempionatda 9 ta oltin, 2 ta kumush va 7 ta bronza medallarini qo'lga kiritib, umumjamoa hisobida 1-o'rinni egallashdi. Ikkinchi pog'onadan 3 ta oltin 3 ta kumush va 3 ta bronza medallari bilan Janubiy Koreya terma jamoasi joy olgan bo'lsa, Eron terma jamoasi 2 ta oltin 2 ta kumush va 3 ta bronza medallariga sazovor bo'lib, kuchli uchlikka yakun yasab berdi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.