Xabaringiz bor, O'zbekiston milliy terma jamoasi 6 iyun kuni Toshkentda Tayland termasiga qarshi o'rtoqlik uchrashuvini o'tkazadi. Ushbu mamlakat matbuotidan olingan xabarlarga qaraganda, Tayland delegatsiyasi Toshkentga asosiy tarkib bilan tashrif buyuradi.
Sababi, 13 iyun kuni ularni Bangkokda BAA termasiga qarshi JCh-2018 saralash uchrashuvi kutmoqda. Bosh murabbiy Milovan Rayevats "Rajamangala National Stadium" o'yingohidagi bahsdan maksimal natija kutmoqda.
Aynan Toshkentdagi o'yin ularga BAAga qarshi uchrashuv oldidan tayyorgarlik vazifasini o'tab berishi ta'kidlangan.
Garchi, Tayland termasida Rossiyaga borish imkoniyati yo'qqa chiqqan bo'lsada, murabbiylar shtabi kelasi musobaqalar uchun jamoa o'zagini shakllantirishni rejalashtirishgan.
Xullas, Toshkentda jangovor o'yinga guvoh bo'lsak ajab emas. Shu o'rinda aytib ketmoqchi edik, O'zbekiston termasi ham shu o'yinda o'rtoqlik maqomiga qaramasdan g'alaba qozonishi kerak bo'ladi. Bu Eronga qarshi o'yin oldidan keraklicha ruhiy quvvatni keltirib chiqaradi. Aks holda "Ozodi" stadionida qiynalib qolamiz.
Eslatib o'tamiz, bugungi kunda Samvel Babayan boshchiligidagi termamiz mashg'ulotlarga allaqachon kirishib bo'lgan.
— deya xabar beradi uff.uz nashri.