Ayni damda ishsiz bo'lgan O'zbekiston terma jamoasining sobiq bosh murabbiyi Vadim Abramov Oliy Liga klublaridan birida faoliyat boshlashi kutilmoqda. Tajribali mutaxassis Farg'onaning «Neftchi» klubidan taklif oldi. Joriy mavsumni muvaffaqiyatsiz o'tkazayotgan Farg'ona jamoasida yaqinda murabbiylar iste'foga chiqarilgandi. Vadim Abramov «Erudit Sport» gazetasiga bergan intervyusida «Neftchi»da ish boshlashim mumkinligini yashirmadi.
— Vadim Karlenovich, tez orada Oliy Ligada ish boshlashingiz bilan tabriklasak bo'ladimi?
— Bunga umid qilaman. Ammo ayni damda ishsizman.
— «Neftchi» klubidan taklif olganingizni rad etmassiz?
— Chindanam «Neftchi»dan taklif oldim. Namanganda o'tgan «Navbahor» — «Neftchi» o'yinida farg'onaliklarni o'yinini stadiondan turib kuzatdim.
— Farg'onada ish boshlashingiz imkoniyati qanchalik?
— Farg'ona menga begona emas, u erda ish boshlashim imkoniyati katta. Ammo hali hammasi aniq emas, tez orada ma'lum bo'ladi.
— «Neftchi» varianti qanday paydo bo'ldi?
— Bilasiz, klubda yaqinda o'zgarishlar bo'ldi. Klub yangi raisi Toxir Kapadze taklif bilan chiqdilar. Toxir Veysalovich bilan oldin terma jamoalarda birga ishlaganman. Farg'ona klubi rahbariyati bilan gaplashgach, taklifni rad etmadim.
— Yuriy Sarkisyan davrida «Neftchi»da ishlagansiz. Farg'onada yana bu hamkorlikni ko'rish mumkinmi?
— Qanday javob berishga ham hayronman, buni Yuriy Vazgenovichdan so'rash kerak.
— «Buxoro»dan taklif tushganida, faqat Toshkent klubida ishlash rejangiz borligini aytgan edingiz…
— Toshkent jamoalaridan hech qanday taklif tushmagach, «Neftchi»ning taklifini ko'rib chiqishga qaror qildim. Ammo, klubda hali ish boshlaganim yo'q. Nima bo'lishini tez orada bilib olasiz.
Usmon IBODOV suhbatlashdi, «Erudit Sport» gazetasi
— deya xabar beradi uff.uz nashri.