KXDR termasiga qarshi o'yinda «anshlag» bo'lishi oldindan kutilgan edi. Ammo eng optimist kishi ham bu qadar ko'p muxlis yig'ilishini taxmin qilmagandir. Tan olaylik, yaqin o'rtada bunday o'yin ko'rmagandik. Aniqrog'i, shuncha muxlis bir joyda to'plangan emasdi. Oliy liganing befayz, bemuxlis o'yinlariga ko'nikib qolgan ekanmizmi, bunday izdihomdan biroz shoshib ham qoldik. Terma jamoa baribir, terma jamoa-da. Boz ustiga, bu o'yin mavsum davomidagi kelishilmagani aniq uchrashuvlardan hisoblanardi. Shunday bo'lgach, muxlislar, albatta, stadionga talpinishar ekan. Ana endi bir o'ylab ko'ring, oliy liganing har bir o'yini shu ruhda kechsa, futbolimiz qanday rivojlanardi-ya...
O'YIN OLDIDAN
Mayli, oliy ligani tinch qo'ya turaylik, KXDR termasiga qarshi kechgan o'yin haqidagi mulohazani davom ettiramiz.  Biz - yangi avlod vakillari Krasnitskiy, Isoqov va Abduraimovning o'yinlarini ko'rmaganmiz. O'sha vaqtlardagi muxlislikni esa, ko'proq «Yor-yor» filmidan bilamiz. «Men etishmayapman, men...», - derdi, esingizdami? Baxtimizga KXDR termasi bilan o'yin­da hammasi etarli bo'ldi va biz g'alaba qozondik. Butun stadion bir kuchga aylanib, hayqirsa, har qanday odamning eti jimirlab ketar ekan. Birga kuylangan madhiya haqida-ku, indamaymiz. Shunday vaqtda xalqning kuchini yaxshiroq his qilasan...
START
Endi bevosita o'yinga to'xtalsak. Yaxshi bilamiz, Samvel Babayan jamoasi Filippin va Bahrayn termasiga qarshi kechgan uchrashuvlarda tezkor gol evaziga tashabbusni qo'lga olgan va yirik hisobda g'alabaga erishgandi. Bu safar ham an'ana takrorlandi, hisob, ammo u mutlaqo teskari ko'rinish oldi. Endi Aleksandr Lobanov tezkor gol  qo'yib yubordi. O'sha vaziyat uchun kimni ayblash mumkin? Odatda bunday vaqtda futbolchilar ko'p ishlatadigan bir gap bor - «G'alabani butun jamoa qo'lga kiritadi, golni ham birga qo'yib yuboradi». Garchi bu tushunchaga har doim ham qo'shilish qiyin sanalsada, O'zbekiston-KXDR o'yinining start qismidagi holatni istisno qilish noo'rin. Darhaqiqat, qo'yib yuborilgan golda butun jamoani ayblash mumkin - koreyaliklar o'ng qanotdan tezkor hujum tashkil qildilar, himoyachilarimiz esa, shunchaki, «uxlab» qolishdi. Avvaliga Islom To'xtaxo'jaev o'z qanotida raqib futbolchisini qo'yib yubordi, keyin Anzur Ismoilov va Egor Krimets tomoshabin rolini bajardilar. Natijada hisob - 0:1.
GOLDAN SO'NG
O'zbekiston terma jamoasi uchrashuv boshida g'alati taktika qo'lladi - to'p kimga tushmasin, u qanday sharoitda bo'lmasin, darvoza tomon zarba beraverdi. Hisoblab ko'rsak, 15-daqiqaga qadar bunday zarbalardan naq 6tasini ko'ribmiz. Ammo yomon tomoni shundaki, ularning aksariyati darvoza tomon to'g'ri bormadi. Qiyshiq ketgani ham mayli, zarba kuch jihatidan ko'ngildagidek chiqmaganiga nima deysiz? O'zbekiston terma jamoasi futbolchilari bunday zarbalardan naf chiqmasligini faqat birinchi bo'lim o'rtalariga kelib tushunib etdilar. Bu yog'iga endi taktika biroz o'zgartirildi. 20-daqiqalardan boshlab, vakillarimiz to'pni jarima maydonchasiga, asosan Igor Sergeevga etkazib berishga urina boshlashdi. Bunday futbol bizga ancha tanish, ancha qadrdon. Boz ustiga, Igor ham uzatmalar «hidi»ni sezsa, qanday o'ynash kerakligini yaxshi biladi. Xullas, gol ko'p kuttirmadi - 24-daqiqaga kelib, hisob tenglashdi. Tabiiyki, Sergeev yana bosh bilan aniq zarba yo'llab, koreyslar posbonini ojiz qoldirdi.
SERGEEV HAQIDA
Shu o'rinda terma jamoamiz asosiy hujumchisiga ikki og'iz ta'rif bersak. Bunga qadar Igor haqida ko'p gapirilgan, ular orasida ijobiysi ham, salbiysi ham etarli. Ammo koreyslarga qarshi kechgan o'yin yuzasidan yana bir bor to'xtalib o'tmasak bo'lmaydi. Bizni Sergeevning o'zi shunga majbur qildi... Yo'q, albatta, futbol mutaxassisi emasmiz, ammo ayni payt Igorda etuk hujumchiga xos alohida iqtidor borligini aytish uchun qandaydir bilim talab qilinmaydi. Uning eng asosiy xislati - mas'uliyatni o'z zimmasiga olishdan cho'chimaydi. Eslang, hujumchimiz gol urgach, oradan hech qancha o'tmay, to'p yana unga tushdi. Ammo bu safar vaziyat ancha murakkab edi: Igor darvozaga teskari turgan va ikki nafar raqib uni ta'qib qilayotgandi. Aksariyat hujumchilar (agar oliy liga o'yinlarida bo'lsa, deyarli hammasi) bunday vaqtda to'pni ortga uzatishadi. Igorda ham shunday imkoniyat bor edi, u to'pni bemalol orqadagi Rashidovga tashlab qo'ysa bo'lardi. Ammo Sergeev bunday qilmadi va himoyachilar ta'qibidan qutulib, darvoza tomon zarba yo'lladi. To'g'ri, uning urinishi o'xshamadi, ammo hujumchining vazifasi darvozani ishg'ol etish ekan, zarba bermasa, qanday gol uradi? Kim biladi deysiz, Igor Sergeev balki shu xislati evaziga uchrashuvning eng yaxshi futbolchisi sifatida tan olingandir...
BO'LIM HAQIDA
Mayli, Sergeevni qo'ya turaylik, nasib qilsa, u hali ko'p gol uradi va etarlicha gaplashishga asos topamiz. O'yin haqidagi umumiy fikrimizni davom ettirsak, goldan so'ng birinchi bo'limda sezilarli o'zgarish kuzatilgani yo'q, hisobi. Jamoamiz hujum qilishga intildi, raqib esa, jon holatda himoyalandi. Albatta, bizning futbolchilarda imkoniyatlar ko'proq vujudga kelganini ham ta'kidlab o'tish mumkin. Ammo bundan hech qanday naf chiqmagach, nimani ham gapirardik? Masalan, Egor Krimets 45-daqiqada qulay vaziyatdan to'pni qiyshiq tepganini takrorlayvermaymiz-ku, to'g'rimi?
Yaxshi hamki, baxtimizga, Vitaliy Denisovga o'xshagan himoyachilar bor. Krimetsning o'xshovsiz zarbasidan so'ng hech qancha o'tmay, koreyaliklar xavf­li qarshi hujum tashkil qildilar. O'sha vaziyatda Vitaliy keskin o'ynab, to'pni maydon tashqarisiga chiqarib yubormaganida, davomi qanday kechardi - buni aytish qiyin. Nasib qilsa, terma jamoamiz jahon chempionatiga chiqsa, shu yigitga bitta to'n kiydirish kerak. Chunki Vitaliyning hali biror marta o'rtamiyona saviyada o'ynaganini ko'rmadik. Qaysi uchrashuvni olmaylik, mudom bor kuchini maydonga tashlab chiqadi. Shunday ekan, O'FFdan ketsa, bitta to'n ketibdi-da, nima dedingiz...?
Davomi InterFUTBOL gazetasi blogida.
— deya xabar beradi uff.uz nashri.