O'zbekiston Kubogi-2017ning bu yilgi mavsumida “Neftchi” jamoasi muvaffaqiyatli tarzda odimlamoqda. Farg'ona jamoasi musobaqaning nimchorak finalida “Navbahor”ga qarshi raqobat olib borib, ikki o'yin natijasiga ko'ra navbatdagi bosqichga yo'l oldi. Jamoa darvozaboni Abdumavlon Abdujalilov esa klub matbuot xizmatiga bergan intervyusida jamoaning O'zbekiston Kubogidagi ishtiroki haqida fikr bildirdi
– Birinchi o'rinda muxlislarga katta rahmat aytmoqchiman. Chunki ularning ulkan daldasi bilan O'zbekiston Kubogidagi yurishimizni davom ettiramiz. Aynan ishqibozlarning qo'llab-quvvatlashi natijasida “Navbahor” to'sig'idan o'tdik deb o'ylayman. Shuningdek yigitlarning mashg'ulotlardagi mehnatini ham alohida e'tirof etish kerak. Namanganda juda og'ir bahs kechdi. Xar ikkala jamoa ham keyingi bosqichga chiqishni juda istagan edi. Biroq mazkur qarama-qarshilikda bizning istagimiz kuchli bo'lib chiqdi. Sherzod Hakimovning super goliga alohida to'xtalib o'tmasam bo'lmaydi.
Darvozabon sifatida shuni ayta olamanki, bunday mahorat bilan berilgan zarbani qaytarish juda qiyin. Gol haqiqitdan ham chiroyli chiqdi. Jamoamizning o'yini asta-sekin kuchayib bormoqda. O'zbekiston Kubogida ham munosib ishtirok etishni istaymiz. Maqsadimiz xar bir bellashuvda muxlislarimizni xursand etish, – dedi Abdujalilov.
— deya xabar beradi uff.uz nashri.