Bugun Evropaning eng nufuzli musobaqalaridan biri Chempionlar Ligasi final bahsi bo'lib o'tishini futbol atrofida jamlangan barcha insonlar hayajon bilan kutishmoqda. Ma'lumki, yuqori nufuzdagi musobaqalarning deyarli barchasining final uchrashuvi har doimgidek e'tiborga boy bo'lgan va bundan keyin ham bu odat saqlanib qoladi. Nega-ki, finalda kutilmagan voqealar ro'y beradi, ehtiroslar jumbushga keladi. www.uff.uz, sayti xodimi Akmal Eshonxonov “Real” – “Yuventus” uchrashuvi haqida o'z fikrlarini bildirib o'tarkan bugungi uchrashuvni neytral muxlis sifatida tomosha qilishini ta'kidladi. - Uchrashuv albatta, muxlislarning diqqat e'tiborlariga sazovor bo'lishi tabiiy, tomoshabop o'yin bo'ladi. Chunki, bu final. Hal qiluvchi bahsda har bir futbolchidan boshlab barcha, go'yoki muxlislar ham o'z jamoalariga dalda, kuch berib turishga intilishadi. “Yuventus” joriy mavsum “Barselona”ni musobaqadan chiqarib yubordi, Italiya chempionligini qo'lga kiritdi. Bundan tashqari Italiya Kubogi ham aynan Allegri boshchiligidagi jamoa jamadonida joylashgan. Turinliklar mavsumni yuqori notada o'tkazishdi. Sizu-biz sovrin yutdi dermiz, gapirish qandaydir osondek tuyuladi. Ammo sovrin yutishni maqsad qilgan jamoa shunchaki mashg'ulotlar o'tkazish bilan bosh mukofotga sazovor ko'rilib qolmaydi. Shohsupaga etib kelish uchun katta yo'qotish hamda qiyin mexnatlar samarasi yotadi. Inkor etolmaymiz, “Yuventus” EChLni,  Buffon “Oltin to'p”ni olish uchun kerakli ishlarni bajarib bo'ldi. Endi “Yuve” oldida yana bir to'siq qolgan. U - Madridning “Real” klubi. Bilasiz , “qirollik klubi” Zidan kelganidan so'ng oxirgi 5 yillikdagi eng yaxshi o'yinini namoyish etmoqdda. La-Liga chempionligi, klublar o'rtasidagi JCh bosh sovrini, EChL finaliga ikkinchi marta yo'l olish. Ha, bu ishlarni Zidan Madridda asosiy rolga tayinlangani hamda o'z  jamoasini tuzganidan so'ng ega chiqdi. “Qaymoqranglilar”ning frantsiyalik mutaxassis kelganidan so'ng amalga oshirgan ishlari albatta yuqori maqtovlarga loyiq. “Real” EChLni ketma – ket ikkinchi marta, Ronaldu “Oltin to'p”ni 5 marta qo'lga kiritmasligi kerak degan fikrning o'zi noto'g'ri. Barchasi bugun aniq bo'ladi. Azaldan “Real” o'yinlarini kutib kelsamda, bugungi o'yinni neytral muxlis sifatida tomosha qilishga va'da beraman. Chunki, har ikki jamoa ortda qolgan mavsumni ajoyib ruhda yakunladi va buni inkor etish mushkul. Asosiysi, bugun EChL finali o'tadigan stadionda ajoyib muhit yaratilishining guvohi bo'lish tarafdoriman, ya'ni chiroyli o'yin, chiroyli muxlis. Har ikki jamoaga omad yor bo'lsin. #ForzaJuve - #HalaMadrid
— deya xabar beradi uff.uz nashri.