— Vey, shu koptokni ko'rsam, ko'nglim ayniydigan bo'lib qolibdi. Tag'in nuqul menga qarab kelaveradi. Biram xunuk, biram xunuk, anavi ovsar qo'shnim Eshmamatning kallasiga o'xshaydi-ey. Uniyam sochi yo'q, buniyam. Bilsangiz, men jamoamdagi eng «takoy» o'yinchiman. Jamoaga qabul qilinayotganimda hujumchilikni tanlaganman. Juda zo'r ekan-da bu chiziq. O'tiraverasan himoyachilar to'p uzatishini kuti-i-i-ib. To'p senga etib kelsa, bor kuching bilan bir-ikki harakat qilib, tepib qo'yasan. Agar tepganing gol bo'lsa, sendan zo'ri yo'q. Agar o'xshamasa, nichevo, omading kelmadi, tamom. Bugun ham o'yin bor. Zo'r o'yin. Tag'in-chi, mukofoti dahshat. Bordi-yu, yutsak, har birimizga falon-falon pul berisharkan. Qoyil. Qachon o'yin boshlanarkan-a?! * * * Shu stadionni yoqtirmayman-da. Biram keng, biram katta-ey. Yana kelib-kelib shu stadionda o'ynashim kerak. Lekin bizam bopladik. Shu murabbiy Norqovul akayam ja ichidan pishgan-da. O'yindan oldin stadionni tinimsiz sug'oradi. Ey, bizning qishloqdagi tomorqayam buncha suv ichmagan. O't shunaqa o'sganki, raqib tugul bizam zo'rg'a yuramiz. Ana, men eng yomon ko'rgan odam ham chiqib keldi maydonga. Sardorlarni chaqirdi. Ie, shoshma, bu safargi tangasi boshqacharoq-ku. Nechchi so'mlik ekan-a?! Ellik sumlikka o'xshayapti. Sekinroq ot, xumpar, yaxshilab ko'rib olay. Ie, shoshmay o'l. Ko'rmasin deyapsan-da?! Sekinroq chal, sekinroq. Hushtagining ovozini shunaqangi yomon ko'ramanki, bizning Xolposham bundan sekinroq baqiradi. Men tezroq o'z joyimda turib olishim kerak. Ana bo'ldi. Endi jo'rttaga baqirib qo'yay: — Uzat, uzat menga! Bo'lsang-chi! Ishqilib, uzatmasin-da. Nuqul kuchli tepishadi bular, tag'in noaniq. To'pni egallashim uchun yugurishim kerakmish. Mana, hozir ham shunaqa bo'ladi-yov. Aytdim-ku, qiyshiq tepadi, deb. Nima, endi bir kamim to'pning orqasidan yugurib yurishim qoluvdi. Himoyachimisan, kerak bo'lsa, oyog'imning tagigacha etkazib ber-da. Tag'in baqirishini-chi?! — Ey, chirillama, tushundingmi? Men hujumchiman, laychamas. Vazifam mengacha etib kelgan to'pni darvozaga yo'llash. Nima, sen himoyada shuncha jon kuydiryapsan?! Menga nima, bu sening ishing! Ey, bor, ishingni qil! Chiranishinichi buning. Himoyaga qaytsam, hujumda kim o'ynaydi?! Shoshma, orqamdan kimdir baqiryaptimi? Ie, anavi taqirbosh nima derkan endi?! Bir adabini berardim-u, murabbiyda u! — Nima deysiz?! Orqaga qaytib o'ynay?! Sizniyam tushunmaymanda bratan, men himoyachimi yoki hujumchi? Universal?! Kechirib qo'yasiz, unda shunga yarasha to'lab qo'yingda mulla jiringdan! Shu bilan pachakilashib o'tiramanmi? Ie, ana, bo'larkan-u uzatsa! Raqib himoyachilari nima qilyapti bu erda?! Qoch yo'limdan! Obbo, yana xiralik qildi bular, endi tepaman devdim-a. Ie, aytganday, bunaqa paytda nima qilish kerak edi?! — Voy oyog'im, onajon, voydod! O'lib qolaman hozir, yordam bering! Sekin mo'ralaychi, hakam nima qilyapti ekan?! Shunaqa dumalayki, shunaqa chinqirayki! Ishonmay qaergayam borardi?! Ana, anavi meshqorin sherigining oldiga chopdi. Demak, ish besh. Shoshma, yana ozroq qo'shib qo'yay: — Jonim og'riyapti, jonim! Xayriyat, hushtagini chaldi-ya. Bu ovoz unchalik yoqimsiz emas ekan. Mana hozir, biram yoqimli eshitildi. Endi sekin o'rnimdan turishim kerak. A, penaltini tepaman, axir! Boshqa vaziyatda gol urolmasam. Shoshma, sal-pal oqsoqlanay, yana ishonmay qolishmasin. Shu o'yinda amal-taqal qilib gol urvosam, keyingi safar ham, albatta, maydonga tushaman. — O'v, galvars, men tepaman, qoch! Ho, tayyorga ayyor bo'lasan-da, chuchvarani xom sanabsan. Oyog'im shikastlangan, tepolmayman?! Bu yog'i mening ishim. Jo'na! Hozir qahramonga aylanaman. Ey, bu jirafaning buqaqarash qilishini-chi! Shu ko'zingga barmog'imni tiqvolaymi hozir?! Meni qo'rqitmoqchi, shekilli! Xo'sh, o'ng burchakka tepsammikin, chap burchakkami?! O'ngacha sanay-chi, qaysinisiga to'g'ri kelarkin?! Xo'sh, chap burchakka teparkanman. Ie, qaytardi-ku yaramas. Bu qanaqasi?! Axir o'ninchi raqam chap burchakka to'g'ri kelgandi-ku! Uff, tag'in omadim chopmadi! Juda kuchli tepgandim-a! Anavi jingalak soch nima deb chiranyapti endi?! — Nima deding?! Ayb mendamas, axir aniq tepdim-ku! Darvozaga to'g'ri bordi. Agar qaytarmasa, aniq gol bo'lardi. Ha endi qaytarib qoldi-da, nima qilishim kerak?! Davomi
— deya xabar beradi uff.uz nashri.