Nihoyat, Evropa Chempionlar ligasi finali ham yakuniga etdi. Nihoyat uzoq kutilgan rekord o'rnatildi. Madridning “Real” jamoasi finalda “Yuventus”ni yirik hisobda mag'lub etdi va yakunda ikki yil ketma-ket Evropa Chempionlar ligasi bosh sovrinini qo'lga kiritdi. TAKTIKALAR TO'G'RI TANLANDI, LEKIN... Shuni alohida ta'kidlash kerakki, taktika borasida taxminimiz o'zini oqlamadi. Ya'ni biz “Real”dan hujumkorlik, “Yuventus”dan esa mustahkam himoya irodasini kutgandik. Biroq o'yin boshida Allegri hujumkorlikni, Zidan esa ikkinchi raqam bo'lib o'ynashni tanladi. Bu bir qarashda tushunarli, sababi, turinliklarning himoyasi mustahkam, agar “Real” dastlabki daqiqalardanoq hujumga tashlansa, raqib himoyachilari bu hujumlarni bartaraf etar va “Yuventus” qarshi hujumda “Real”ni jazolashi mumkin edi. Shu bois Zidan dastlab hujumkorlikdan chekinib turdi.
Allegrining qarorini ham noto'g'ri deb bo'lmaydi, boisi “qirollik klubi”ning himoyasida muammolar borligini bilgan mutaxassis dastlabki daqiqalardanoq gol yoki gollar kiritishni niyat qilgandi. Keyin esa himoyaviy o'yin orqali natijani ushlab qolish mumkin edi. Birinchi bo'lim kutilmagan tarzda kechdi, “Yuventus” kutilganidan ham dahshatli, “Real” esa kutilmaganda ojiz ko'rindi. Biroq bu Zidanning hiylasi ekanligi ikkinchi bo'limda ayon bo'ldi.
Agar La-ligada “Real”ning o'yinlarini muntazam kuzatgan bo'lsangiz, jamoa asosan ikkinchi bo'limda bor kuchi bilan o'ynaydi, ayniqsa, grand jamoalarga qarshi harakat qilganida. Bu safar ham shunday bo'ldi. Zidan tanaffusda ikkinchi bo'limda haqiqiy “Real”ni ko'rishni istayotganini shogirdlariga aytdi va madridliklar maydonga umuman boshqacha kayfiyatda tushishdi. Tabiiyki, birinchi bo'limdagi ojiz jamoaga o'rgangan “Yuventus” raqibning keskin o'zgarganini ko'tara olmadi. Ochig'i turinliklarning nega ikkinchi bo'limda bunday o'ynaganini izohlash qiyin. Nima bo'lganda ham, Allegri shogirdlari finalda “Real”ning ikki xil taktika qo'llashi, Zidanning hiylasi natijasida chalg'ib qolishdi. Aks holda hisob bunchalik yirik ko'rinish kasb etmasligi kerak edi, har holda buni hech kim kutmagandi.
Darvoqe, garchi to'rtta gol o'tkazib yuborgan bo'lsa-da, Buffonni ayblay olmaymiz. Ayb “Yuventus” himoyachilarida edi. Yana bir gap. Mazkur o'yinga tayinlangan Feliks Brix qo'pol xatolarga yo'l qo'ydi. Ayniqsa, Kuadradoga ko'rsatilgan ikkinchi sariq kartochka ortiqcha, juda ortiqcha edi. Davomi
— deya xabar beradi uff.uz nashri.