O'zingizga ma'lum, Qarshi shahridagi “Nasaf” jamoasining uy uchrashuvlari o'tkaziladigan – “Markaziy” stadion keng ko'lamdagi rekonstruktsiya ishlari o'tkazilishi munosabati bilan yopilgan edi. Jamoamiz, “Markaziy”da so'nggi marta 2016 yil 22 oktyabr kuni 26-tur doirasidagi “Navbahor”ga qarshi uchrashuv o'tkazgan edi. Shundan so'ng, barcha uy uchrashuvlari G'uzor shahridagi “G'uzor” markaziy stadioniga ko'chirildi.   Mana oradan deyarli sakkiz oy o'tib, “Markaziy” stadionning yangi chim yotqizilgan maydoni o'yinga tayyor bo'ldi. Futbolchilarimiz bugun,  bu yil hisobidan ilk marta “Markaziy”da mashg'ulot o'tkazishdi. Ammo, “Markaziy”da “Nasaf”ning uy uchrashuvlari keyinroq boshlanadi. Chunki, stadionda oxirgi rekonstruktsiya ishlari davom etmoqda. Bu jarayon tugallanish arafasida. Klubimiz ishqibozlari uchun yana bir yangilik, jamoamiz 30 iyun kuni “Qo'qon-912” jamoasiga qarshi kubokning dastlabki uchrashuvini “Markaziy”da o'tkazishi mumkin. Bu albatta reja, bunga yaqin kunlarda aniqlik kiritiladi va to'liq xabar beramiz. Endi bevosita mashg'ulotlarga to'xtaladigan bo'lsak, milliy terma jamoamiz safiga jalb etilgan futbolchilarimiz hamda legionerlarimizdan tashqari, hamma o'yinchilarimiz mashg'ulotda ishtirok etishdi. Legioner futbolchilarimiz esa ertadan mashg'ulotlarga kirishadi. Quyida bugungi  mashg'ulotga oid ayrim suratlarni e'tiboringizga havola qilamiz.      Biz jamoamizning tajribali hujumchisi Shaxboz Erkinovdan yangi maydon va yangilangan stadion haqidagi fikrlarini so'radik. -To'g'risi, stadionimizdagi o'zgarishlarni ko'rib juda xursand bo'ldim. O'ylaymanki, bu yangiliklar muxlislarimizni ham juda quvontirishi turgan gap. Maydon ham ko'ngildagidek bo'libdi, ta'riflashga so'z yo'q. Ko'rinib turibdiki, bu erda mehnat qilgan insonlar bor mahorati va bilimlarini ishga solishgan. Fursatdan foydalanib, bosh homiymiz – “Sho'rtan gaz kimyo majmuasi” rahbariyatiga, klubimiz mutassaddilariga, bu erda mehnat qilgan barcha aka va ukalarimizga, jamoamiz va jamoadoshlarim nomidan kattadan-katta tashakkurlar izhor etaman. O'z o'rnida biz futbolchilar ham, klubimiz rahbariyati va muxlislarimizning ishonchlarini oqlashga bor kuchimizni, mahoratimizni ishga solamiz, - deydi Shaxboz Erkinov. Mashg'ulot payti, stadionimizga klubimiz prezidenti – “Sho'rtan gaz kimyo majmuasi” bosh  direktori Odil Shukurovich Temirov ham tashrif buyurdilar. U kishi murabbiy va futbolchilar bilan uchrashib, qisqa suhbat ham uyushtirdilar. Bu uchrashuvdan barcha futbolchilarning kayfiyati ham ko'tarildi. Mashg'ulotlar ko'tarinki ruhda o'tdi.
— deya xabar beradi uff.uz nashri.