To'g'risi, Dohada biznikilar xuddi mezbondek o'ynashdi. Sababi raqibni o'zga mamlakatda o'ynashi, oz bo'lsa ham soz ishqibozlik qilgan o'zbek muxlislari, hatto maydon chetidagi “Hamkorbank” va “Ravon” brendlari ham o'yinchilarimizga yordam bergan bo'lsa kerak. O'yin boshlanmasdan oldin ichki tuyg'u termamizni g'alaba qozonishini his qilib turar, faqat raqibni qanday hisobda yutishimiz qiziq edi.  
Bahsda futbolchilarimiz raqiblaridan har jabhada ustun ekanliklarini namoyish etgani, rost. Natija ham yomon emas.
Shunday bo'lsada, an'anaga sodiq qolib yurtimizning turli burchaklarida yashovchi zukko muxlislar bilan saralangan jamoamiz a'zolariga baho qo'yishga harakat qildik.     
Baholar 10 balli tizimda:
Aleksandr Lobanov – 6,5 ball
Yaman termasini avvalgi turdagi raqibimiz KXDRdan kuchli tomoni yo'q edi. Lekin, ularning koreys jamoasidan farqi – yamanliklarda individual mahoratga ega hujumchilar bor ekan. Shundan bo'lsa kerak, Lobanov Dohada ko'p bora “bezovta” qilindi. Ikkita xavfli vaziyatda golkiper yaxshi o'yin ko'rsatgan bo'lsa, o'yin oxirida baribir to'p o'tkazib yubordi. O'sha golda himoyachilarimizning ham kattagina “hissasi bor”. - Nesterov bo'lganda gol o'tkazmasdi, degan fikr esa - “ehtimollar nazariya”si bilan bog'liq, masala. Yana o'sha “so'ngi daqiqalar sindromi”...
 
Egor Krimets – 7 ball
Dunyoda yuz foiz mukammal jamoaning o'zi yo'q. Bizning  termamiz himoya chizig'i esa raqib hujumchilariga ko'p hollarda qarshilik qila olmadi. Egor hali o'sadi va unga yuqori ball qo'yish fursati ham kelib qolar...
Anzur Ismoilov – 7 ball
Anzur yaxshi himoyachi. Kerak bo'lsa hujumchilarga ham yordam beradi. KXDRga qarshi o'yinda raqib o'yiniga yarasha harakat  qilgani, rost. Kecha ba'zi vaziyatlarda raqibni mensimagandek o'ynadi. Bahosi ham shunga yarasha.
 
Islom To'xtaxo'jaev – 7 ball
Islomni boshqa ampluada sinab ko'rish vaqti etib kelmadimikan... Mana shu yigitning o'yiniga baho berish doim qiyin bo'ladi.
 
Vitaliy Denisov – 7,5 ball
Denisov o'zini ayamay o'ynaydi. Maydondagi shijoat namunasi  – u. Biroq “Loko” vakili xato qilsa qimmatga tushmiz. Uni yomonlashga biror muxlisning tili bormagani ham rost. Bilamizki, Vitya – jamoaga faqat foyda keltiradi. Ballga kelsak, namoyish etgan o'yiniga qarab berdik.
Aziz Haydarov – 9  ball
Maydon markazida eng ko'p mehnat qilib, termadagi debyut golini urgan Azizning o'yini maqtovga loyiq.
Odil Ahmedov – 9 ball
Odil haqida ko'p gapirishning keragi yo'q. U biz uchun kerakli g'alabaga bemisl hissa qo'shgan futbolchi. Ahmedov borgan sari tajovuzkor o'yin ko'rsatayotgani ko'rinib turibdi.   
Sardor Rashidov – 9 ball
Har bir harakati ko'zni quvontirgan Sardor o'z saviyasida o'ynadi. Uzoqdan beradigan o'ziga hos zarbalarini ko'proq ko'rishni istardik.
Server Jeparov – 8, 5 ball
Legioner o'yinchimiz maydon markazida ishonchli, biroq burchak to'plarini boshqalar bilan “baham” ko'rsa yaxshi bo'lardi...    
Stanislav Andreev – 8 ball
Gol urgan futbolchiga past baho qo'ydik. “Muxlislar yoqimtoyi” bo'lgan Stas raqib darvozasini aniq mo'ljalga olish bilan birgalikda, darvoza tomon bergan noaniq zarbasi, o'yin tempiga kirishib keta olmagani bilan ham yodda qoldi-da!
Igor Sergeev – 7 ball
Kecha u “Sariq devni minib” asaridagi  “Ko'rinmas qalpoq”ni kiyib oldi, chog'i. Hujumchi degani o'zini ko'rsatishi kerak. O'z vaqtida ochilish, maydonda joy tanlash ham mana shu ampluadagi futbolchilarga hos jihat, axir?  
(So'rovnomada yurtimizning dyarli barcha viloyatida yashovchi muxlislar fikridan foydalanildi)
Zahiradan tushgan futbolchilar o'yiniga  esa to'xtalmadik. Elmurod ERMATOV tayyorladi
— deya xabar beradi uff.uz nashri.