Tizzasidagi jarohat sabab, ma'lum muddat o'yindan chetda qolgan turkiyalik Xamit Oltintop FIFA.com saytining intervyu borasidagi iltimosiga rozilik berib, 2010 yili individual sovrin keltirgan mashhur golini esladi. Futbolchi tomonidan Evro-2012 saralashi doirasida Qozog'iston termasiga qarshi kechgan o'yinda urilgan o'sha gol ko'pchilik xotirasida muhrlanib qolgan. Zero, burchak to'pi amalga oshirilgach, aqlni oluvchi zarbadan hosil bo'lgan gol yil yakunida Oltintopni Pushkash nomidagi sovrin (eng chiroyli gol uchun) laureatiga aylantirgandi....
- Yaqinda Pushkash nomidagi sovringa da'vogarlarning yangi ro'yxati e'lon qilindi. Sizningcha, bu safar kimning goli favorit?
- Ro'yxatga kiritilgan barcha gollarni ko'rdim - har biri fantastika. Deylik, Devid Bol to'pni darvozabon ustidan ajoyib tarzda oshirib tashlagan. Filipp Meksesniki esa, 2010 yili men urgan golga juda o'xshash. Marsel Njdeng ham «Paderborn» uchun beqiyos gol urgan. Lekin menga angliyalikning zarbasi ma'qul tushdi - u barchasini o'ta engillik va nafislik bilan amalga oshirgan.
- Siz bu sovrinni 2010 yili Turkiya terma jamoasi o'yinida jarima maydoni chizig'i ustidan bergan takrorlanmas zarbangiz uchun olgandingiz. O'sha golni qanday eslaysiz?
- Termamizga Gus Xiddink ustozlik qilar va qaysidir ma'noda jamoa­miz yangilangandi. Shuningdek, Qozog'iston termasi bilan o'yin juda muhim sanalgan va biz barchasini yaxshi boshlab, yakunda 3:0 hisobida g'alaba qozonganmiz. Esimda, to'pga ko'zlarimni yumgancha zarba bergandim. Ko'zlarimni ochganimda, to'p to'rda edi va shunda uning o'z joyiga tushganini tushunganman. Keyinroq televizorda zarbamdan so'ng to'pning darvozaning yuqori o'ng burchagiga borganini ko'rdim...
- Demak, siz «ko'r-ko'rona» zarba yo'llagansiz...
- Ha-da (kuladi). Faqat to'p oyoqqa yaxshi tushishi uchun ozgina sakrashimga to'g'ri kelgan. O'zi odatda bosh bilan zarba berayotganda ham ko'zlar tabiiy ravishda yumiladi. Men esa o'sha holatda bor kuchimni zarbaga yo'naltirish uchun shunday qilgandim.
- Golni ilk marta qayta tomosha qilganingizda, uning g'oyat chiroyli chiqqanini darhol tushunganmisiz?
- Yo'q, keyinroq anglaganman. To'g'rirog'i, odamlar golimni tinmay maqtashganidan so'ng. Zero, o'sha payt meni faqat bitta narsa qiziqtirardi - jamoam g'alabasi. Bunga o'z hissamni qo'shganimdan shunchaki, xursand edim. Meni Pushkash sovriniga nomzodlar qatoriga kiritishganidan keyingina golni qayta ko'rib, beixtiyor o'ylaganman: «Ha, darhaqiqat, chakki chiqmagan ekan». Xullas, u sehrli zarba va shunday gol edi. Lekin boshqa nomzodlar urgan gollar ham bir-biridan qolishmasdi. Hattoki, sovrinni boshqa futbolchiga berishlariga ham, qarshi chiqmasdim. Endi o'shanda nechog'li xursand bo'lganimni aytishim shart emasdir.
- Mashg'ulotlarda bunday zarbalar ustida alohida ishlaganmisiz yoki hammasi tasodifan ro'y bergan?
- O'ylaymanki, eng chiroyli gollar - kutilmaganlik mahsuli. Lekin ularda ijodkorlik ulushi bor. Misol uchun, men uzoqdan zarba yo'llashni yoqtiraman. Vaholanki, ko'pincha raqibning jarima maydoniga yaqin hududda to'p suraman. Muhimi, agar intilsangiz, gohida shunday ajoyib gol urishga muvaffaq bo'lasiz. Deylik, ChLda «Shalke» darvozasini ham chiroyli tarzda ishg'ol qilgandim. Umuman, g'ayrioddiy harakatlar jonu-dilim.
- Xo'sh, o'sha sovrin siz uchun nechog'li muhim? Chunonchi, u tufayli avvalgi laureatlar - Neymar, Ibragimovich va Xames Rodriges qatoridan joy oldingiz.
- Bu katta sharaf. Futbolchilar kundan-kunga qancha ter to'kishlarini ko'pchilik tushunmaydi. Ya'ni keng tarqalgan tushunchaga ko'ra, biz kuniga 2 soatcha shug'ullanamiz va keyin 90 daqiqa o'ynaymiz - bori shu. Lekin yana bir qator jihatlar borki, ular kasbimiz uchun g'oyat muhim. Misol uchun, ovqatlanish tartibi, intizom, jarohatlardan so'ng tiklanish va moslashish jarayonlari... Bularning hammasi futbolchining sport formasiga bevosita ta'sir o'tkazadi.
- Pushkash nomidagi sovrin sohibini aniqlash so'rovida aynan muxlislarning ishtirok etishlariga qanday qaraysiz?
- Futbolda jamoaviy muvaffaqiyat muhim sanaladi. Muxlislar bunda katta rolga egalar. Aynan ular tufayli futbol shunday qiziqarli va ommaviy ko'rinish oldi. Demak, ularni quvontirish - bizning burchimiz. To'g'ri, oxirgi yillarda o'yin va fanatlar o'rtasidagi aloqa nisbatan xiralashdi. Demoqchimanki, natija birinchi o'ringa chiqdi. Ya'ni endilikda g'alaba o'yin uslubidan muhim bo'lib qoldi. Lekin muxlislarni zinhor unutmaslik kerak. Xullas, ularning ushbu sov­rin taqdirini hal etishda ovozga ega ekanliklari ajoyib.
Davomi InterFUTBOL gazetasi blogida.
— deya xabar beradi uff.uz nashri.