Qarshi Davlat universitetida 2015 yilgi O'zbekiston kubogi sohibi  “Nasaf” futbol jamoasi a'zolari va oliy ta'lim dargohi professor-domlalari, talabalari bilan uchrashuv o'tkazildi.
Uchrashuvda QDU rektori, professor Bahodir Shoyimqulov, biologiya fanlari doktori, professor Shoniyoz Qurbonov, ta'lim dargohi ustozi Yo'ldosh Bobojonov, universitetning jismoniy madaniyat fakulteti 3-bosqich talabasi Shohista Erkaeva so'zga chiqishib, “Nasaf”ning  joriy mavsumdagi ulkan g'alabasi barchaga shodu xurramlik ulashganini ta'kidlab, g'alabalar bardavom bo'lishligini tilashdi.
-“Nasaf”ning g'alabasi-bizning ham g'alabamiz, -deydi QDU jismoniy madaniyat fakulteti dekani Faxriddin Eshpo'latov. - Sababi vohamizning bosh futbol jamoasi tarkibida fakultetimiz talabalari Eldorbek Suyunov va Hamza Karimov to'p tepishadi. Qolaversa, Sherzod A'zamov, Kenja To'raev singari tajribali futbolchilar ham aynan jismoniy madaniyat fakultetida tahsil olishgan. Bugungi uchrashuv bo'lajak sportchilar, futbolchilarga o'ziga xos ruh bag'ishlashiga shubha yo'q.
 Tadbir so'nggida “Nasaf” ustoziga QDU rahbariyati tomonidan alohida ehtirom ko'rsatilib, o'zbekona to'n va do'ppi kiydirildi. O'z navbatida klub rahbariyati ham universitet rahbariyatiga esdalik sovg'alarni topshirishdi.
— deya xabar beradi uff.uz nashri.