Yutuqni e'tirof etish osonroqmi yoki nuqsonni tanqid qilish? Albatta, chetdan turib fikr bildirish mushkulot tug'dirmaydi: xoh salbiy bo'lsin, xoh ijobiy. Ammo shuni unutmaslik joizki, har qanday maqtov zamirida ruhiy rag'bat yotadi, shu tariqa muayyan shaxsni kelgusidagi ulkan g'alabalar sari ilhomlantirish mumkin.
Salbiy fikrlar esa aksincha, o'z oldiga yuksak maqsadlarni qo'ygan kishi hafsalasini pir qilib, uni tushkunlikka etaklashi turgan gap. Xo'sh, agarda muayyan shaxs sha'niga yog'dirilayotgan tanqidlar asossiz bo'lsa-chi? Bor mehr va mahoratini zimmasidagi ishga safarbar etayotgan odamning harakatlari qadr topmasa-chi? Bunday bosim har qaysi kuchli insonning ham sillasini quritishi tabiiy. So'nggi yillarda O'zbekiston milliy termasi ustozlarining boshiga aynan shunday qismat tushayotgani inkor etib bo'lmas haqiqatga aylanib bormoqda. Oqibatda bu holat bosh jamoamizning rasmiy o'yinlardagi natijalariga ham ta'sir ko'rsatmay qolmayapti...
Yodingizdami, Vadim Abramov termamiz boshqaruvini qo'lga olgan kezlari o'rtoqlik o'yinlaridagi mag'lubiyatlar keskin qoralangandi. Keyinchalik ushbu mutaxassis Osiyo kubogi-2011dagi yorqin o'yinlar orqali barcha tanqidlar o'rinsiz ekanini isbotladi. Shunda ham vaziyatga noto'g'ri yondashganlar topildi. «Chorak finalda bizga kuchsiz raqib uchradi, mana, yarim finalda haqiqiy salohiyatimiz ko'rindi» qabilida fikrlar damba-dam yangradi. Keyin JCh-2014 saralash bahslari o'zbek futboli tarixida o'chmas iz qoldirdi: Yaponiya termasi taslim etildi. Shunda ham Vadim Karlenovichni maqtovga loyiq ko'rganlar kamchilikni tashkil qilishdi, uni qo'llab-quvvatlash yoddan chiqqandi. Oxir-oqibat, bu loqaydlik o'z so'zini aytdi: saralashning keyingi bosqichi omadsiz boshlandi - Eron termasiga qarshi o'yin boy berildi. Voqealarning keyinchalik qay taxlit rivoj topgani muxlislarga kundek ravshan...
So'ngra bosh murabbiy vakolati ikkinchi marta Mirjalol Qosimovga ishonib topshirildi. Aynan shu mutaxassis tanqidlardan aziyat chekkanlar ro'yxatida peshqadam. Xo'sh, uning sha'niga yo'llangan salbiy fikrlarning barchasi ham asoslimidi? Nima emish, livanliklarga qarshi safar bahsida durang qayd etilmaganida yoki koreyaliklar bilan o'yin boy berilmaganida, termamiz mundialga chiqardi. Shunday pallalarda Qatar va Eron maydonidagi murakkab o'yinlarda qo'lga kiritilgan g'alabalar ikkinchi darajaga tushdi-qoldi. Qiyinchilik bilan erishgan g'alabasi yoddan chiqib, omadsiz ishtiroki uchun tinmay tanqid eshitaveradigan kishidan yana ijobiy natija kutish adolatdanmi? Qosimov aynan shunday holatga tushdi. Bir maqsad yo'lida birlashishni maqsad qilgan mutaxassisni qo'llab-quvvatlovchilar ko'p emasdilar. Yakunda barchasi birgina qaror bilan barham topdi - iste'fo!
Keyinchalik o'ta mas'uliyatli vazifaning kimga topshirilishi ko'plab muhokamalarga sabab bo'ldi. Har kim o'z nomzodini ilgari sura boshladi. Buni qarangki, O'zbekiston termasi bosh murabbiyligiga Samvel Babayan loyiq ko'rildi. Bu albatta, kutilmagan tayinlov edi. Shunday qilib, mundial yo'llanmasini qo'lga kiritish missiyasini bajarishdek mas'uliyatli vazifa «Paxtakor» menejeri zimmasiga yuklatildi. Kimga shodlik, kimga qayg'u...
Samvel Vyacheslavovichning bosh murabbiylikka tayinlanishidan to hozirga qadar o'tgan vaqt shuni ko'rsatmoqdaki, uning terma jamoadagi faoliyati ham asossiz tanqidlardan xoli bo'lmaydi. Birinchi navbatda, yangi bosh murabbiyning Yaman va Filippin termalariga qarshi o'yinlarga tanlagan tarkibi keng muhokama qilindi. Bu borada ham tanqidchilar faollik ko'rsatishdi. Asosiy urg'u Aleksandr Geynrixning terma jamoaga chaqirilishiga qaratildi. Faoliyatini Qozog'istonda davom ettirayotgan hujumchini O'zbekiston termasida o'ynashga munosib, deb biluvchilar kamchilikni tashkil qilishdi. Amalda esa, yamanliklarga qarshi bahsda aynan Sasha urgan gol hal qiluvchi ahamiyat kasb etdi. Ammo na Geynrix e'tirof etildi, na uni bosh jamoaga qaytargan Babayan...
Bu hali hammasi emasdi. Filippin termasining xorij futbolchilari bilan boyitilgan tarkibi ko'ngillarga g'ulg'ula soldi, yamanliklarga qarshi bahsdagi kamtarona g'alaba Manilada muvaffaqiyat qozonish imkoniyatini xavf ostiga solgandek tuyuldi. Ammo O'zbekiston termasi safardan ishonchli yutuq bilan qaytdi. Ikki o'yinda - 6 ochko. Ammo bu natija ahamiyatini yo'qotgandek, go'yo. Chunki ushbu g'alabalardan keyin ham termamiz murabbiylar shtabi, xususan, Samvel Babayanning boshi tanqidlardan chiqmadi. Kimdir yangi bosh murabbiyni «Paxtakor»ga mehr qo'yganlikda ayblasa, boshqa birov tarkib noto'g'ri tuzilganidan zada. Vadim Abramovning matbuot anjumanidagi chiqishi esa dard ustiga chipqon vazifasini o'tadi. «Lokomotiv» ustozining fikriga shaxsan O'FF prezidenti munosabat bildirdi, shu bois, bu masalaga ortiqcha to'xtalish nojoiz. Lekin Babayanni terma o'zagini «Paxtakor» futbolchilaridan tuzayotganlikda ayblash noto'g'ri. Nega deysizmi?
Sir emaski, O'zbekiston milliy termasi asosini xorij klublarida to'p surishayotgan legionerlarimiz tashkil qilishadi. Shunday ekan, tarkibning «sherlar» hisobiga to'ldirilayotgani haqidagi gap-so'zlar asossiz. Misol uchun, Filippin termasi bilan bahsni olaylik, kim ortiqcha edi? Andreevmi, Sergeevmi, Krimetsmi yoki Lobanov? To'g'ri, Lobanov ikki o'yin natijasiga ko'ra, tanqidga loyiq futbolchilar orasida birinchi o'rinda turibdi. Agar Babayan keyingi o'yinlarda ham uning xizmatiga murojaat etishni joiz topsa, tanqidlar yomg'iri ostida qolishi turgan gap. Darvozabon - yarim jamoa. «Paxtakor» posbonining esa bu vazifani uddalay oladigan darajaga chiqquncha biroz mehnat qilishiga to'g'ri keladi. Boshqalar esa Babayanning ishonchini to'la oqlashdi. Andreev yomon ko'rinmadi, Sergeev «dubl» qayd etdi, Krimets esa Anzurga sheriklikni qoyillatdi. Ammo baribir, Samvel Vyacheslavovichni aybdor sifatida ko'rsatayotganlar topilmoqda.
Yuqoridagi fikrlar muayyan shaxsni oqlash maqsadida bildirilmadi. Maqsad - Abramov, Qosimov yoki Babayanning yonini olish emas. Aksincha, milliy terma jamoamiz boshqaruvida kim ishlashidan qat'iy nazar, uning mehnatini hurmat qilish, murabbiylar shtabi va futbolchilarni yangi g'alabalar sari ruhlantirishga da'vat etish.
Asossiz tanqid xalqimiz orasida qoralanadigan illatlardan biri - g'iybatga qiyos. G'iybatni esa asosan g'alamislar tarqatishadi. Oktyabr oyida termamizni mas'uliyatli o'yinlar kutib turibdi. Nasib qilsa, Bahrayn termasi ham, KXDR futbolchilari ham mag'lub etiladi. Asosiysi, ishonchga tayansak, bas. Shu tariqa bosh jamoamiz murabbiylar shtabi, futbolchilarimizga ilhom baxsh etishimiz mumkin. Bu o'rinda, futbol jamoatchiligini o'z xusumati domiga tortishga urinayotganlar g'oyasidan voz kechish muhim. Babayan terma jamoa bosh murabbiyligiga loyiq ko'rildimi, demak, keyingi o'yinlarda uni to'la qo'llab-quvvatlashimiz shart. Tarkibni «Paxtakor» a'zolari hisobiga to'ldiradimi, ko'pchilik yoqtirgan o'yinchilardan voz kechadimi, ayrim klublardagi futbolchilardan «sayyoh» sifatida foydalanadimi - bu uning ishi. O'z g'oyalari bilan terma jamoani mundialga olib chiqishga ishonayotgan pallada uni yolg'iz qoldirish adolatdanmi? Maqsadimiz jahon chempionati yo'llanmasini qo'lga kiritish ekan, nega endi bir maqsad yo'lida birlashmasligimiz kerak?
Yana bir bora takrorlaymiz, bu maqolada aynan Babayanning terma jamoamiz bosh murabbiyi lavozimida ishlayotganidan kelib chiqib, fikr yuritilmadi. Mazkur vazifani bajarayotgan har bir shaxsni qo'llab-quvvatlash darkor. Murabbiylar almashaveradilar, ishqibozlar esa o'zgarmaydilar, ularning orzu-umidlari o'z kuchini saqlab qoladi. Maqsadimiz - mundial yo'llanmasi. Uni qo'lga kiritmoqchi ekanmiz, asossiz tanqidlardan voz kechib, g'alabalarni e'tirof etishni ham o'rganaylik. O'tkir Umarov Manba: "InterFUTBOL" gazetasi
— deya xabar beradi uff.uz nashri.