Aksariyat odamlar futbolchilarni anchayin jo'n fikrlovchi kishilar deb hisoblaydi. Ammo ular orasida ijtimoiy masalalardan tortib, to siyosat bobidagi nozik savollarga qadar erinmay javob qaytarishni yoqtiradigan charmto'p ustalari ham topiladi. Eurosport.ru saytida chop etilgan ushbu qiziqarli maqolada futbol maydonidan siyosat maydoniga qadam qo'ygan yulduzlar haqida so'z boradi.
Romario
Futbol tarixidagi eng buyuk hujumchilardan biri (1000 tadan ziyod gol, o'z hisob-kitobiga ko'ra) Romario 2009 yili demokratik sotsializmni qo'llab-quvvatlovchi Braziliya Sotsialistik partiyasi a'zoligiga qabul qilinadi. Oradan bir yil o'tgach u mamlakat Kongressining quyi palatasidan joy egallaydi. O'shanda futbol afsonasi uchun 150 mingga yaqin kishi yoki umumiy saylovchilarning 1,84 foizi ovoz bergandi.
Sotsialist Romario kelgusida Rio shahar meri bo'lishga umid bog'lagan: "Mazkur vazifa – siyosat odlamidagi eng qiziqarlisi. Ehtimol, 2016 yili ushbu lavozimga o'z nomzodimni ilgari surarman. Ammo hozircha bunga to'liq ishonch hosil qilganim yo'q".
Xaver Zanetti
"Inter" va Argentina terma jamoasi sobiq sardori futbol maydonidan tashqarida kambag'al bolalar lagerida FIFA elchisi sifatida faoliyat yuritadi. U Argentinadagi kambag'allarga moddiy yordam ko'rsatgani uchun Milan xalqi tomonidan medal bilan taqdirlangan.
2005 yilning mayida "Inter" qo'mondon Markos rahnamoligidagi sepatist partiya etakchisidan uning tarafdorlari – mamlakatning mahalliy xalqlari uyushmasi uchun o'rtoqlik uchrashuvi tashkil qilib berish so'ralgan xat oladi.
Zanetti bu uning uchun muammo bo'lmasligi, agar klub sayoxatga tayyor bo'lsa –mamnuniyat bilan sheriklarini maydonga boshlab tushajakligini bildiradi. Ammo "Inter" rad javobini beradi. Shunga qaramay Xaver rahbariyat va ba'zi jamoadoshlarini sepatistlarga xayriya qilishga ko'ndiradi.
Milanliklar menejeri Bruno Bartolotstsi Chyapas shtatidagi qishloqqa tashrif buyurib, to'plangan mablag' va Zanettining "o'z nasli va ideallarini saqlab qolish uchun kurashda" xayrixohligi bitilgan maktubini eltib beradi.
Jorj Vea
1995 yili "Milan" yulduzi FIFA tomonidan yil o'yinchisi deb topiladi, BMTning bolalar jamg'armasi YuNISEFga katta miqdorda xayriya mablag'i ajratib ushbu tashkilotning elchisi bo'ladi, oradan 10 yil o'tib esa Liberiya prezidenti lavozimi uchun o'z nomzodini qo'yadi.
Vea turar-joylar, elektr energiyasi, toza ichimlik suvining narxini pasaytirish, qishloq aholisi uchun ta'lim sifatini oshirishni taklif qiladi. Jorj dastlabki turda 28 foiz ovoz to'playdi, ammo keyingi bosqichda Elen-Jozef Serlifga imkoniyatni boy beradi.
Liberiya hukumatiga dunyodagi birinchi futbolchi-prezident kelishi mumkin edi, ammo hokimiyat boshqaruvini mamlakat tarixidagi ilk ayol prezident o'z qo'liga oladi. Oradan 10 yil o'tganiga qaramay Vea hali hamon eng taniqli siyosatchi bo'lib qolmoqda: 2014 yil dekabrida uni 78 foiz ovoz bilan Liberiya Senatiga saylashdi.
Jorj o'z ustida ishlash va tahsil olishni davom ettirmoqda. U 2009 yili Mayyami universitetini tamomladi. Hozirda esa boshqa oppozitsiyachi siyosatdonlar bilan yangi prezidentlik saylovlariga taraddud ko'rmoqda.
Diego Maradona
Argentinalik futbol afsonasi butsasini mixga ilgach nafaqat giyohvandlik moddalariga ruju qo'ygani, balki tanqidiy ruhdagi keskin siyosiy bayonotlari bilan ham tilga tushdi.
Futbolchilik faoliyatidayoq u Fidel Kastro sha'niga achchiq so'zlar yog'diradi, ammo keyinchalik uning yaqin do'st aylanadi. Maradona Ugo Chavesni qo'llab-quvvatlab, Amerika imperializmidan ochiqchasiga nafratlanishini bildirgan edi.
U 2005 yili Jorj Bushning Argentinaga tashrif buyurishiga qarshi namoyish aktsiyasida qatnashgan va hatto Qo'shma Shtatlar prezidentini "kir yuvuvchi kishi" deb atab, STOP BUSH yozuvi tushirilgan mayka kiyib oladi.
Lilian Tyuram
Frantsiya terma jamoasi afsonasi Gvadelupeda dunyoga kelgan. Qachondir katolik ruhoniysi bo'lishni xohlagandi, ammo islom dinini qabul qilib, shundan so'ng futbolchilik faoliyatini boshlaydi.Odamlarga yordam berish istagi uni aslo tark etmadi: Tyuram Frantsiyada etnik ozchilikning huquqlari uchun kurashmoqda.
2005 yili yuz bergan muhojir yoshlarning tartibsizliklari vaqtida ichki ishlar vaziri Nikolya Sarkozi namoyishchilarni "tuban kishilar" deb ataydi. Tyuram esa uning so'zlariga izoh bera turib, siyosatchi fikr bildirish huquqiga ega ekani, agar Sarkozi o'zini shunday hisoblasa saroyda yashamasligi kerakligini aytib o'tadi. Keyinchalik Tyuram va Nikolya Sarkozi o'rtasidagi munosabat haqiqiy qarama-qarshilik darajasigacha ko'tariladi.
Lilian 2006 yili prezidentlikka nomzod Sarkozining dasturini tanqid qilib, uni "irqchi" deb ataydi. Sababi dastur mamlakatdan barcha noqonuiy muhojirlarni chiqarib yuborishni ko'zda tutgandi.
E'tiroz belgisi sifatida esa u 80 nafar uysiz muhojirga Italiya bilan o'yinga kelishi uchun bir necha avtobus ajratib beradi. O'shanda emigrantlar uchrashuvni Jak Shirak va Nikolya Sarkozi lojasining ro'parasida kuzatishgandi.
Prezidentlika saylangan Sarkozi 2009 yili Tyuramga irqiy masalalar bo'yicha vazir lavozimini taklif qilib, uni o'z tarafiga og'dirib olishga urinib ko'rdi. Ammo futbolchi taklifni "ochiq-oydin ko'rinib turgan sabablar" tufayli rad etadi.
Frenk Lempard
"Chelsi"ning sobiq sardori va yuragi 2007 yili Buyuk Britaniya bosh vaziri Devid Kemeron bilan uchrashgach o'zini tori (konservatorlar partiyasi) vakili deb hisoblashini ma'lum qiladi.
Mirror nashri muxbiri Lempardning do'stlaridan biri bilan suhbatlashdi: "Frenk mamlakat aslida qanday bo'lishi haqida aniq tasavvurga ega. Odamlar futbolchilarni anchayin oddiy kishilar deb hisoblashadi. Ammo Lempard ijtimoiy masalalardagi savollarga erinmay javob qaytarishni yoqtiradi, hatto ko'pchilik uning uyiga kechki ovqatga yo'l olayotgan bo'lsa ham.
Ehtimol, tori siyosat bilan yanada ko'proq shug'ullangani afzaldir. Chunki Frenk – yosh saylovchilar uchun haqiqiy namuna".
Lempardning o'zi esa bu kabi fikrlarga ehtiyotkor munosabatda: "Ha, mening Devid Kemeron bilan suhbatim ajoyib tarzda o'tdi. Ammo men futbolchi sifatida buni targ'ibotga yo'ymoqchi emasman". Mahmudjon AZIMOV tarjimasi Manba: arena.uz
— deya xabar beradi uff.uz nashri.