Evro-2016 saralashi bir qator qiziqarli echimlarni tortiq etdi. Kvalifikatsion raund bahslarida ko'pchilik nazarga ilmaydigan terma jamoalar ham «sensatsion» natijalar qayd etib, Frantsiya yo'llanmasini qo'lga kiritishdi.
Demak, kelasi yili debyutant futbolchilar safi har qachongidan uzun bo'ladi. Marhamat, Sovsport.ru sayti ma'lumotlari asosida berilayotgan maqola orqali qit'a miqyosidagi bosh turnirda ilk marta ishtirok etishlari kutilayotgan e'tiborga sazovor futbolchilarga nazar soling.
Garet Beyl (Uels termasi), yarim himoyachi
Yoshi: 26
Klubi: «Real»
Transfer narxi: 80 mln. evro
Bir qarashda, Garet Beyl ham buyuk vatandoshi Rayan Giggzning taqdirini takrorlab, terma jamoasi safida yirik turnirlar havosidan bahra olmaydigandek ko'ringandi. Lekin endi futbol muxlislari xotirjam uxlashlari va futbol olamidagi eng qimmatbaho o'yinchilardan birining Evropa birinchiligidagi debyutini kutishlari mumkin. Ha, Uels termasi o'z tarixida ilk marta qit'a chempionati final bosqichiga yo'l oldi. Shunday ekan, jahonning eng yaxshi yarim himoyachilaridan biri kelasi yoz tomoshabin sifatida dam olmaydi. Albatta, agar qandaydir ko'ngilsizlikka duch kelmasa (aytaylik, jarohat), u Evro-2016ni o'z ishtiroki bilan bezash imkoniyatiga ega. Alohida ta'kidlash o'rinli, uelsliklarning saralash bosqichidagi muvaffaqiyatlarida aynan Beyl katta rol o'ynadi. Harqalay, uning 6ta golining o'zi salmoqli tosh bosadi.
Aaron Remzi (Uels termasi), yarim himoyachi
Yoshi: 24
Klubi: «Arsenal»
Transfer narxi: 28 mln. evro
Barcha futbol muxlislariga yaxshi tanish bo'lgan yana bir uelslik. «Arsenal» yarim himoyachisi saralash o'yinlarida uncha yorqin nur sochgani yo'q. Deylik, atigi 1ta gol bilan cheklandi. Eng asosiysi esa, uning azaliy orzusi ushaldi - yana 7 oydan so'ng Frantsiyaga Evro-2016 ishtirokchisi sifatida boradi. Aaron endi salomatligiga e'tiborni ozgina oshirsa, bas. Zero, u oxirgi vaqtlarda turli jarohatlar sabab, «Arsenal» o'yinlarini tez-tez o'tkazib yuboryapti. Ayni payt uelsliklarning uning uchun duoda ekanliklari tayin. Axir Remzi yaxshi sport formasida bo'lsa, terma jamoada muhim vazifalarni bajarishga qodir.
Gilfi Sigurdsson (Islandiya termasi), yarim himoyachi
Yoshi: 26
Klubi: «Suonsi»
Transfer narxi: 11 mln. evro
 Islandiya termasida Sigurdsson eng ommaviy familiya sanaladi. Deylik, jamoada Gilfidan tashqari, himoyachi Ragnar Sigurdsson ham bor («Krasnodar» vakili). Ulardan biri yarim himoyachi sanalsada, ko'p gol uradi, ikkinchisi esa himoyada mustahkam. Aniqroq aytsak, Gilfi Evro-2016 saralash o'yinlarida 6ta gol urdi. «Suonsi» xo'jayinlari bundan nihoyat xursandlar. Axir kvalifikatsion jarayon davomida yarim himoyachining transfer narxi naq 1 mln. evro qimmatlashdi. Endi futbolchi Frantsiyada ham shunday mahsuldorlikni qayd etsami, unda narxi aql bovar qilmas darajada oshib ketishi tayin.
Etrit Berisha (Albaniya, termasi), darvozabon
Yoshi: 26
Klubi: «Latsio»
Transfer narxi: 2,1 mln. evro
Albaniyalik alpqomat yigit (bo'yi - 194 sm., vazni - 92 kg.) butun saralash bosqichi davomida atigi 5 marta gol qo'yib yubordi. Xullas, u Frantsiya-2016 yo'lidagi o'yinlarning bosh kashfiyotlaridan biriga aylandi. Muhimi, Etrit kamtarin terma jamoadagi ishonchli o'yinlari o'laroq, «Latsio»da ham o'zini o'nglab oldi. Ya'ni asosiy tarkibdagi joy uchun kurashda Federiko Markettidan deyarli butunlay ustunlik qilmoqda. Aytgancha, Berisha nafaqat ajoyib «seyv»lari, balki penalti tepishi bilan ham maqtana oladi. Harqalay, u «Kalmar» klubi sharafini himoya qilgan payti «nuqta»dan 3ta gol urgan.
Davomi InterFUTBOL gazetasi blogida.
— deya xabar beradi uff.uz nashri.