Ertaga katta o'yin bor. Manama shahrida Bahrayn hamda O'zbekiston milliy terma jamoalari o'rtasida JCh-2018 musobasining 2-saralash guruh bosqichining 5-tur uchrashuviga start beriladi.
O'yin biz uchun qanday ahamiyat kasb etishini yaxshi bilasiz. Kecha terma jamoamiz delegatsiyasi ushbu davlatga etib bordi va mashg'ulotlarga kirishdi.
An'anamizga ko'ra, biz ushbu raqib davlat matbuoti bilan qiziqib ko'rdik. Aytish kerakki, ertangi o'yin haqida chiqishlar deyarli yo'q. Mamlakatning yirik - Bahrain Post, Gulf Daily News, Bahrain News Agency va Voice of Bahrain nashrlari qisqa tarzda o'yinga to'xtalib o'tishgan.
"8 oktyabr sanasi Bahrayn futbolida muhim ahamiyat kasb etadi. Serxio Batista shogirdlari 2018 yilda Rossiyada o'tadigan Jahon chempionatining 2-saralashida O'zbekiston termasiga qarshi o'yin o'tkazishadi.
Garchi, termamizning keyingi bosqichga chiqish imkoniyatlari pastroq bo'lsada, o'zbeklarga qarshi faqat g'alaba uchun o'ynab ko'riladi, harakat qilinadi. Aslo, O'zbekistonning Manamadan uch ochko olib ketishiga yo'l qo'maslik kerak.
Umuman olganda, hozirda Osiyo qit'asining aksariyat termalari bir xil saviyaga ega. Shunday ekan, muxlislar bilan to'lib-toshadigan "Bahrain National Stadium" o'yingohida bemalol yutuq uchun maydonga tushish lozim. Boz ustiga, O'zbekiston termasining kuchli va kuchsiz tomonlarini yaxshi bilamiz", - deyiladi nomlari yuqorida tilga olingan nashrlarning sport rukni ostidagi sahifalarda.
— deya xabar beradi uff.uz nashri.