Aleksandr Geynrix. U har doim «Endi qaylarda yurgankin bu hujumchimiz?» deganimizda o'zini eslatib qo'yadigan noyob-nodir hujumchi. Mana, Yaman va KXDR termalariga qarshi bahslarda hal qiluvchi gollarni urgani Sashani hali hisobdan chiqarishga erta ekanligini ko'rsatib berdi. Terma jamoa uchun urgan 30ta golidan 9tasi (30 foizi)ni zaxiradan maydonga tushgancha hosil qilgani esa, uning «sehrli tayoqcha»miz ekanligini yaqqol isbotlaydi. Demak, quyida Sashaning terma jamoadagi faoliyatiga raqamlar orqali chizgi chizamiz.
***
2002 yili Slovakiya termasiga qarshi kechgan o'rtoqlik bahsining 53-daqiqasida Ne'matullo Qutiboev o'rniga angrenlik yosh hujumchi - Aleksandr Geynrix maydonga tushganida, jamoamiz safida iqtidorli yangi yulduzcha paydo bo'lgani va u bizni o'z gollari bilan ko'p xushnud etishiga to'la ishongan edik. Aynan o'sha mavsum yakunida Sasha mamlakatimizda yilning eng yaxshi futbolchisi, deb topilgandi.
***
Sasha 2007 yilgi Osiyo kubogida butun Qit'a matbuoti e'tiboriga tushdi. Uning o'zgacha g'oyalari asosida jamoamiz a'zolari har bir golni noodatiy tarzda nishonlashga tushdilar. Umuman, Geynrixning o'sha musobaqada golni nishonlashda qo'llagan «atirgul bo'lib ochilish» lavhasini boshqa hech qaysi o'yin, hattoki, Evropadagi bahslarda ham ko'rmadik.
***
Aslini olganda, Aleksandr Geyn­rixning faoliyati yurtimizdagi istalgan futbolchinikidan yorqinroq kechgan. Yoshlar o'rtasidagi mundialda gol urish, Andres Inesta kabi raqib bilan tengma-teng kurash olib borish, «Aktobe» safida Evropa Ligasida «Dinamo» (Kiev) klubi darvozasini har ikki bahsda ham nishonga olish, murabbiylar bilan tortishish - bular haqida alohida maqola yozish mumkin.
***
Internet manbalari, ya'ni ayrim veb-saytlarda uning O'zbekiston va J.Koreya fuqaroligiga egaligi haqida yozilgan. To'g'risi, bunga ishonish juda qiyin. Koreya o'lkasida atigi yarim mavsum to'p surgan hujumchimizning O'zbekiston bayrog'idan voz kechib, o'zga mamlakatga o'tib ketishi mumkin emas.
***
Aleksandr Geynrix xususida uning Germaniya agentligi bilan olib borgan hamkorligi to'g'risida ham ma'lumotlar bor. Aniqrog'i, transfermarkt.de saytida Wortmann Sportmarketing futbolchimizning agenti sifatida keltirilgan. Shu saytda, ya'ni futbolchining shaxsiy varaqasida keltirilishicha, uning «Ordabasi» bilan tuzgan shartnomasi 2015 yilning 31 dekabrigacha amalda bo'ladi. Aytgancha, Germaniyaning Boxum shahrida joylashgan mazkur agentlik kompaniyasi hamyurtlarimiz - Islom To'xtaxo'jaev va Temurxo'ja Abduxoliqov, shuningdek, taniqli frantsuz Jibril Sisse, avstraliya­lik posbon Evgen Galekovich kabilar bilan ham ishlaydi.
***
Geynrix shu paytgacha klub miq­yo­­sidagi faoliyati davomida 274ta o'yin o'tkazib, 97ta gol urgan. Terma jamoa safida esa 85 marta maydonga tushib, raqiblar darvozasini 30 bora nishonga oldi. Xullas, u kechagi golidan so'ng terma jamoa to'purarlari orasida Maksim Shatskixdan so'ng Mirjalol Qosimov bilan birga 2-3-o'rinlarni bo'lishib turibdi. Milliy jamoa safida ko'p maydonga tushish bo'yicha esa, 4-o'rin aynan Sashaniki. Undan oldinda Temur Kapadze (119ta o'yin), Server Jeparov (111ta o'yin) va Ignatiy Nesterov (92ta o'yin) bor.
Davomi InterFUTBOL gazetasi blogida.
— deya xabar beradi uff.uz nashri.